JIRIMIA 3 - Kok Borok (Re-edited) Bible (BSI)

Kók khna ya Israilrok

¹ “Tumungno khoroksa swk bini hikno kagwi rw khe a bwrwi bini aroni ongkhorwi thángwi tei kubun chwlani hik wngwi khe; kaknaisa tei uáisa a bwrwini aro kiphilwi da thángno? Omo hai khe a ha sumsok bai kupulung wng glak diba? Nwng kwbángma bwrwirok bai chásmai tong lai kha; nwng tei ani thani kiphilwi phainai da? hwnwi, Subraiyung sa-o.

² Kaham khe naisigwi nai di! Nwng hatháirogo thángwi sabo bai buro se thu ya tong kha? Nwng lama-o sikhok hai khe achugwi chásmaini bororokno naisingo; hapharo Arabni bororok naising tẃi khe naising kha. Nini buitali tongmung bai hano dera rw kha.

³ Aboni bagwi uatwi ua li ya tei masing sachlangni uatwi bo ua li ya, hai phano se nwng tabuk bo bwrwi sak phalnai hai khe tong kho; nwng katswi lachina rwng li ya.

⁴ “Nwng tabukno ano hai hwnwi ring glak da, ‘Apha nwng ani sikla jorani kiching ya de?

⁵ Bo ano joli máng de tong sinai? Páithak jora de khá hamya wngno?’ Nai di nwng omo hai sa kha, hai phano nwng samung hamya tangwi man sak’-no tang kha.”

Israil bai Juda bwkha ma kiphilnai

⁶ Subraiyung habugra Josiani jora-o ano hai hwnwi sa kha: “Poito kwrwi Israil tamo khlai kha nwng nuda nuk kha? Bo hathái matheno thángwi bebak buphang yaphango bahai khe aro uaijaui kha.”

⁷ Hakhe ang hai hwnwi uansuk kha, “Omo hai tongmungrok tong baiwi ani aro kiphilwi phai anw,” phiya bo kiphil li ya tei bini kók khna ya bukhuk Juda abo bebak nuk kha.

⁸ Bo nuk kha, sak motók tongnai a poito kwrwi khoroksa, Israilno, ang bono kaksen rwui ani oroni rohorwi rw kha; hai phano se bini kók khna ya bukhuk Juda kiri li ya, phiya bo’-bo thángwi abo haino uaijaui tongwi kha.

⁹ Tamni hwn ba bo bini sak motókmung tongmano laitete khe na kha, bo holongrok bai buphangrok bai uaijaui tongwi hano dera rw kha.

¹⁰ Hai phano omo hairokni bisingo bo bini kók khna ya bukhuk Juda khá rw súgwi ani thani kiphilwi phai ya, tamo khe phunukdrop se hwnwi Subraiyung sa-o.

¹¹ Subraiyung ano hai hwnwi sa kha, “Poito kwrwi Israilrok kók khna ya Judani slái sói hwnwi phunuk kha.”

¹² Bo ano hai hwnwi sa kha; tháng di Israilrokno hai hwnwi saui di, “Poito kwrwi Israilrok ani thani kiphil phai di. Ang khairokma gwnang tei joli glak; ang nono joli phlai máng tong glak.”

¹³ Norokni cha yano tei norokni Subraiyung Kaitorno kebengwi bachamano simi lon di. Norok ani dagima kókno norwi bebak buphang kwkhrang yaphangrogo thángwi buini mwtai-atairokno se hamjak kha, omono gosi di. Ang Subraiyung o kókno sa-o.

¹⁴ “Kók khna ya bororok kiphilwi phai di; Norok ani borok se. Ang kamiyung mareui khoroksa khe norokni bisingni tei núkhung mareui khoroknwi khe naharnai tei nono Siyon hathái-o tubunai.”

¹⁵ Ang norokno ani khásukni mera mwrwknaino rwnai, a borok norokno rwngmung tei simung bai chá rwnai.

¹⁶ A jora ang norokno er rw phuru khe bororok tei swmai bokhokni kókno tẃi sa glak. Aboni kókno tei muitu ton glak tei muitubo manjak glak, abo tei samungbo nang glak tei swbo snamjak phi glak.

¹⁷ Aphuru Jerusalem khe Kaitorni achukthayung hwnjaknai tei aro bebak dopharok kuthum lainai. Jerusalemo Subraiyungni bwskango kuthum lainai, bórok tei gwdna ragwi sak sakni hamya muchungma tẃi’-no khlai glak.

¹⁸ A salrogo Judani núkhung, Israilni núkhung bai thansa wng lainai tei bórok thansa khe salsibai hani phainai. Ang norokni chuchusongno rwmani ha kusung kusungni bagwi wngnai.

Kaitorni bororok takjak mwtaino khulummani

¹⁹ Ang khá chong kha, bahai khe ang norokno ani bwsarok bai pal khe tonnai, tei norokno tongthok ha kaisa, bebak dopharokni bisingo norokni manthairok belaino naithok, tei ang uansuk kha norok ano ani apha hwnwi ringnai tei kubunni bwkhak tháng yaui, ano’-no rwkthar lainai.

²⁰ O Israilni núkhung, bwsaini kók khna ya khoroksa bihik bwsaino kakma hai, norokbo abo haino ani kók khna li ya, hwnwi Kaitor sa-o.

²¹ Kuchuk saka-o khorang khna-o, Israil bwsarok khá khamwi koiwi kapmani, tamni hwn ba bórok bórokni lamano sitra rw kha, bórok bórokni Subraiyung Kaitorno pok kha:

²² O poito kwrwi bororok, kiphil di; ang norokni poitoni uslumano ham rw phinai. “Chwng nini aro phaiwi tongo: tamni hwn ba nwng se Subraiyung chini Kaitor.

²³ Kubui’-no hatháirogo chwng buini mwtairokno khulumui mungsa chubachu man li ya. Israilni bagwi chubachu Subraiyung chini Kaitorni aroni simi se phai-o.”

²⁴ “Phiya chini siklarok lachima kupulung joto manwi’-no monogwi pái kha, chini chuchusong tanglangmani, bórokni mal-mata tei mera bodol, bórokni bwsarok tei bwsajwksongno monok bai kha.

²⁵ Chwng o lachimasingcha wngmarokno sinai tei chini o lachimasingchani chwngno kholop si thung. Tamni hwn khe chwng Subraiyung Kaitorni thani sumsok khlai kha; tei chwng bini dagimarokno uáisa phano khna li ya.”