JIRIMIA 20 - Kok Borok (Re-edited) Bible (BSI)

Pasur ochai bai Jirimiani uálaimani

¹ Jirimia o kók diyari saui tong phuru Imerni bwsajla Pasur Subraiyungni nokthar mwrwknairokni tangphang okra abórokno khna kha.

² Hakhe Pasur Jirimia diyarino swpragwi Subraiyungni noktharo thángma lama-o Benjamin duglamni saka bwkhak buphangrok bai khaui chobwi ton kha.

³ Teini phungo Pasur Jirimiano phiyógwi tubu khe Jirimia bono hai hwnwi sa kha, Subraiyung nini mung Pasur hwnwi phar ya, “Magur Misabid,” hwnwi se pharo (abo khe babaibrwi-o kirimasingcha hwnma se.)

⁴ Tamni hwnma le Subraiyung ahai hwnwi sa-o: Ang nono nwng sak baithang tei nini kiching songrokni thani kirimung khlai anw; nwng nini mokol baithang bórokno bórokni kena arirokni seng bai butharjakma nuk anw. Ang Judano Babilonni habugrani yago yapharwi rw anw; bo bórokno Babilono romwi tlangnai tei seng bai buthar bainai.

⁵ Ang o kamiyungni bebak rang-rírok bo khatiui tongmarok, bini sokatrok tei Judani habugrani bebak manwi-khwnwirokno bórokno sekpronai kena arirokni yago yapharwi rwnai, hakhe bórok bórokno Babilono tlangwi thángnai.

⁶ Hakhe o Pasur nini nogo tongnairok tei bebakno Babilono romwi tlangjaknai; aro nwng tei nini bebak kichingsongrok, nwng tatal kók diyari samani bororok thwi anw tei phobjak anw.

Jirimia Subraiyungno tentaiwi samani

⁷ O Subraiyung nwng ano phemlok kha hakhe ang phemlokjak; nwng ani slái phan gwnang kuk hakhe nwng ano mechen kha. Ang sal brúmno mwnwijaknai se wng si-o; jotono ano mwnwi lai kha.

⁸ Tamni hwn ba ang kók sa brúmno “Hamya tei komormung!” hwnwi chirikhógwi sa-o. Tamni hwn ba Subraiyungni kókrok sama bagwino sal brúmno ang lachimasingcha tei belai khe naislerma mano.

⁹ Tumungno “Ang bini kókrok khursa ya eba khe bini mungwi mungsa phano sa ya,” hwnwi sa khe hakhe abo ani bekreng bisingo hór hai khe khachopjagwi tong kha; ang abono bisingo khe ton te ton te leng súk kha, ang abono tei tonwi man glak kha.

¹⁰ Ang kwbángma bororokno serek-serek khe, “Babaibrwi bwkhak kirimasingcha! bono khibi si di! Phai di chwng bono khibi lai sinai!” Ani khásukni kiching song ang thutaimano naisigwi tongo tei “Bo bandijaknai’-no, hakhe aphuru chwng bono mechenwi mannai tei aphuru khe bono yagul sunai,” hwnwi sa laimano khna-o.

¹¹ Phiya ba Subraiyung se ang bai baksa phan gwnang choba khlainai hai khe ani logi tongwi tongo; aboni bagwi ano sátoknairok thutainai, bórok tei kwplai wng glak. Bórok khlai man ya wngwi lachi kothrojak anw. Bórokni a lachi kothrojakma mol brúmno tong phlai anw, khoroksabo abono pok glak.

¹² O kwplaisa Subraiyung, nwng borok kahamno amjogwi nai-o, nwng borokni uansukma bai bwkhano nugo; bórok yagul sujakmano ano phunuk di, tamni hwn ba ang ani bebakno nini thani yaphar kha.

¹³ Norok Subraiyungni bagwi rwchap di; Subraiyungno lob di! Tamni hwnma le bo borok hamyarokni yakni bigra bororokni langmano mwthang kha.

¹⁴ Ang achaima sal swraimung nangjak wng thung! Ama ano ogo chuma sal hamari kwrwi wng thung!

¹⁵ “Nini chwla bwsa achai kha,” hwnwi aphani thani kóktma tunwi aphano tongthok rwnai borok bo swraimung nang thung.

¹⁶ Subraiyung khairok yaui kamiyungrok swbaima hai a bororokbo abo haino wng thung; bo phung ai khe kapmani khorang tei diboro khe birmanni khorang khna thung,

¹⁷ tamni hwn ba bo amani ogo ano butharwi pái li ya; hakhe amani ok bisingo se ani mangkhor wng kha mun tei bini ok mol brúmno torwi tong kha mun.

¹⁸ Tekto bai birmanno nuknani bagwi ba tei lachimasingcha manẃi tongna bagwi ba ang ba tamni bagwi ok bisingni ma achai lang?