JIRIMIA 22 - Kok Borok (Re-edited) Bible (BSI)

Jirimia Judani noyungni bororokno kók samani

¹ Subraiyung hai hwnwi sa-o: “Nwng Judani bugrani noyungo tokhlai thángwi aro o kókno saui di,

² tei hai hwnwi sa di, Daudni achukthayungo achukjak o Judani bugra, nwng nini selengrokno tei o duglam tẃi hapnai nini bororokno o kókno sa di.”

³ Subraiyung hai hwnwi sa-o, bujsói khe tẃi di tei kahamno khlai di tei sátogwi kusupnairokni yakni bono phiyók di. Kubun hani borokno ma-pha kwrwi chwrairokno tei randijwkrokno samung cha ya tei tekto ta rw di eba khe borok kosongrokni thẃi oro ta kochok rw di.

⁴ Tumungno norok ani kókno khna kha hwn khe, hakhe Daudni achukthayungo achuknai bugrarok bórokni selengrok bai tei bórokni bororok korai malkhungo khe tei korai-o kaui o noyungo nokni duglam tẃi hap phai anw.

⁵ Phiya ba tumungno norok ani kókrokno khna ya khe, ang Subraiyung baithang swmai tangwi hai hwnwi sa-o, o nok bukcha wngwi tháng anw.

⁶ Judani bugrani noyungrokno tẃiwi Subraiyung hai hwnwi sa-o: “Nwng ani thani Giliad tei Lebanonni hachuk hai phano ang nono hasing haphar eba khe borok kwrwi kamiyung hai se khlai suknai.”

⁷ Ang sokomornairokno, bórokni yago da-sengrok rwui nono sokomorna bagwi tiyar khe rwhornai. Bórok nini hamjakma sidar buphangrokno tannai tei hóro khiklaiwi rwnai.

⁸ “Dopha kwbángma’-no o kamiyung gana tẃi láiwi tháng lai anw tei bebak bororokno bini nok arini borokno, ‘Subraiyung tamo wngwi o kamiyung kotorno omo hai khlai lang?’ hwnwi sa lai anw.”

⁹ Aphuru bórok hai hwnwi sa anw, “Tamni hwn ba bórok bórokni Kaitor Subraiyungni swmaino yakarwi kubun mwtairokno khulum lai kha tei bórokno mon kha.”

Joahasno tẃiwi Jirimia kók samani

¹⁰ Norok kwthwi bororokni bagwi ta kap di, bini bagwi khá hamyabo ta wng di; tamo khe hakchalo thángnaini bagwi se khá nangwi kap di, tamni hwnma le bo bini achaima ha-o kiphilwi phaiwi nuk phir glak.

¹¹ Judani bugra Josiani bwsla Salum, bo buphani sak slái-o bugra chá kha tei bo oroni thángwi pái kha.

¹² Aboni bagwino Subraiyung hai hwnwi sa-o; “Bo oro tei kiphil phi glak, tamo khe bórok bono romwi tlangjakma ha-ono bo thwi anw, bo o hano tei nuk phir glak.”

Jehoiakimno tẃiwi Jirimia kók samani

¹³ Lama sitra tẃi nok tangnai tei lam cha ya bai nok kuchuk tangnai bo bati nang thung; tei bini nok arini bororokno mungsa rw yaui samung khlai rwnai tei mulani manthai rw ya borok bo bati nang thung;

¹⁴ “Ang ani bagwi nok kotor khungsa, saka-o kuar khotolrok gwnang khe tang anw tei kotor kotor tailamrok aro rw anw, tei sidar buphang bai abono khopnai tei abono bumul kwchak bai sil bai anw.

¹⁵ Kwbángma sidar buphang tongma bai nwng habugra wng kha hwnwi da uansuk? Nwpha khe tamo chábo chá lang li ya nubo nung lang ya diba, sói tei kubui samungrok khlai lang ya diba? Aboni bagwi bini jora belai kaham kheno lái kha.

¹⁶ Bo bigra tei biyalo klaijakrokno sói khe nai kha; aboni bagwi bini jorarok kaham kwrwng khe lái kha. Omono ang saui manthai klai ya diba? hwnwi Subraiyung sa-o.

¹⁷ Tamo khe nini mokol bai bwkha khe sakni bagwi cha ya lama tẃi mannani, borok kosongrokno thẃi khiklaiwi, kusubwi tei uálaiwi buinino manna simi se.”

¹⁸ Aboni bagwino Judani habugra Josiani bwsajla Jehoiakimni bahai wngno abono Subraiyung hai hwnwi sa-o: “Bórok bini bagwi ‘o ani takhuk’ eba ‘o ani bukhuk’ hwnwi kap glak! Bórok bini bagwi o Subraiyung eba o bini chẃngsacha hwnwi bo kap glak!”

¹⁹ Bo koraichirka bai baksa khe phobjak anw. Bono sopreui Jerusalemni duglamni phataro khibiui rohorjak anw.

Jerusalem tamo manjaknai abono Jirimia samani

²⁰ Nwng Lebanonno kasaui thángwi chirikhók di, nini khorang Basano khna thung; Abarimni simi chirikhók di tamni hwnma le nono hamjaknairok bebakno sokomorjak bai kha.

²¹ Ang nono nwng chá gwnang-nung gwnang phuru kók sa kha, hai phano nwng “Ang khna ya” hwnwi sa kha, chwrai phuruni simi’-no nini tongmung omo hai, nwng ani kók khna ya.

²² Nokbar nini mera mwrwknairokno kobonwi tlang bai anw tei nono hamjaknairok khajagwi tlangjak bai anw; aphuru nwng nini bebak samung hamyarokni bagwi lachimasingcha wng anw tei cha ya manjak anw.

²³ “O Lebanono tong bainairok sidar bwlwngo nok tangnairok bwrwi sak kengna phuru ok sajakma hai tekto manjak phuru norok belai kengaiwi chirikhók anw!”

Kaitor Jehoiachinno buj thummani

²⁴ Subraiyung hai hwnwi sa-o: Ang kubui se sa-o, Konia Judani habugra Jehoiakimni bwsajla ani yagra yakni tokmari yasitem hai wng phano ang nono sokogwi khibiui rwnai.

²⁵ Nono butharna bagwi naituknai tei nwng kirimani Babilonni habugra Nebukadrejarni yago tei Kolodiasongni yago nono yapharwi rw anw.

²⁶ Ang nono tei nono bánai nwmano kubun ha-o khitarwi rohor anw, a ha norok achaima ha ya, aro’-no norok thwi bai anw.

²⁷ Tamo khe bórok kiphilwi phaina muchungma a ha-o tei kiphilwi phaiwi man glak.

²⁸ Omo a norjak borok Konia da, dáma kwbai hai, khoroksa bai phano samung nangjak ya? Bo tei bini bwsarok tamo wngwi bórokno sini ya ha-o khitarwi rohorjak kha de?

²⁹ O ha, ha, ha, Subraiyungni kókno khna di!

³⁰ Subraiyung hai hwnwi sa-o: “Nwng o borokni bwsarok kwrwi hwnwi swiwi narwk di, bini thangsungo mungsa samung cha glak, tamni hwnma le bini bosongni bisingo khoroksa phano tei Daudni achukthayungo achugwi man glak tei Juda ha-o bo bugra chá phirwi man glak.”