JIRIMIA 25 - Kok Borok (Re-edited) Bible (BSI)

Salsibaini ari

¹ Josiani bwsajla Judani habugra Jehoiakim habugra wngmani nokha bisik brwi-o (abo wng kha Babilonni habugra Nebukadrejar bugra wng gramani bisi) Judani bebak bororokni bagwi Jirimiani thani kók sajak kha

² o kókno’-no Jirimia diyari Judani bebak bororok tei Jerusalemo tong bainairokno sa-o;

³ Amonni bwsajla Josia Judani habugra wngmani nokha bisi chithamni simi tini jora-o nokha bisik nwichitham romwi Subraiyungni kók ani thani sajak kha tei ang abono norokni thani thak yaui sa máng tong kha, hai phano norok ani kókno khna li ya.

⁴ Subraiyung bini bebak diyari selengrokno norokni thani rohor máng tong phano bini kókno norok khna li ya tei khnana bagwi khunju bo kái li ya,

⁵ Bórok norokno norokni bebak sak sakni lama hamyani tei samung hamyani kiphilwi phai di hwnwi sa kha, hakhe se norokno tei norokni chuchusongno swkango Subraiyung rwmani ha-o norok mol brúm brúm tongwi mannai.

⁶ Kubun mwtairokno monnani tei khulumna bagwi bórokno ta rwkthar di, eba norokni yak bai snamjak manwi bai ano ta joli rw di. Hakhe ang norokno mungsa hamya khlai glak.

⁷ Hai phano norok ani kók khna li ya hwnwi Subraiyung sa-o, abono karwi norokni yak bai snamjak manwirok ano joli rw kha tei norokni hamya se ringwi tubu si-o.

⁸ Aboni bagwi sengkrakrokni Subraiyung hai hwnwi sa-o: Norok ani kókno khna li yani bagwi,

⁹ nai di ang salsibaini bebak dopharokno tei ani seleng Babilonni habugra Nebukadrejarno tubunai, hwnwi Subraiyung sa-o. O ha tei oro tong bainairokni bagwi tei bórokno kitingjak bebak dopharokno kebengwi bórokno tubunai. Ang bórokno sokomor súgwi khibinai tei kirimasingcha, mwnwimung tei mung hamya sajagwi máng tong phlainai.

¹⁰ Ang bórokni aroni naithokrokni khorangrokno, tongthok cháthokni khorangno, chamari kwtalni khorang, hamjwk kwtalni khorang, rwsam-romoni khorang tei chatini pohorno swkwmaui rwnai.

¹¹ Bebak ha bai klaijak tei bukcha khe klaijak wngnai tei o dopharok nokha bisisnichi Babilonni habugrani seleng wngwi ma tongnai.

¹² Phiya nokha bisi snichi káma ulo ang Babilonni habugra tei bini dophano, Kolodiani hano bórokni samung hamyani bagwi majra rwnai tei bórokni hano kusung kusungni bagwi khibijak khlainai hwnwi Subraiyung sa-o.

¹³ “Ang a harokni bagwi kók samarok bebakno o bijabo swijak tongo, bebak dopharokni bagwi Jirimia kók diyari samani kókrokno ang o ha-o nang rwnai.

¹⁴ Tamni hwn ba kwbángma dopharok tei habugra kotorrok bórokno seleng snamnai tei bórok bebak samung hamya khlaima haino bórok yak baithang tangma tẃi’-no bórokno ang yagul sunai.”

Dopharokno Kaitor buj thummani

¹⁵ Subraiyung Israilni Kaitor ano o kók sa kha, “Ani yakni o thamchi kupulung arak khurino yachak di tei ang nono rohormani a dopharokno omono khan di.

¹⁶ Bórok abono nungwi klai-kithik wngwi tongnai tei ang bórokni thani seng rohorma bai bórok kobor chanai.”

¹⁷ Hakhe ang Subraiyungni yakni khuri na kha tei Subraiyung rohormani dopharokno abono khan kha.

¹⁸ Jerusalem tei Judani kamiyungrok bini bugrarok tei habugrani tẃiphangrokno bórok bukcha khlainani swbainani, bui bai mwnwijaknai tei swraimung nangjak khlaina bagwi ang tabuk jora bórokno khlai kha.

¹⁹ Ijipni habugra Pharao bini selengrok, tangphangrok bai bini bebak bororokno

²⁰ tei aro o tongnai bebak kubun hani bororok, Uj hani bebak bugrarokno Philistiani bebak bugrarok Askelon, Gaja, Ekron tei Asdodni tong rwk bainairokno.

²¹ Idom, Moab tei Ammonsarokno;

²² Tur tei Sidonni bebak bugrarokno twijlang ayang narni, twi rukung hani bugrarok.

²³ Dedan, Tema, Bujni bororok, tei bokhorok silnai bororok;

²⁴ Arabni bebak bugrarokno tei hasing hapharo tongnai kubun dopharok bai gwdaljak bosongrok;

²⁵ Simrini bebak habugrarok Elamni bebak habugrarok Mediani bebak habugrarok.

²⁶ Salsibaini sampha tei hakchalni bebak habugrarok, khoroksani ulo tei khoroksa khe tei ha saka tong bainai hani bebak ha tei ha thwgwini habugrabo abono nungnai, tei bebakni yagulo khe Babilonni habugra nungnai.

²⁷ “Hakhe nwng bórokno sengkrakrokni Subraiyung Israilrokni Kaitor hai hwnwi sa di hwnwi sa-o. Nung di, phek di, kwba di, klai khe tei ta bacha di, tamni hwn khe ang norokni thani choba tubu-ui tongo.”

²⁸ Phiya tumungno bórok nini yakni khuri naui nungna soi ya khe hakhe bórokno hai hwnwi sa di, “Sengkrakrokni Subraiyung hai hwnwi sa-o, norok ma se ma nungnai!

²⁹ Nai di ani mungwi ringjaknai kamiyungo se ang háyá khlainani samung chengwi rw kha tei nwng khe majra ma chánani yók anw hai da? Norok majra rwjak yaui yógwi thángwi man glak, tamni hwnma le ha sakani bebak dopharokni thani ang choba dagiui rw kha hwnwi sengkrakrokni Subraiyung sa-o.”

³⁰ Aboni bagwi nwng o bebak kókrokno bórokni bagwi kók diyari sakhlai di tei bórokno hai hwnwi sa di: “Subraiyung kuchukni simi chirikhóknai, tei bini kwthar tongthaini bini khorang khna rwnai; bini merani bagwi khorang kotor khe sokromnai, tei chirikhóknai angur pherema hai khe ha saka-o tong bainai bebakni bagwi bo chirikhóknai.

³¹ Hani páithak jora chiri-mokorokni khorang yamrok yachak anw, tamni hwn khe dopharokni bagwi Subraiyungni kók cha ya berjaknai tongo; bo bebak bahan-bwthẃi gwnangrokno majra rwnani phai-o tei borok hamyarokno khe seng bai butharnai hwnwi Subraiyung sa-o;”

³² “Sengkrakrokni Subraiyung hai hwnwi sa-o: Nai di, kaisa dophani tei kaisa dopha-o hamya thángwi tongo tei hani páithakni simi nokbar kotor phaiwi tongo”

³³ “A salo Subraiyung bai butharjaknairok ha yaphangni simi páithak jora kwrwngnai. Bórokni bagwi khoroksa bo kapnai tong glak, bórokno khobo khochajak glak, eba phobnaibo tong glak; phiya bórok o ha saka-o khi hai klai tong sinai.”

³⁴ Mera mwrwknairok, norok kha nangwi chirikhógwi kap di; mera gutni tẃiphangrok, norok thapla-o goirok lai di, tamni hwn khe norokni butharjaknani jora sók phai kha tei norok saijak punrok hai khe ma thwinai.

³⁵ “Mera mwrwknairokni bagwi kwrẃngsa phano huijakthai tong glak, eba mera gutni tẃiphangrokbo kwrẃngsa-o bo yók glak.

³⁶ Mera mwrwknairokni kapmani bai mera gutni tẃiphangrokni bwkha nangwi kapmani khna di! tamni hwn ba bórokni sulano Subraiyung hamya khlai rwnai.

³⁷ Hakhe naithok sularok Subraiyungni kirimasingcha thamchi bai khampronai.

³⁸ Singho hai khe bo bini tongthai yakarnai, choba tei bini kirimasingcha sátokmung tei bini thamchini bagwi bórokni kwchang kwchang bodolrok bukcha wng kha.”