JIRIMIA 17 - Kok Borok (Re-edited) Bible (BSI)

Judani sumsok tei majra

¹ Judani sumsok sorni swikong bai swijak kha; hirani swikong búkhúk bai bórokni bwkha-o tei bórokni holongni bwkhani bwklabo tei háyáni bokorongo rigwi rwjak kha,

² bórokni bwsarok hathái kuchukrokni buphang khwrangjiji ganani háyá tei Aserani mang takjakno

³ hachukrogo tei hareprogo tongmarokno muitu khlai kha. Ang nini sompotino tei rangchak-ríchakrokno sekproui manmani manwirok hai khe ha gwnangwi nini sumsokni bagwi rwui rwnai.

⁴ Nini baithangni tongmungni jarwi ang rwmani hukumuno nwng kwmajaknai tei ang nono norok sini ya kena arirokni seleng ang snamnai, tamni hwn ba ani thamchi hór hai, abo kham phlai máng tongnai.

Juda juda sajakmung

⁵ Subraiyung hai hwnwi sa-o: “Thwiblang borokni thani bwkha beraui tongnai, bahan-bwthẃini phanno simi khatungwi tongnai, tei Subraiyung bai bwkha chaljak borok, bórok swraimung nangjak.

⁶ Bórok hasinglwngni sam bwlwng hai, yókma salno bórok nuk glak. Bórok hasinglwngni kutung tei kwran hapharrogo tei borok kwrwini kwprap hapharo tong anw.

⁷ “Subraiyungno bwkha beranairok tei bono khatungnairok bórok hamchajak.

⁸ Bórok twi rukungo káijak buphang hai, bini yarwng twisa bwkhak sukhlai-o. Abo satung tungphlaui phai phano kiri glak, bini bwláirok khwrang saui tongnai; uatwi phai ya wngmani jora-o phano bo uana glak, bo bwthái tháimabo cho glak.

⁹ “Bwkha wng kha bebakni slái bandinai; abo hamya kuk, bono sabo saui mannai?

¹⁰ Ang Subraiyung, uansukmano tei bwkhano chánai-o, bebak bororokno bórokni manthaini rw-o, tei samung khlaima tẃi’-no manthai rw-o.”

¹¹ Lam cha ya tẃi rang-rí ajinairok bo buini bẃtẃino koroui bwsa khumpai rwnai hai; kwchar majaro abórok bono yakarwi tháng bai anw; páithago khe bórok butua sijak anw.

¹² Yaphangni simi’-no o chẃngsacha achukthayung chini chẃngsacha kwthar háyá.

¹³ O Subraiyung, Israilni khatungma! Nono khibinairok bebak borok’-no lachimasingcha khlaijak anw; nono yakarwi thángnairokni mung hadlwi-o khe swijaknai, tamni hwn ba bórok twimuk kwthang Subraiyungno yakarwi tháng bai kha.

Jirimia Subraiyungno chubachu sanmani

¹⁴ O Subraiyung ano ham rw ja di hakhe ang ham anw; ano mwthang ja di hakhe ang thangnai; tamni hwn ba nwng simi se ani lobjaknai.

¹⁵ Nai di bórok, “Buko sla Subraiyungni kókrok? Do, abo nang phai gra si thung la!” hwnwi sa lai-o.

¹⁶ Ang nono hamya rohor di hwnwi san ya, eba a sokomorjakna salroknobo ang tubuna muchung ya. Tamni hwn ba ani búkhúk tẃi sajakmani abo nini bwskango’-no hwnwi nwng saui mano.

¹⁷ Nwng ani bagwi aswk kirimasingcha ta wng ja si di; birmanni jora-o nwng’-no ani kati thai.

¹⁸ Ano sátoknairok lachimasingcha khlaijak thung, hai phano ano khe ta lachi rw ja di; bórok bwkha báijak thung phiya ano bwkha ta swbai ja di; bórokni saka-o birmanni sal tubu-ui phai di; kusungnwi sokomorjaknai bai nwng bórokno sokomor di!

Sabat kerongno yachakmani

¹⁹ Subraiyung ano hai hwnwi sa kha: “Tháng di, lukurokni a duglamo bachaui di, Judani habugrarok bisingo hapmani tei phataro ongkhormani a duglamo tei Jerusalemni bebak duglamrogo thángwi bachaui di.”

²⁰ hakhe bórokno hai hwnwi sa di: O Judani habugrarok o Judani bebak lukurok tei Jerusalemo tong bainairok tei o duglam tẃi hapnai joto lukurok, Subraiyungni o kókno khna di.

²¹ Subraiyung hai hwnwi sa-o: Muitu narwk di, nwng sabat salo poja ta tẃi di tei Jerusalemni duglam tẃi abono bisingobo ta tubu di.

²² Ang norokni chuchusongno dagima haino sabat salo norokni nokni manwirokno phataro ta kari di tei mungsa samungbo ta tang di, phiya sabat salno kwthar khlai ton di.

²³ Hai phano bórok khna ya tei yachak ya wng kha; bórok bórokni gwdna rak rw kha tei phrwngmungrokno khna li ya gwja.

²⁴ Subraiyung hai hwnwi sa-o, “Tumung norok ani kók khnaui sabat salo o kamiyungni duglam tẃi bisingo poja tubu ya tongwi sabat salno kwthar khe ton khe tei a salo mungsa samung tang ya khe tong khe,

²⁵ hakhe norokni habugrarok Daudni achukthayungo achuknai tei habugrani tangphangrok bai Judani bororok tei Jerusalemni bororok korai malkhungo khe kasaui kamiyungni dugayung tẃi tháng laisu khlainai; o kamiyungno mol brúm brúmno borok tongnai.

²⁶ Hakhe Judani bebak kamiyungni bororok Jerusalemni gana-ginini Benjaminni amchoini, Sephelani, hachuk hani tei Negebni bororok sógwi yapharma tei ratharwi barokma yapharma mai-khul yapharma bai satrai motom tei hambai rwui yapharmarok Subraiyungni noktharo tubu-ui phai anw.

²⁷ Phiya ba tumung norok ani kókno khunju kan yaui sabat salno kwthar khe ton ya khe, poja tẃi Jerusalemni duglam tẃi sabat salo hap khe, hakhe bini bebak duglamo ang hór phnangwi rwnai, a hór Jerusalemni noyungrokno kham rwui pái bainai tei a hór thwi phlai glak.”