JIRIMIA 21 - Kok Borok (Re-edited) Bible (BSI)

Jerusalem mechenjaknani kók diyari sajakma

¹ Subraiyungni o kók Jirimiani thani phaiwi sók phai khe, habugra Jedekia Malakiani bwsajla Pasur tei Maseiani bwsla Japhania ochaino Jirimiani thani kók sauina bagwi rohor kha,

² “Babilonni habugra Nebukadrejar chwng bai choba khlainani tiyar wngwi tongo. Aboni bagwino nwng chini wngwi Subraiyungni thani san di. Bono chini aroni rosaui tlangnani bagwi. Subraiyung swkango uanamasingcha samung khlaima hai tabuk bo khlai phirna phano tongo.”

³ Aphuru khe Jirimia bórokno hai hwnwi sa kha:

⁴ Norok Jedekiano hai hwnwi sa di: Israilni Kaitor ahai hwnwi sa-o: Babilonni habugra tei Babilonsarokni yakni nwng sakno katina bagwi nini yago chobani aitalrok tong phano tei bórok nono kitingwi chokdeualni phataro tong phano bórok norokno mechen phainai. Hakhe ang bórokno daktino norokni kamiyung kwcharno bórokni yapha-o rwnai.

⁵ Ang sakphang ani phankrak yak bai kosonwi belai khe thamchi kaui joliui nono kebengwi choba khlai anw.

⁶ Ang o kamiyungo tong bainai borok tei yabrwirokno kosonwi swpraknai; bórok bok kotor nangwi thwi bainai.

⁷ Aboni yagulo khe, Subraiyung hai hwnwi sa-o, abo ulo ang Judani habugra Jedekia tei bini selengrok tei bok kotorni yóknairok seng (choba) tei chachararani yóknai o kamiyungni joto lukurokno. Babilonni bugra Nebukadrejarni yago, bórokni kena arirokni yago tei bórokno butharna nainairokni yago yapharwi rwnai. Bugra Nebukadrejar bórokno seng kubuk bai butharwi khibinai. Bo kisa phano bórokno khairok glak, nakar glak tei mayabo chá glak.

⁸ Tei o bororokno hai hwnwi sa di: Subraiyung hai hwnwi sa-o hwnwi: Nai di ang norokni bwskango thangnani lama tei thwinani lama chongwi nana bagwi rw kha.

⁹ O kamiyungo tongnai bororok khe seng bai, asari nangwi tei bok nangwi thwi bainai; tamo khe norokno kasu-ui tonnai Kolodiasongni aro thángwi sakno bedoknairok khe thangnai tei bórokni langma khe bini thani chobani sokat hai se wngnai.

¹⁰ Tamni hwn ba ang o kamiyungno kaham khlaina bagwi ya hamya klaina bagwi se bwkha chong kha hwnwi Subraiyung sa-o: Babilonni habugrani yago omono yapharwi rwjaknai hakhe bo omono hór bai sógwi páinai.

Habugra Judani núkhungno buj thummani

¹¹ Subraiyungni kókno khna di hwnwi Judani bugrani bosongno sa di:

¹² O Daudni bosong! Subraiyung hai hwnwi sa-o: Phung ai brúmno norok bujsói khe thum di, kusupjaknai tei segwi najaknairokno phiyók di, wng ya khe norokni samung hamyani bagwi ani thamchi hór hai chẃngwi kham anw, khoroksabo abono butharwi man glak.

¹³ Sabo chwngno kebengwi phaiwi mannai? Eba sabo chini tongthai-o habwi mannai hwnwi sanairokno Subraiyung hai hwnwi sa-o, nai di, o harungo tei holong harebo tongnairok ang nono kebengjak.

¹⁴ Ang nini samung tangmani tẃi’-no nono majra rwnai, hwnwi Subraiyung sa-o, ang nini bolongrok hór phnangwi rw anw tei nini babaibrwini bebak manwino kham rwui páinai.