JIRIMIA 30 - Kok Borok (Re-edited) Bible (BSI)

Bini bororokni thani Subraiyungni swmairok

¹ Subraiyungni aroni o kók Jirimiani thani sók phai kha:

² Subraiyung, Israilni Kaitor hai hwnwi sa-o; Ang nono samani kókrokno nwng bijabo swiwi narwk di.

³ Nai di omo hai salrok phaiwi tongo, hwnwi Subraiyung sa-o, ang ani borok Israil bai Judani mwkhangno kiphil rwnai hwnwi Subraiyung sa-o, ang bórokno buphasongno rwmani ha-o kiphilwi tubunai. Tei bórok abono yago nanai.

⁴ O kókrok’-no wng kha Subraiyung Israil bai Judano tẃi samani kókrok;

⁵ Subraiyung hai hwnwi sa-o: Chwng belai khe kiriui kap laima khorang se khna-o, tei aro tong kwchang kwrwi.

⁶ Tabuk norok sẃngwi nai di; chwla borok sak bwsa manẃi da man ba? Hakhe tamo wngwi ang bebak borokno sak kengnai bwrwi hai bohogo yak rw laijak khe tei mwkhang borsajak khe nuk?

⁷ Oma! A sal bwswk se kotor wngno, a sal hai tei kubun sal wng glak; a sal Jakobni bagwi digi-sigini sal; hai phano bo aroni mwthangjaknai.

⁸ Kwplaisa Subraiyung hai hwnwi sa-o, a salo ang bini gwdnani horbakno swbai anw tei ang bini khajakrokno khengwi rw anw tei phatarni bororok bono tei seleng khati rwui tonwi man glak.

⁹ Phiya ba bórok bórokni Subraiyung Kaitorno tei bórokni habugra Daudno se mon lai anw, ang bono’-no habugra snamwi tisa anw.

¹⁰ Aboni bagwi, o ani seleng Jakob ta kiri di; tei o Israil bwkha ta bai di, hwnwi Subraiyung sa-o; hakchalo tongwino ang nono mwthang hornai, nini bororokno ang phiyók anw, Jakob kiphilwi phai anw tei kwchang kwchang khe ton anw, khoroksabo bono sikiriui man glak.

¹¹ Ang norokno mwthangna bagwi norok bai baksa khe tongo, hwnwi Subraiyung sa-o; norokno piring-poroi khlaimani a hani bororokno ang sokomorwi khibinai, phiya ba ang norokno sokomor glak, hwnwi Subraiyung sa-o, ang norokno sátok yaui yakar glak,

¹² Tamni hwn khe, Subraiyung hai hwnwi sa-o: Nini kwsarok tei ham phlai glak nini kwsa khe belai kirimasingcha.

¹³ Nini manjakma kókno sanai khoroksa phano tong glak, nini kwsani bagwi bithibo tong glak abórok tei habo ham glak.

¹⁴ Nono hamjaknairok bebakno nono pogwi tháng bai kha: Bórok nini bagwi mungsa nangjak li ya: Kena arino swprakma hai khe nono swprak kha, khá sitra ari hai khe nono sátok kha tamni hwn khe nini sumsok kwbángma, lekha bai man ya.

¹⁵ Nini bwkha bisingo nwng tamni kap? Nini samani tei ham glak, tamni hwn khe nini cha ya kwbángma, tei sumsok lekha bai li ya, aboni bagwino ang nono omo hai khlai-o.

¹⁶ Aboni bagwi nono monoknairok monokjak bainai, bebak nini arirok, khoroksa kwrwi tẃi khaui tlangjak bai anw, nono dera rwnairok bórok bo dera rwjak anw, nono romnairokno ang romnai.

¹⁷ Ang nini sakno ham rw phinai, nini kwsano ang ham rwnai, hwnwi Subraiyung sa-o. Tamni hwn khe bórok ano basijak hwnwi hwn lai kha; Siyonno khoroksa phano sak nangnai kwrwi! hwnwi Subraiyung sa-o.

¹⁸ Subraiyung hai hwnwi sa-o? Ang Jakobni núkhung khajak tongmano kiphilwi tubunai tei bini tongthairokno khairoknai, hathái’-ono kamiyung songcha phinai tei bini noyung hwn khe swkangni tongthai’-ono tong phinai.

¹⁹ Bórokni aroni hambai rwui rwchapmani bai tongthoknairokni khorang ongkhor anw. Ang bórokno kwbáng khe er rw anw tei bórok kisa wng tháng glak; ang bórokno bórom gwnang khlaiwi tisa anw, khoroksa bai phano bórok sak nang ya wngjak glak.

²⁰ Bórokni chwrairok swkangni salni hai wngnai tei bórokni bodolno ani bwskango songchanai; bórokno sátoknai bebakno’-no, ang majra rwnai.

²¹ Bórokni bisingni’-no khoroksa bokhorok wngnai, bórokni bisingni’-no bórokni tẃiphang bacha anw; ang bono samo tubu anw tei bo ani samo phai anw, hakhe sabo khá torwi ani samo phai raknai? hwnwi Subraiyung sa-o.

²² Norok ani borok wngnai, tei ang khe norokni Kaitor wngnai.

²³ Naisik di? Subraiyungni thamchi, a thamchi borok hamyarokni khorogo klainai.

²⁴ Subraiyung bini bwkha bisingo chapmarok samungo phnang bai ya sak bini kirimasingcha thamchi holiui tháng glak. Omono norok ulni salo saui man anw.