JIRIMIA 27 - Kok Borok (Re-edited) Bible (BSI)

Jirimia horbak balmani

¹ Judani habugra Josiani bwsajla Jedekia habugra chámani yaphang bwkhak Subraiyungni o kók Jirimiani thani phai sók phai kha.

² Subraiyung ano hai hwnwi sa kha: “Nwng muikurni buduk tei buphangni horbak snamwi nini gwdna-o boksaui na di.

³ Hakhe Jerusalemo Judani habugra Jedekiani thani phainai adongrokni yak tẃi Idomni habugrano, Moabni habugrano, Ammonni habugra, Turni habugra tei Sidonni habugrano kók kwcha rwui rohor di.

⁴ Bórokni habugrarokno sana bagwi bórokno hai hwnwi sa di; sengkrakrokni Subraiyung Israilni Kaitor hai hwnwi sa-o, omo norokni habugrarokno saui di.”

⁵ “Ang’-no omo, ani phan tei yak phologwi hano tei ha saka-o tongma borok tei mal-matarokno snamo tei ang rwna muchungma borokno’-no abono rw-o.”

⁶ Tabuk ang o harokno ani seleng Babilonni habugra Nebukadnejarni thani yapharwi rw kha; tei bolongni mal-matarokno suda ang bini seleng khati rwna bagwi yapharwi rw kha.

⁷ Bini hani jora sók phai ya sak, bebak dopharokno bini tei bini bwsajlani tei busukni seleng khatiui ma tongnai; ulo kwbángma dopharok tei habugra kotorrok bono bórokni seleng khati rwnai.

⁸ Tamo khe kaisa swk dopha phano Babilonni habugra Nebukadnejarno mon ya khe eba bini horbakni tola-o gwdna bera ya khe, hakhe ang a dophano hano choba bai, asari bai tei bok nang rwui bórokno bini yak bai sokomor bai yasakno sátoknai, hwnwi Subraiyung sa-o.

⁹ Aboni bagwino norok norokni diyarirokni, khuri-o togwi kók sanairokni, imangni kók sanairokni, yapha nainairokni, eba khe norokno kók mwlang sanairokni kókrokno poito ta chá di. Bórok norokno “Norok Babilonni habugrano monna ma nang glak,” hwnwi sa-o.

¹⁰ Tamni hwn ba bórok norokno ereng se kók diyari sa-o, hakhe abo bai norok norokni hani rwkhlai rohorjaknai; ang norokno rwkhlai rohornai phiya nwng ma komornai.

¹¹ Phiya ba Babilonni habugrani horbakno hornairok tei bini seleng wngnai dophano khe bórokni ha-ono tonnai tei bórok aro hukba-haba khlai tongwi manna tẃi khe tonnai, hwnwi Subraiyung sa-o.

¹² Ang Judani habugra Jedekiano swkangni haino hai kók rwui hai hwnwi sa kha; Babilonni habugrani horbakno norokni gwdna-o bera di tei bono tei bini borokno mon di, kwthang ma tong anw.

¹³ Babilonni habugrani seleng khati ya omo hai dophano khlaina hwnwi Subraiyung samani abo hai khe, tamo wngwi nwng tei nini bororok choba bai chacharara tei bok nangwi thwinai?

¹⁴ Babilonni habugrani seleng ta khati di hwnwi sanai diyarirokni kók ta khna di, tamni hwnma le bórok norokno tatal kók diyari se sa-o.

¹⁵ Subraiyung sa-o, ang bórokno rohor ya, bórok se ani mungwi norokno tatal kók diyari sa-o. Aboni bagwi norokno tei norokno kók diyari sanai diyarirokno ang rwkhlaiwi rohor anw hakhe jotono komorwi ma tháng bainai.

¹⁶ Aphuru ang ochairokno tei bebak o bororokno, Subraiyung hai hwnwi sa-o hwnwi sa kha; “Nai di, Subraiyungni noktharni manwirokno daktino Babilonni kiphilwi tubujaknai hwnwi kók diyari sanai diyarirokni kókno ta khna di, tamni hwn khe bórok norokno kók diyari samani abo tatal se.”

¹⁷ Bórokni kók ta khna di; Babilonni habugrani seleng khatiui tongwi kwthang tong di, hakhe tamni wngwi o kamiyungno khibijak bukcha wng rwnai?

¹⁸ Tumungno bórok kubui’-no diyari wng khe tei Subraiyungni kók bórokni thani tong khe hakhe Subraiyungni nogo Judani habugrani noyungo tei Jerusalemo tong rwk bainai kwthar manwirok Babilono tlang thángjak ya tẃi khe kwplaisa Subraiyungni thani koiwi sa thung.

¹⁹ Tamni hwn ba thonglarokno, twijlang khurirok, berajaknai yakungrokno tei kamiyungo tong rwk bainai kwthar manwirokno sengkrakrokni Subraiyung hai hwnwi sa-o,

²⁰ phiya Jehoiakimni bwsajla Judani habugra Jekonia tei Juda bai Jerusalemni bebak borok kotorrokno Babilonni habugra Nebukadnejar Jerusalemni tei Judani Babilono khaui tlang phuru tlangjak ya kwthar manwirokno tẃiwi Subraiyung hai hwnwi sa-o;

²¹ Subraiyungni nogo Judani habugrani nogo tei Jerusalemo khibiui klangjakma kwthar manwirokno tẃiwi Israilni Kaitor, Sengkrakrokni Subraiyung hai hwnwi sa-o,

²² bórok bebakno Babilono romwi tlangjak anw, ang naikol phi ya sak jora abórok aro’-no ma tongnai, hwnwi Subraiyung sa-o. Hakhe ulo ang abórokno aro’-no kiphilwi tubu phinai tei orono ton phainai.