JIRIMIA 33 - Kok Borok (Re-edited) Bible (BSI)

Tei kaisa khatungma kók rwmani

¹ Jirimia mwrwknaini aro chobwi tonjak phuru Subraiyungni kók bini thani tei uáisa sók phai phi kha;

² Subraiyung hai hwnwi sa-o, o hano snamnaisa tei songchana bagwi tisanaisani mungno wng kha Subraiyung;

³ ano ring di hakhe ang uphilwi sa anw tei nwng saui man ya, abo hai kotor tei huijak manwirokno ang nono sa anw.

⁴ O kamiyungni núkhungrok tei chobani kókrok gerebwi tonjakmani yakni yókna bagwi tei Judani habugrarokni báikhrupjak núkhungni kókrokno tẃiwi Subraiyung Israilni Kaitor hai hwnwi sa-o;

⁵ ani thamchi tei jolima bai butharna hwnwi tongmano, Kolodiasong phaiwi choba khlaiwi butharwi máng kwthwino botok botok khe supungwi tonnai, tamni hwn khe bórokni tongmung hamyani bagwi o kamiyungni thani ani mwkhang huinai.

⁶ Nai di ang bórokno sak kaham kwrwng khe tei bórokni hamyano ham rwnai, kwbángma hamchamungno phunuknai tei kirina kwrwi khe tong kwchang khlainai.

⁷ Ang Juda bai Israilni mwkhangno kiphilwi tubu anw tei swkangni hai khe bórokni hano snam phirwi tisa anw.

⁸ Ang bórok ano kebengwi bebak cha ya, sumsok khlaimarokno hu-ui rwnai. Ano kebengwi cha yarok khlaiwi sumsok khlaimarokno tei kók khna ya wngmarokno ang nakarwi rwnai.

⁹ O kamiyung ani thani tongthokni bumung wngnai, lobjakmung, ang bórokni bagwi samung kaham khlaimano dopharokni bwskango lobmung tei chẃngsacha wngnai; ang bórokni hamari tei khakchang rwma khnanai bórok kwlwinai tei ma kirinai.

¹⁰ Subraiyung hai hwnwi sa-o: Norok omono khibijak, borok tei mal-mata mungsa kwrwi hwnwi sa lai-o, Judani kamiyung bai Jerusalemni lamarokbo khibijak borok tei mal-matarokbo tongnai kwrwi. Tamo khe kisa ulo khnanai,

¹¹ oro norok haino hai tongthokni khorang, hamjwk bai chamari kwtalni khorang, Subraiyungni noktharo omo hai khe ham bai rwui rwchapmani khorangbo khnanai; Sengkrakrokni Subraiyungno hambai rw di, tamni hwn khe bo wng kha kaham, bini hamjakma mol brúm brúmno tong phlai-o! Tamni hwn khe ang o hani mwkhangno kiphil rwnai, hwnwi Subraiyung sa-o.

¹² Sengkrakrokni Subraiyung hai hwnwi sa-o: O borok tei mal-mata kwrwi bukcha klaijak hani bebak kamiyungrokno tei hapharrokno haino hai bororok tong phainai, merarokni cháthai tei bathakthai wngnai.

¹³ Hathái kuchukni kamiyungrok, Sephelani kamiyungrok, Negebni kamiyungrok, Benjaminsongni ha-o Jerusalemni gana-o tongma ayang-uyango tei Judani kamiyungo merarokno lekhanairokni yak tẃi khe lái lai phinai hwnwi Subraiyung sa-o.

¹⁴ Nai di omo hai sal phaiwi tongo hwnwi Subraiyung sa-o; ang Israilni bosong bai tei Judani bosongno rwna hwnwi swmai tangmarok supungjaknai.

¹⁵ A salrogo tei a jora-o ang Daudni bosongni bagwi kaisa kwthar bedek rotom rwnai. Bo ha-o kubui bai tei sói khe samung tangnai.

¹⁶ A salrogo Judarok mwthangjaknai tei Jerusalem kirina kwrwi khe tongnai, “Subraiyung wng kha chini sói kubui khe buj thumnai.

¹⁷ Tamni hwn khe Subraiyung hai hwnwi sa-o; Israil bosongni achukthayungo achukna bagwi Daudni borokni bagwi biyal wng glak,

¹⁸ tei sal brúm brúm ani thani sógwi yapharnani, bwthái-bwchlwi yapharnani tei kusung kusung ratharwi yapharna bagwi Lebi bosongni bo borokni biyal wng glak.”

¹⁹ Subraiyungni o kók Jirimiani thani hai hwnwi phaiwi sók phai kha;

²⁰ Subraiyung hai hwnwi sa-o: “Hor tei sal wngmano tẃiwi ani raida tongmano tumungno norokni bere khoroksa swk hor tei salni jorano wng ya khlai rwui man khe,

²¹ hakhe ang ani seleng Daud bai swmai tangma bo báinai, hakhe bini achukthayungo achukna bagwi bwsa chwlabo tong glak tei ani samung khlaina bagwi Lebi ochaisong bai swmai tangmani bo swbaijaknai.

²² Ani seleng Daud tei ani samung khlainai Lebi bosongno lekha bai man ya nokhani athukiri tei twijlangni hasing swk khe er rw anw.”

²³ Subraiyung Jirimiano hai hwnwi sa kha:

²⁴ “Subraiyung bo saiwi namani Israil tei Judani núkhung khungnwino saiwi namano khibi kha hwnwi lukurok samano norok nuk ya da? Tamni hwn ba borok ani bororokno naisler kha, aboni bagwi bórokni mokolo bórokno dopha hai khe nukjak li ya.

²⁵ Subraiyung hai hwnwi sa-o: Tumungno ang sal tei hor bai swmai tang ya hwn khe tei nokha tei ha bai swmai tangjak ya hwn khe,

²⁶ hakhe ang Jakobni bosongno khibi kha mun tei ani seleng Daudno tei Abrahamni bosongni Isak tei Jakobni bosongni khoroksa swkno habugra wngnani saiwi na glak kha mun. Tamni hwn khe ang bórokni hamkrai khlai phirnai tei khairoknai.”