JIRIMIA 38 - Kok Borok (Re-edited) Bible (BSI)

Twikhor kwran bisingo Jirimia

¹ Hakhe Matanni bwsajla Sephatia, Pasurni bwsajla Gedalia, Selemiani bwsajla Jehukal tei Malakiani bwsajla Pasur, Jirimiano tei bebak bororokno hai hwnwi saui tongmano khna kha.

² O kamiyungo tongnairok choba bai, asari bai tei bemuk sitra bai thwi bainai. Tamo khe Kolodiasongni aro thángnairok khe kwthang tong bainai; bo khe chobani sokat hai khe kwthang tonjaknai, hwnwi Subraiyung sa-o.

³ Subraiyung hai hwnwi sa-o, o kamiyung Babilonni habugrani Sengkrakrokni yago kubui’-no yapharwi rwjaknai tei bo omono yago nanai.

⁴ Hakhe tangphang adongrok habugrano hai hwnwi sa kha, “O borokno butharwi páina nango, tamni hwnma le o kamiyungo tong rwknai sengkrakrokno tei bororokno omo hai kókrok saui bo bwkha swbaiwi tongo. O borok lukuni kaham nai ya, hamya se nai-o.”

⁵ Habugra Jedekia hai hwnwi sa kha, “Nai di bo ba norokni yago’-no bla, tamni hwn khe habugra nono mungsa khlaiwi man ya.”

⁶ Hakhe bórok Jirimiano romwi mwrwknairokni nokhlani habugrani bwsajla Malakiani twikhoro dwkhwi bai khe khiklai rohor kha. A twikhoro twi kwrwi, harpek simi se, a harpego’-no Jirimia kwlwgwi tong kha.

⁷ Ebed-Melek hwnwi Ithiopiani khoroksa tangphang okra bo habugrani noyungo tongo. Bo bórok Jirimiano twikhoro khiklaima kókno khna kha. Habugra aphuru Benjamin Duglamo achukjak.

⁸ Hakhe Ebed-Melek noyungni nongkhorwi thángwi habugrano hai hwnwi saui kha,

⁹ “O ani bubagra, habugra, o bororok Jirimia diyarino khlaimarok belaino cha li ya, bórok bono twikhoro khiklai rw kha, bo aro ma chá yaui thwi anw, tamni hwnma le kamiyungo tei chámungrok kwrwi kha.”

¹⁰ Hakhe habugra aphuru Ithiopiani Ebed-Melekno hai hwnwi dagi kha “Nwng aroni borok khorokthamno nwng bai tlangwi Jirimia diyari thwi ya sini swkang bono twikhorni tisaui di.”

¹¹ Hakhe Ebed-Melek bo bai bororok tlangwi noyungni rírok tonma-o tlang kha tei bo aroni rí soroi bai rí kichikrokno dwkhwi bai khe twikhor bisingo Jirimiani thani tikhlai rohor kha.

¹² Hakhe Ithiopiani Ebed-Melek Jirimiano hai hwnwi sa hor kha, “O rí soroirokno tei rí kichikno nini kangkhungo dwkhwi bai phánwi ton di.” Hakhe Jirimia abo haino khlai kha.

¹³ Hakhe bórok dwkhwi bai khe sotonwi Jirimiano a twikhorni tisa kha. Aboni ulo Jirimiano mwrwknairokni nokhla-o ton kha.

Jedekia Jirimiani thani kók kaham sanhormani

¹⁴ Habugra Jedekia borok rohorwi diyari Jirimiano na rw hor kha tei Subraiyungni noktharni remtham duglamo bono yachak kha. Habugra Jirimiano hai hwnwi sa kha, “Ang nono kók tháisa-tháinwi sẃngna tongo, nwng ano mungsa phano khogwi ta ton di.”

¹⁵ Jirimia Jedekiano hai hwnwi sa kha, “Tumungno ang nono kubui kók sa khe nwng ano buthar glakna bla? Phiya ang nono kókbiti rw khebo nwng ani kókno khna glak.”

¹⁶ Hakhe habugra Jedekia bui saui man ya tẃi khe Jirimiano hai hwnwi swmai tangwi sa kha, “Chwngno langma rwnai Subraiyungni mung bai ang kubui’-no sa-o, ang nono buthar glak tei nono butharna nainairokni yago bo yapharwi rw glak.”

¹⁷ Hakhe Jirimia Jedekiano hai hwnwi sa kha, “Subraiyung, Sengkrakrokni Kaitor, Israilni Kaitor hai hwnwi sa-o, Babilonni habugrani tangphang adongsongni thani nwng sakno bedok khe, nini langma mwthangjaknai tei o kamiyungbo hór bai sókjak glak tei nwng bai nini núkhungni bororokbo kwthang tongnai.

¹⁸ Phiya nwng Babilonni habugrani tangphang adongsongni thani sakno bedok ya hwn khe o kamiyung Kolodiasongni yago yapharwi rwjaknai tei bórok omono hór bai sóknai hakhe nwng bórokni yakni yógwi man glak.”

¹⁹ Habugra Jedekia aphuru Jirimiano hai hwnwi sa kha, “Ang Kolodiasongni bwkhak thángnai Judairokno se kiri-o, tamni hwnma le ang bórokni thani yapharjagwi phano mano tei bórok ano yasek khusekrokbo khlaiwi mano.”

²⁰ Jirimia hai hwnwi sa kha, “Nwng bórokni yago yapharjak glak. Tamo khe ang Subraiyungni kók samano se khna di, hakhe se nini kaham wngnai tei nini langmabo mwthangjaknai.

²¹ Phiya nwng sakno bedok ya hwnwi tumungno bwkha chong khe, Subraiyung ano phunukma khe omo hai:

²² Nai di, habugra Judani núkhungni bebak tong rwk bainai bwrwirokno Babilonni habugrani sengkrakrokni thani rohorjak kha, tháng phuru a bwrwirok sa lang kha, “ ‘Nini bwkha berama kichingsong, nono bandi kha tei nono kebeng kha; tabuk nini yakungrok harpego kwlwk kha, tei bórok nono yakar kha.’

²³ “Norokni bebak bihiksongno tei bwsarokno Kolodiasongni thani tlang thángjaknai, nwng bo bórokni yakni yógwi man glak, phiya ba Babilonni habugra bai se romjak anw; tei o kamiyung hwn khe hór bai sókjaknai.”

²⁴ Aboni ulo Jedekia Jirimiano hai hwnwi sa kha, “O kók sa laimarokno buino saui ta man rw di, nwng thwi glak.

²⁵ Tumungno ang nwng bai kók-lam sa lai kha hwnwi hani tangphang adongrok khna khe, bororok nono hai hwnwi sẃng phai anw, ‘Nwng habugrano tamo tamo sa kha tei habugra nono tamo tamo sa kha, chwngno mungsa ta hui di chwngbo nono buthar glak.’

²⁶ Hakhe nwng bórokno hai hwnwi sa di, ‘Ano Jonathanni nogo thwina bagwi kiphilwi ta rohor di hwnwi ang habugrano koiwi sa kha.’ ”

²⁷ Hakhe bebak tangphang adongrok Jirimiani thani phaiwi sẃng phai kha; hakhe habugra bono sa di hwnwi dagima tẃi’-no bo bórokno sa kha. Hakhe bórok bono sẃngphnek li ya, tamni hwnma le habugra bai bini kók-lam khoroksa phano khnanai kwrwi.

²⁸ Hakhe Jerusalem segwi na phaijak ya sak jora Jirimia mwrwknairokni nokhla’-ono tong kha.