JIRIMIA 29 - Kok Borok (Re-edited) Bible (BSI)

Babilonni Judairokno Jirimiani kóktun

¹ O kókrok wng kha Jerusalemo tongwi Jirimia diyari Nebukadnejar Jerusalemni romwi tlangjaknairokni bisingo okrarokno, ochairokno, diyarirokno tei bebak bororokno kóktun swihorma kókrok.

² Omo khe habugra Jekonia tei Isirijwkma tei kerong tangphangrok, adongrok Juda bai Jerusalemni tẃiphangrok, buphangni manwi snam kwrwngrok tei sorrokni manwi snamnairok Jerusalemni kutulmani ulni kók.

³ Saphanni bwsajla Elasa tei Hilkiani bwsajla Gemariani yak tẃi khe o kóktun rohorjago, Judani habugra Jedekia bórokno’-no Babilonni habugra Nebukadnejarni thani rwi rohoro. Aro-o hai hwnwi swijak tongo;

⁴ “Ang Jerusalemni rom rwui Babilono rohormani bebak bororokno, Sengkrakrokni Subraiyung, Israilni Kaitor hai hwnwi sa-o;

⁵ norok nokrok tangwi a nokrogo tong lai di; bari okthai khlaiwi aroni bwtháirokno chá lai di.

⁶ Káijak lai di tei bwsa bwrwi bwsa chwlarok man lai di, nini chwla bai bwrwi bwsaroknobo bwsa manna tẃi khe kái-bórwi rw di. Omo hai khe norok kisa wng yaui kwbángma khe er anw.

⁷ Hakhe ang norokno khaui rohormani kamiyungrokni kaham khlaina nai di, norok aroni bagwi Subraiyungni thani suriui san di. Tamni hwnma le aroni hamkrai’-ono norokni hamkrai wngnai.

⁸ Sengkrakrokni Subraiyung, Israilni Kaitor hai hwnwi sa-o; norokni bisingo tongnai diyarirok tei chukhani kók sanairok norokno ta phemlok thung tei bórok imang nukmarokno norokno ta khna rw thung.”

⁹ Tamni hwnma le bórok ani mungwi norokni thani tatal kók diyari se sa-o; ang bórokno rohor ya hwnwi Subraiyung sa-o.

¹⁰ Babilon song nokha bisi snichi bugra chá bai khe se ang norokno nai phainai tei ani swmaino narwknai tei norokno oro kiphilwi tubunai hwnwi Subraiyung sa-o.

¹¹ Subraiyung hai hwnwi sa-o, ang norokni bagwi khlaina hwnwi chabwi tongmarok ang simi’-no saui mano, abórok norokni hamkraini bagwi, hamyani bagwi ya, a chapma bising tẃi norokni thinangni kók tei khatungma nang phai anw.

¹² Aphuru norok ano ringnai tei ani thani phaiwi suri sannai, hakhe ang norokni sanmano khnanai.

¹³ Norok ano naituk khe norok ano mannai; norok bwkha rw súgwi naituk khe mannai.

¹⁴ Ang norok bai manjaknai hwnwi Subraiyung sa-o, ang norokni talikhano kiphil rwnai, bebak dopharokni bisingni thumwi tubu anw tei norokno rwkhlai rohormani harokni tubu anw hwnwi Subraiyung sa-o tei ang norokno rwkhlai rwi rohorma a ha-o kiphilwi tubunai hwnwi Subraiyung sa-o.

¹⁵ Tamni hwn khe norok hai hwnwi sa lai kha, “Subraiyung Babilon ha-o chini bagwi diyarirokno tisa kha.”

¹⁶ Daudni achukthayungo achuknai habugrano, o kamiyungo tong bainai bebak bororokno tei norok bai baksa khaui tlangjak ya norokni sandai-masakrokno Subraiyung hai hwnwi sa-o:

¹⁷ Sengkrakrokni Subraiyung hai hwnwi sa-o; nai di ang bórokni thani seng, asari tei kirimasingcha bok rohornai, bórokno cháui man ya kosok khwichang bwthái hai khlainai.

¹⁸ Ang choba, asari tei kirimasingcha bokrokno rwkthar rw anw tei hayungni bebak harokno bórokno kirimung khlai anw tei bórokno rwkhlai rohorma ha-o bui bai swraijaknai, uanajaknai, naislerjaknai tei mwnwijaknai khlai anw.

¹⁹ Tamni hwn khe bórok ani kókrokno khunju kan li ya hwnwi Subraiyung sa-o tei ani seleng diyarirokno bórokni thani rohor máng tong phano bórok ani kók khna li ya, hwnwi Subraiyung sa-o.

²⁰ Aboni bagwi Jerusalemni Babilono khaui tlangjaknai norok bebakno Subraiyungni kókno khna di:

²¹ Ani mungwi tatal kók diyari sanai Kolaiani bwsajla Ahab tei Maseiani bwsajla Jedekiano sa di; sengkrakrokni Subraiyung Israilni Kaitor hai hwnwi sa-o: Nai di, ang bórokno Babilonni habugra Nebukadrejarni yago yapharwi rwnai, bo norokni mokol bwskango’-no bórokno buthar anw.

²² Babilono Judani bebak khaui tlangjaknairok bórokni a kókno muitu khlaiwi omo hai khe swrai lai anw. “Jedekia bai Ahabno Babilonni habugra hóro sókma hai khe nono bo Subraiyung hóro sók thung.”

²³ Tamni hwn ba, Israilni bisingo bórok belai samung hamya khlai kha, bórok nok arini buini bihiksong bai chásmai tong lai kha, ang sa di hwnwi dagi ya omo tẃi kókrokno ani mungwi bórok kók tatal sa kha. Ang abono saui mano tei sak baithang’-no nuknai hwnwi Subraiyung sa-o.

Semiani kóktun

²⁴ Nwng Nehelamni Semiano hai hwnwi sa anw;

²⁵ “Sengkrakrokni Subraiyung, Israilni Kaitor hai hwnwi sa-o; nwng Jerusalemo tong bainai bebak bororokni thani Maseiani bwsajla Japhania ochai tei bebak ochairokni thani nini mungwi hai hwnwi kóktunrok swihor kha;

²⁶ Subraiyung baithangno Jehoiada ochaini sakslái-o nono ochai snam kha, Subraiyungni nokni bebak kók diyari sanai koborrokni bagwi nono barja chong kha, bórokno totra-o sorni dwkhwi bai thongla-o khaui tonna nangnai.

²⁷ Hakhe tabuk norokno kók diyari sanai Anathotni Jirimiano tamo wngwi nwng kul ya wngnai ba?

²⁸ Bo chwngno Babilono kóktun kangsa rohorwi hai hwnwi sa hor kha, norok sal kwdwkma buini ha-o chobwi tonjak anw; aboni bagwi norok aro nok tangwi aro’-no tong bai di tei bari-okthai khlaiwi bini bwtháirok cháui tong lai di.”

²⁹ Japhania ochai a kóktunno Jirimia diyarino khna rwui pori kha.

³⁰ Hakhe Subraiyungni kók Jirimiani thani hai hwnwi sók phai kha:

³¹ Nwng bebak khaui tlangjaknairokno o kók saui rohor di, Nehelamni Semaiano hai hwnwi Subraiyung sa-o: Ang Semaiano rohor ya phano bo norokno kók diyari saui kók tatalno poito chá rw kha.

³² Aboni bagwi Subraiyung hai hwnwi sa-o: Nai di ang Nehelamni Semaia bai bini bosongno majra rwnai. Ang ani dophani kaham khlaina naimano nuk langnai bini bosongni khoroksa phano kwthang tong glak hwnwi Subraiyung sa-o, tamni hwn ba bo Subraiyungno kebengwi kók sa kha.