JIRIMIA 18 - Kok Borok (Re-edited) Bible (BSI)

Twk taknaini nogo Jirimia thángmani

¹ Subraiyungni aroni o kók Jirimiani thani sók phai kha:

² “Nwng bachaui twk taknaini nogo tokhlai tháng di, ang aro nono ani kókrok sa anw.”

³ Hakhe ang twk taknaini nogo tokhlai tháng kha tei aro bono twk takjaknai gorgori-o khe samung khlai tongma nugwi kha.

⁴ Bo ha bai manwi tagwi tongmani abo derajak khe twk taknaisa hai’-no hai a hano naui tei uáisa bo kaham hwnwi chong tẃi khe tak phir kha.

⁵ Aphuru Subraiyung ano hai hwnwi sa kha:

⁶ “O Israilni bosongrok o twk taknaisa khlaima hai ang norokno khlaiwi man ya diba?” hwnwi Subraiyung sa-o. “O Israilni bosongrok, twk taknaisani yakni ha haino norokbo ani yago abo hai se.”

⁷ Jora kaisa-o ang kaisa dophano eba hano yaphang yarwng phuichaui swbainai tei sokomornani hwnwi saui mano

⁸ tamo khe a dopha tumungno bórokni lama hamyani kiphilwi phai khe angbo bórokni saka-o hamya tubuna hwnwi bwkha chongmano sláinai.

⁹ Phiya ang tei kaisa dophano eba hano snamwi tisana tei songchana hwnwi sakhlai kha,

¹⁰ tamo khe bórok ani kók khna yaui ani bwskango samung hamya khlai khe, hakhe bórokno kaham khlaina hwnwi ang bwkha chongmano ang khlai glak.

¹¹ Aboni bagwino tabuk Judani bororok tei Jerusalemo tong bainairokno sa di: Subraiyung hai hwnwi sa-o: Nai di ang khe khoroksa twk taknai hai, norokni bagwi hamya khlaina naiwi tongo tei norokni bagwi hamya chabwi tongo. Tabuk norok jotono sak-sakni lam hamyani kiphil phai di tei sak-sakni lama tei samungrok kaham khlai di.

¹² Tamo khe bórok hai hwnwi sa kha “Omorok mungsa samungo chúk ya! Chwng chini bwkha chapmano’-no yapri songwi thángnai tei buini kók na yaui chwng jotono chini hamya bwkha uansuk tẃi’-no khlainai.”

Bororok Subraiyungno yakarmani

¹³ Aboni bagwi Subraiyung hai hwnwi sa-o: dopharokni bisingo sẃngwi nai di; Omo hai sabo le khna kha? Siklajwk Israil hamya kuk samung sitra khlai kha.

¹⁴ Lebanonni kothor tamo bini hachukni geleui tháng bai anw hai da? Hatháini twi kwchangrok yorkhlaiwi phainai twisarok tamo ranwi da thángnoba?

¹⁵ Tamo khe ani bororok khe ano pogwi cha ya-chúk ya mwtai mangrokno se satrai motom sók lai si-o; bórokni yaphangni lama kwchamo khe thutai kha, a kwcham lama tẃi him lai li ya tei lama kaham tẃi him ya karwi lama gudrak-mudrak tẃi se him lai si-o,

¹⁶ bórokni hano kirimasingcha khlai lai kha, tei mol brúm brúm buini mwnwimung khlai kha. Aboni gana tẃi thángnai joto bororok kiriui bokhorok ninang rwui thángo.

¹⁷ Ang salka bwkhakni nokbar hai khe bórokno bórokni kena arirokni bwskango piring-poroi khlainai. Ang bórokno bórokni digi-sigini salo ani mwkhang phunuk yaui ani phikung se phunuknai.

Jirimiani bagwi uarai chakmani

¹⁸ Aphuru khe bórok hai hwnwi sa kha; “Phai di chwng Jirimiani banta uarai chak lai anw, tamni hwn ba ochaini aroni phrwngmung, si kwrwngrokni aroni kókbiti kaham tei diyarini aroni khe kók kwmaui tháng glak. Hakhe phai di chwng bono majra ber lai anw tei bini kók tháisa phano khwbo khna lai glak.”

¹⁹ O Subraiyung ano nai ja di, ani kena arirok tamo sa abono khna di!

²⁰ Kahamni yagul ba tamo hamya bai da sunai? Yang le bórok ano butharna bagwi hakhor se khurwi tong lai kha. Nini bwskango ang bórokni hamkraini bagwi tei nwng bórokno jolijakmano rosaui na di hwnwi sanani bachamani kókrokno muitu khlai di.

²¹ Aboni bagwi nwng bórokni bwsarokno chacharara-o khiklaiwi rw di; bórokno seng tẃinairokni thani yapharwi rw di, bórokni hiksongrokno bwsa kwrwi tei randi wng rw di. Bórokni bororok bok nangwi ma thwi thung tei siklarok khe choba-o seng bai butharjak bai thung.

²² Nwng bórokni saka achomsa butharnairokno tubu-ui phai khe bórokni nokrokni kapmani khorang khna thung! Tamni hwn ba ano romna bagwi bórok hakhor chók kha tei ani yakungni bagwi khẃi thonwi ton kha.

²³ Hai phano o Subraiyung nwng le bórok ano butharna hwnwi bebak uarai chakmarokno saui mano. Bórokni cha yarokno ta nakar di, bórokni sumsokrokno nini bwskangni hu-ui ta khibi ja di. Nini mokol bwskango’-no bórokno gaija rw di; nwng jolima jora-o bórokno abo hai khlai di.