JIRIMIA 32 - Kok Borok (Re-edited) Bible (BSI)

Jirimia ha páimani

¹ Jedekia Judani habugra chámani nokha bisichi-o, Nebukadrejarni hwn khe nokha bisichichar phuru-o Subraiyung Jirimiano o kók sa kha.

² Aphuru Babilonni habugrani sengkrakrok Jerusalemo gerebwi tonjak tei Jirimia diyari khe Judani habugrani noyung mwrwknaini nokhla-o chobwi tonjak kha.

³ Judani habugra Jedekia bono alongo chobwi hai hwnwi hwn kha, “Nwng tamo wngwi ‘Subraiyung hai hwnwi sa-o, nai di ang o kamiyungno Babilonni habugrani yago yapharwi rwnai tei bo omono yago nanai’ hwnwi kók diyari sa?

⁴ Judani habugra Jedekia Kolodiasongni yakni yógwi man glak, phiya ba Babilonni habugrani yago yapharwi rwjaknai tei bo dadak-didik khe bo bai kók sa lai anw tei bini mokol bai bono nuk anw;

⁵ hakhe bo Jedekiano Babilono tlangwi tháng anw tei ang bono nai ya sak jora aro’-no tongnai hwnwi, Subraiyung sa-o; norok Kolodiasong bai choba khlai phano kwplai wngwi man glak.’ ”

⁶ Jirimia hai hwnwi sa kha, “Subraiyungni o kók ani thani phai sók kha:

⁷ Nai di Hanamelni bwsajla nukhra Salum nini aro phaiwi hai hwnwi sa phai anw, Anathoto ani ha tongma-o nwng nini bagwi paiwi na di, tamni hwn khe abono paiwi phiyóknani abo nini khlaithai se.”

⁸ Hakhe ulo ani angkhrani bwsajla Hanamel mwrwknairokni nokhla-o Subraiyung kók sama hai kheno ano phaiwi hai hwnwi sa phai kha, “Benjamin amchoini Anathoto ani ha tongmano nini bagwi paiwi na di, tamni hwnma le abo yago nanani tei phiyóknani samung abo nini se.” Hakhe omo Subraiyungni kókno hwnwi ang saui man kha.

⁹ Ang ankhrani bwsajla Hanamelni yakni Anathotni hano paiwi kha tei sekel chisni rukphai su-ui bono rw kha.

¹⁰ Ang paima bwlái-o bumung swi kha, mari togwi rw kha, kók mukumubo na kha tei a rukphairokno rwtamung bai rwtaui rw kha.

¹¹ Aboni ulo ang mari tokjak bai raidarok gwnang kók khama bwlái kangsa tei monino tokjak ya kók khlaima bwlái na kha;

¹² tei a kók khlaima bwláino ani angkhrani bwsajla Hanamelni bwskango kók khlaima bwlái-o mung swi lainai bebak kók mukumurokni bwskango mwrwknaini nokhla-o achugwi tongnai bebak Judairokni bwskango ang Mehesiani busuk Neriani bwsajla Barukno yapharwi rw kha.

¹³ Bórokni bwskango ang Barukno hai hwnwi dagi kha,

¹⁴ “Sengkrakrokni Subraiyung, Israilni Kaitor hai hwnwi sa-o; mung o mari tokjak kók khlaima bwlái bai mari tokjak ya kók khlaima bwláirokno sal kwdwk tongna tẃi khe hani twgo daui ton di.

¹⁵ Tamni hwn khe sengkrakrokni Subraiyung Israilni Kaitor hai hwnwi sa-o: ha-o haino hai nokrok, hapharrok, angur bwlwngrok pai phirwi man anw.”

Jirimiani surimung

¹⁶ Ang Neriani bwsajla Barukno kók khlaima bwlái rwma ulo ang Subraiyungni thani hai hwnwi suri kha;

¹⁷ O Subraiyung Kaitor! Nwng nini phankrak phan bai tei nini yak phologwi nokha tei hayungno snam kha! Nini thani kutuk mungsa phano kwrwi,

¹⁸ nwng kusung sai jora bororokno hamjakma phunugo, phiya nwng buma-buphani sumsokrokni bagwi bórokni bwsarokno majra rw-o. O kotor tei Phan gwnang Kaitor, nini mung wng kha sengkrakrokni Subraiyung,

¹⁹ nini phrwngma wng kha kotor tei samungo belaino kwrak; bororokni bebak him ma lamano naiwi tongo tei bórokni samungni manthai tei samungni bwtháirokni bagwi manthai sokat rw-o.

²⁰ Bo Ijip ha-o kwbángma marirok tei uanamasingcharok phunuk kha. Tei Israil bai bebak bororokni thani abo hai samung tabuk bo khlai tong kho, abo bai nini mung tabuk bo kotor wng kha.

²¹ Nwng mari bai uanamasingcha samungrok phunugui kwrak tei phan gwnang yak phologwi belai kirimasingcha khe nini borok Israilrokno Ijip hani tikhlaiwi tubu kha,

²² piya bwtwi bai dut kupulung o hano bini chuchusongno nwng rwna hwnwi swmai tangmani, abo bórokno rw kha,

²³ tei bórok o ha-o habwi abono yago na kha. Phiya ba bórok nini kókno khna li ya tei nini kerongno tẃi li ya; nwng khlai di hwnwi dagimarokno bórok mungsa phano khlai li ya. Aboni bagwi nwng bórokni saka-o o hamyarokno tubu kha.

²⁴ Nai di, kamiyungno yago nana bagwi abono kitingwi chokdeual snam kha, choba, asari tei bemuk hamyarok phaiwi kamiyungno Kolodiasongni yago khiklai kha. Nwng sama haino abórok bebakno nang phaimano nwng nuk kha.

²⁵ Hai phano, O Subraiyung Kaitor, nwng ano hai hwnwi sa kha, “O kamiyungno Kolodiasongni yago yapharwi rwjak phano, nwng o hano paiwi na di tei kók mukumurok narwk di.”

²⁶ Subraiyungni o kók Jirimiani thani phaiwi sók phai kha:

²⁷ Nai di, ang Subraiyung, bebak bahan-bwthẃi gwnangrokni Kaitor; mungsa phano khlaina bagwi ani thani kutuk to da tong ba?

²⁸ Aboni bagwi Subraiyung hai hwnwi sa-o; nai di ang Kolodiasongni yago tei Babilonni habugra Nebukadrejarni yago o kamiyungno yapharwi rwnai tei bo omono yago nanai.

²⁹ O kamiyung bai choba nang lai tongnai Kolodiasong phaiwi o kamiyungno hór phnang phainai tei sógwi rw bainai. Ano thamchi ka rwnai, Bal mwtaino satrai motom sókma nok tei kubun mwtaino chuak lukhlai barokma norokno sógwi páinai.

³⁰ Israilni bwsarok bai Judani bwsarok chwrai phuruni simi’-no ani mokol bwskango hamya abo tẃi samung máng khlai phai-o, Israilni bororokni yak bai tangjak samungrok ani thamchi ka rwnano karwi tei mungsa samung khlai li ya hwnwi Subraiyung sa-o.

³¹ O kamiyung snam phuruni simi tinisak jora ano omo belai thamchi ka rw kha, aboni bagwi ani mokol bwskangni omono norwi rohornai,

³² tamni hwn khe, Israilni bwsarok bai Judani bwsarok bórokni habugrarok bai tangphangsongrok, ochairok bai diyari songrok tei Juda bai Jerusalemo tong bainai bororok bórokni bebak samung hamya khlaimarok ano thamchi ka rw kha.

³³ Bórok ani bwkhak mwkhang rw yaui phikung se rw si-o; ang bórokno khá logwi phrwng phano bórok abono khna li ya tei srwngna nai li ya gwja.

³⁴ Bórok selengmasingcha manwirok tonwi ani mungwi ringjaknai nokno dera rw kha.

³⁵ Bórokni chwla bai bwrwi bwsarokno Molek mwtaini thani yapharna bagwi Hinomni sajlani harungo Bal mwtaini bagwi háyá kuchuk tang lai kha, omo hai selengmasingcha samung bai Juda sumsok khlai thung hwnwi ang abo hai bórokno dagi ya tei ani bwkha-o bo abo hai ka ya.

Khatungmani swmai kaisa

³⁶ “Aboni bagwi tabuk Subraiyung, Israilni Kaitor nwng samani o kamiyungno tẃiwi hai hwnwi sa-o, ‘Omo choba bai asari bai tei bemuk hamya bai khlaiwi Babilonni habugrani yago yapharwi rwjak kha’:

³⁷ Nai di, ang jolima bai, thamchi bai tei khá kobor uaijaui bórokno rwkhlai rohorma harokni haino hai bórok bebakno thum anw; ang bórokno oro kiphilwi tubu-ui phainai tei bórokno oro kirina kwrwi khe tonnai.

³⁸ Tei bórok ani bororok wngnai tei ang khe bórokni Kaitor wngnai.

³⁹ Hakhe ang bórokni tei bórokni bwsarokni kahamni bagwi bwkha kaisa tei lama twngsa rwnai.

⁴⁰ Ang bórok bai mol brúm brúm tong phlainai swmai tangnai, samung kaham khlaima bo mwthak glak tei ani aroni khárwi thángwi man ya tẃi khlai, bórokni bwkha-o ang kirima hap rwnai.

⁴¹ Ang bórokni kaham khlaiwi tongthoknai tei khá bai khúk bai tei kubui bai khlaiwi ang o ha-o bórokno snamwi tisanai.

⁴² “Tamni hwn khe Subraiyung hai hwnwi sa-o; ani bororokni saka-o aswk hamyarok tubumani swkno, ang bórokno kaham khlaina hwnwi kók rwmaswkno kaham khlainai.

⁴³ Omo ahaino klai tongjak, bororok bo kwrwi mal-matarokbo kwrwi tei Kolodiasongni yapha-o klaijak hwnwi norok sa laimani, oro haino hai norok hapharrok paijak anw.

⁴⁴ Benjamin ha-o, Jerusalemni ayang uyangni amchoi-o, Judani kamiyungrogo, hachugo tongma kami-o, Sephela tei Negebo tongnai bebak kamiyungrokno páijaknai, kók khama bwlái-o mung swinai, mari bujakrok tei kókumurok bo narwknai, tamni hwn ba ang mwkhangno kiphilwi tubunai, hwnwi Subraiyung sa-o.”