JIRIMIA 24 - Kok Borok (Re-edited) Bible (BSI)

Topongnwi khwichang bwthái

¹ Babilonni habugra Nebukadrejar Jehoiakimni bwsajla Judani habugra Jekonia tei Judani bugrani tangphangrok tang kwrwngrok, tak kwrwngrokno Jerusalemni Babilono romwi tlangma ulo Subraiyungni ano mwrang kaisa phunuk kha; nokthar bwskango topong khungnwi khwichang bwthái berajak khe ano phunuk kha.

² Topong khungsa khe tháiskangni bwthái munjak kaham kuk khwichang bwthái tei khungsa topong khe belai hamya khwichang bwthái tongo abono bororokbo cháui man ya.

³ Hakhe Subraiyung ano hai hwnwi sẃng kha, “Jirimia nwng tamo nuk kha?” Ang hai hwnwi sa kha “Khwichang bwtháirok bwthái kahamrok hwn khe belai kaham, hamyarok hwn khe belaino hamya. Abono cháui suda man ya.”

⁴ Hakhe Subraiyungni kók ani thani sók phai kha;

⁵ “Israilni Kaitor Subraiyung hai hwnwi sa-o; Judani romwi tlangjak bororokno ang oroni Babilonsongni ha-o rohor kha, bórokno ang o bwthái kaham khwichang haino romwi nanai.

⁶ Ang bórokni kusung kusungni bagwi bórokno mokol kaiwi tongnai tei o ha-o bórokno kiphilwi tubunai. Ang bórokno snamwi tisanai tei swbaiwi khibi glak. Ang bórokno káinai tei phuichaui khibi glak.”

⁷ Ang bórokno ang’-no Subraiyung hwnwi saui mannani bagwi bwkha rwnai; tei bórok ani borok wngnai tei ang bórokni Kaitor wngnai, tamni hwn ba kha bai khúk bai’-no bórok ani thani kiphilwi phainai.

⁸ “Tamo khe, Judani habugra Jedekiano, bini bokhorokrokno, Jerusalemni o ha-o yógwi tong rwknairokno, Ijip ha-o tongnairokno a khwichang bwthái hamya cháui man ya hai khlainai hwnwi Subraiyung sa-o.”

⁹ Ang bórokno ha gwnangwini bwskango kirimasingcha, lachimasingcha khlainai tei ang riphrigwi rohorma ha-o bórokno selengmasingcha mwnwi kothok tei swraimung nangjaknai khlainai.

¹⁰ Ang bórokno tei bórokni chuchusongno rwmani hani bórok komorwi tháng ya sak bórokni thani seng, asari tei kutung kwsa rohornai.