JIRIMIA 23 - Kok Borok (Re-edited) Bible (BSI)

Thinangni bagwi khatungmani

¹ “Ani Sulani merarokno butharnai tei oroi-poroi khlainai mera mwrwknairok bati nang thung!” hwnwi Subraiyung sa-o.

² Aboni bagwi Subraiyung Israilni Kaitor ani bororokno mwrwknai mera mwrwknairokno o kók sa-o, “Norok ani merarokno oroi-poroi khlai kha tei bórokno rwkhlaiwi rohor kha tei bórokno tẃidul li ya. Norok samung hamya khlaimani bagwi ang norokno yagul sú anw, hwnwi Subraiyung sa-o.

³ Ang kwthang tong rwknai ani merarokno rwkhlaiwi rohorma bebak hani thumnai tei bórokni bodolo kiphilwi tubu anw, aro’-no bórok bwthái wngnai tei er anw.”

⁴ Ang bórokni bagwi khoroksa mera mwrwknai bacha rw anw, bórok tei kibo kiri glak bwkhabo báijak glak tei mera masa phano kwmauibo tháng glak, hwnwi Subraiyung sa-o.

⁵ Nai di, omo hai salrok phaiwi tongo aphuru ang Daudni bosongo sói khoroksano tisanai. Bo habugra wngwi simung bai khe hano naikol anw. Ha-o sói khe buj thumwi tei kaham khe samung tang anw.

⁶ Bini jora-o Judarok mwthangjak anw tei Israilrok kirima kwrwi khe tong anw. Tei bini bumung hai hwnwi ringjaknai “Subraiyung chini Sói kubui.”

⁷ “Aboni bagwi nai di, omo hai salrok phaiwi tongo hwnwi Subraiyung sa-o, aphuru bororok tei Israil dophano Ijipni kariui tubunai kwthang Kaitorni kókno tei sa glak.

⁸ Tamo khe kwthang Subraiyung salsibai hani Israil núkhungni bosongrokno tikhlai tubu-ui phainai tei naikolnai tei bebak ha-o rwkhlai rohorma harokni tubu-ui phai kha, phiya bórok sakni ha-o tong lainai.”

Diyarirokno tẃiwi Jirimia kók samani

⁹ Diyarirokno tẃiwi samani khe: Ani bwkha bái kha, ani bebak bekreng kwlwi kha; Subraiyung tei bini kók kwtharrokni bagwi ang chuak kephek hai wng kha tei chuak bai koboljak hai wng kha.

¹⁰ Tamni hwn khe, ha chwla-bwrwi uaijanairok bai kupulung wng kha. Swraimungni bagwi ha bwkha khamwi tong kha. Hasing hapharni sularok ransaui tháng bai kha. Bororok himma lamabo hamya, bórokni phan bo kubui ya.

¹¹ Tamni hwn khe diyari tei ochairokbo Kaitor bai kwrwng ya; ani nogo bo bórokno samung hamya khlaima nuk kha, hwnwi Subraiyung sa-o.

¹² Aboni bagwi bórokni lama rimi tei mwnak, a lama’-ono bórok tẃitherjaknai tei klainai; bórokno majra rwma bisi-o ang bórokni saka-o hamya khiklainai, hwnwi Subraiyung sa-o.

¹³ Samariani diyarisongrokni bisingo ang kaisa hamya nuk kha; bórok Bal mwtaini mung bai kók diyari sa-o, tei ani borok Israilrokno lama koró rwui tlango.

¹⁴ “Phiya Jerusalemni diyarirokni bisingo, ang teibo selengmasingcha samung hamya khlaima nuk kha: Bórok chwla-bwrwi uaijanai wngo tei tatal sa lai-o; khoroksa phano samung hamyani kiphilwi phai man ya tẃi khe samung hamya khlainairokno bórok phan rw-o; bórok bebakno ani thani Sodom hai tei aro tong bainairok khe Gomora hai wng bai kha.”

¹⁵ “Aboni bagwi sengkrakrokni Subraiyung diyarirokno hai hwnwi sa-o: “Nai di ang bórokno kwkha dalwi chá rwnai bis daljak twi khan rwnai; tamni hwn khe Jerusalemni diyarirokni aroni’-no ha gwnangwi samung hamya pírjago.”

¹⁶ Sengkrakrokni Subraiyung hai hwnwi sa-o; “Norokni thani kók diyari sanairokni kókno norok khunju ta kan di, bórok norokno tatal khe khatung rw-o. Bórok bórokni bwkhani nukma mwrangrokno se sa-o, Subraiyungni khukni khnaui samani ya.”

¹⁷ Subraiyungni kókno sak nang ya wngnairokno bórok hai hwnwi sa máng tongo, “Norokni kaham wngnai” tei bebak kók khna yaui sak sakni uansuk tẃi himnairokno khe, “Norokni mungsa hamya wng glak,” hwnwi bórok sa-o.

¹⁸ Phiya bórokni bisingo sabo Subraiyungni kókbiti-o bachaui tong, bo naima tẃi tei bini kók khnana nainairok eba khnanairok sabo tong?

¹⁹ Nai di, Subraiyungni nokbar kotor! Nokbar kotor hai wngwi jolimani nongkhor kha; abo borok hamyani bokhorok saka-o thángwi pekhagwi anw.

²⁰ Subraiyung bini bwkha muchungmano samungno khlai bai ya sak bini thamchi kiphilwi tháng glak, páithakni salo norok abono srai-srai khe saui man anw.

²¹ Ang a diyarirokno rohor ya hai phano bórok khár kha; ang bórokno mungsa kók sa ya hai phano bórok kók diyari sa kha.

²² Tumungno bórok ani kókbiti-o bacha phai khe, hakhe ani bororokno ani kókrokno pír kha mun, bórok bórokni lam hamyani kiphil kha mun tei samung hamyarok tangmani kiphil kha mun.

²³ “Ang khe tamo samo tongnairokni bagwi simi da Kaitor, hakchalo tongnairokni khe Kaitor ya diba?”

²⁴ Sabo se huijakthairogo huijagwi ani mokolo klai ya khe tongwi mannai? hwnwi Subraiyung sa-o. “Ang o nokha bai ha bai kupulung ya diba?” hwnwi Subraiyung sa-o.

²⁵ Ani mungwi tatal kók diyari sanai diyarirok samano ang khna kha. Bórok ang imang nuk kha, ang imang nuk kha hwnwi sa-o!

²⁶ Tatal kók diyari sanai diyarirokni bwkha bisingni tatal kók diyarirok bórokni bwkha-o tei sal bwswk ton sinai?

²⁷ Bórokni chuchusong Bal mwtaino khulumui ano pokma hai bórokni imangni kókrok sa laiwi ani bororokno ani mungno pok rwna hwnwi bórok uansugo hai ya da?

²⁸ Imang nuknai diyari bo imangni kókno imang hwnwi’-no sa thung tei ani kók khnanai diyari bo kubui khe ani kókno’-no sa thung. Tamni hwn khe maichlam bai chwkap ba buro gwdalnai ba? hwnwi Subraiyung sa-o.

²⁹ Ani kók khe tamo hór hai ya da tei holong sukhrupnai sorni mukur hai ya da? hwnwi Subraiyung sa-o.

³⁰ Aboni bagwi Subraiyung sa-o, nai di, ang khoroksa tei khoroksani khukni ani kókno khoknai diyarirokno kebengo.

³¹ Nai di, ang sak sakni khukni kókno “Subraiyung sa-o,” hwnwi sanairokno kebengo.

³² Nai di, ang tatal imangni kók sanai diyarirokno kebengo, bórok tatal tei kók kotor saui ani bororokno lama koró rw-o, yang khe ang bórokno robo rohor ya thángna bagwibo chong ya; aboni bagwino bórok o bororokni mungsa swk hamari phano tubu-ui man ya, hwnwi Subraiyung sa-o.

Subraiyungni poja

³³ O bororok eba diyari phano eba khe ochai phano nono, “Subraiyungni aroni chini banta bubo tẃi kókrok sakhlaijaknairok tong?” hwnwi sẃng khe aphuru nwng bórokno hai hwnwi sa di, “Norok Subraiyungni thani hilikma rujujaknai wng kha, hakhe ang norokno yakarwi khiklai rw sinai,” hwnwi Subraiyung sa-o.

³⁴ “Tumungno khoroksa swk diyari eba ochai eba kubun khoroksa swk ‘Omono Subraiyungni rujujaknai,’ hwnwi sa khe, hakhe ang a borok tei bini núkhungno majra rwnai.”

³⁵ Aboni bagwi norok sak sakni nok arini borokno takhuk takhukno, “Subraiyung tamo uphilwi sa phi kha?” Eba “Subraiyung tamo sa kha?” hwnwi sẃngnai.

³⁶ Phiya ba ‘Subraiyungni rujujaknai’ o kókno norok tei ta khursa si di, tamni hwn khe bororokni baithangni kók se bórokni rujumung, tei norok Kaitorni kwthang kókrokno dera rw-o, hwnwi sengkrakrokni Subraiyung chini Kaitor sa-o.

³⁷ Subraiyung nono tamo sakhlai kha, eba khe Subraiyung nono tamo sa kha hwnwi norok diyarino sẃng di.

³⁸ Phiya tumungno nwng “Subraiyungni poja” hwnwi sa khe, Subraiyung hai hwnwi sa-o: “Subraiyungni poja” hwnwi ta sa di hwnwi ang nono rohorma se nwng “Subraiyungni poja,” hwnwi sa kha.

³⁹ Aboni bagwi ang norokno phuichaui ani bwskangni nono tei nini chuchusongno rwmani a kamiyungni rwkhlaiwi rohornai.

⁴⁰ Hakhe ang norokni saka-o kusung kusungni bagwi mung hamya khlainai tei abo pogwi man ya lachimung wngnai.