JIRIMIA 26 - Kok Borok (Re-edited) Bible (BSI)

Jirimiano buj thumnani bagwi tubumani

¹ Judani habugra Josiani bwsajla Jehoiakim habugra wngwi tong phuruni yaphang bwkhak Subraiyung o kók sa kha;

² “Subraiyung hai hwnwi sa kha; Subraiyungni nokni nokhla-o bacha di, tei Judani bebak kamiyungrokni Subraiyungni nogo khulumna hwnwi phainai bororokno ang nono sa di hwnwi dagimarokno bórokno tháisa kar yaui saui khna rw di, kók tháisa phano sa yaui ta ton di.

³ Bórok o kókno khnaui phano mano tei bebakno bórokni samung hamyani kiphilwi bo phaimano. Hakhe bórokni samung hamyani bagwi ang bórokni saka hamya tubuna hwnwi bwkha chabwi tongmani abo tei tubu glak.

⁴ Nwng bórokno hai hwnwi sa di, ‘Ang Subraiyung hai hwnwi sa-o: Tumungno norok ani kók khna ya hwn khe, ang norokno rwmani raidano tẃi ya hwn khe,

⁵ tei tumungno ang ani seleng diyarirokno norokni thani nang súgwi rohorma kókrokno norok khna ya hwn khe, phiya khna ya phano,

⁶ hakhe ang o nokno Silo hai khlainai tei hani bebak dopharokni khugo o kamiyungno swraimung khlainai.’ ”

⁷ Subraiyungni nogo Jirimia o kók samano ochairok, diyarirok tei bebak bororok khna bai kha.

⁸ Jirimia Subraiyungni dagima tẃi bebak bororokno a kók sa bai kheno, ochairok, diyarirok tei bebak bororok bono romwi hai hwnwi sa kha, “Nwng ma se ma thwinai!

⁹ Tamni bagwi Subraiyungni mung bai o nok Silo hai wngnai tei o nok khibijak bukcha, borok tongnai kwrwi wngnai hwnwi nwng kók diyari sa?” Hakhe bororok Subraiyungni nogo Jirimiano kuthumui rom lai kha.

¹⁰ Judani habugrani tangphangrok o kókno khnaui noyungni bachaui Subraiyungni nogo phai lai kha tei Subraiyungni nokni kwtal duglamni hapjaknai o achuk lai kha.

¹¹ Hakhe ochairok tei diyarirok habugrani tangphangrok tei bebak bororok hai hwnwi sa kha, “O borok butharjaknani nango tamni hwn ba bo chini kamiyungni bagwi kók diyari sa kha, abo norok khunju baithangno khna bai kha.”

¹² Aphuru Jirimia habugrani bebak tangphang tei bebak bororokno hai hwnwi sa kha, “O nok tei kamiyungrokni bagwi kók diyari sajakmani norok khna kha, abórokno sanani bagwino Subraiyung ano rohoro.”

¹³ Aboni bagwi tabuk norok norokni himma lama tei samungrokno kwtal khe khlai phi di tei Subraiyung norokni Kaitorni kókno khna di, hakhe norokni Subraiyung hamya tubuna hwnwi sakhlaimano tẃi khá kiphilwi mwthagwi mano.

¹⁴ Nai di, ang le norokni yapha’-ono, hakhe norok chajakma tẃi’-no ano khlai di.

¹⁵ Hakhe omono kubui khe saui man di. Tumungno norok ano buthar khe, o borok kahamno butharmani majra norokni saka-o tei o kamiyungni saka-o tei oro tong bainairokni saka-o klainai, tamni hwn khe kubui kókno norokno sana bagwi se Subraiyung ano rohoro.

¹⁶ Aphuru habugrani tangphangrok tei bebak bororok, ochairok bai diyarirokno hai hwnwi sa kha, “O borok Subraiyung chini Kaitorni mung bai se chini thani o kók sa phai-o aboni bagwi bo butharjaknani kók ya.”

¹⁷ Aphuru-o okra-chakrarokni bisingni khoroksa khoroknwi bachaui kuthumjak bororokno hai hwnwi sa kha,

¹⁸ Kwplaisa Subraiyung bai sajagwi Judani habugra Hejekiani molo Moresetni diyari Mika Judani bororokno kók diyari sa kha. Siyon haphar haino chuaijaknai, Jerusalem sokomorjagwi burung khe klai tongnai tei noktharni hathái bolong khanai.

¹⁹ “Judani habugra Hejekia tei bebak Judani bororok bono tamo buda buthar kha? Bo khe tamo Subraiyungno kiri ya da? Tei bini khairokma san ya da? Abo bai bororokni saka-o hamya rohorna hwnwi Subraiyung samani abo tei rohorjak li ya wng kha. Phiya chwng chini saka-o kaisa belai kirimasingcha tei belai hamya se ringwi tubuma klainai.”

²⁰ Subraiyungni mungwi kók diyari sanai aro tei khoroksa borok tongo, bo wng kha Kiriatjearimo tongnai Semaiani bwsajla Uria. Bo Jirimia haino o kamiyungno tẃiwi tei o hani bagwi kók diyari sa kha.

²¹ Bugra Jehoiakim tei bini bebak sengkrak tei tangphangrok bini kókno khna kheno habugra bono butharwi khibina naituk lai kha; tamo khe Uria a kókno khna kheno kirijagwi Ijibo khárwi tháng kha.

²² Hakhe habugra Jehoiakim Akborni bwsajla Elnathanno tei bo bai khe khoroknwi khoroktham borokno Ijibo rwi rohor kha.

²³ Tei bórok Uriano Ijipni kariui tubu kha tei habugra Jehoiakimni thani tlang kha, habugra bono seng bai butharwi pái kha tei kosong bororokno phobmani simalwngo’-no phob kha.

²⁴ Tamo khe Saphanni bwsajla Ahikam Jirimiani bwkhak bacha kha aboni bagwi Jirimiano butharna bagwi bororokni yapha-o yapharwi rwjak li ya