JIRIMIA 12 - Kok Borok (Re-edited) Bible (BSI)

Jirimia Subraiyungno sẃngmarok

¹ O Subraiyung ang nono majra ber phurubo nwng sói’-ono tongo; tamo khe ang nini thani ani sajaknai tongmano sa grana. Lama hamya-o himnairok ba tamni aswk hamcha? Borok hamyarok ba bahai khe tung tung khe tongwi man?

² Nwng’-no bórokno kái-o tei bórok yarwng sur kha; bórok torwi logwi bwthái thái-o; bórokni búkhúgo khe nini mung, yang bórokni-o khe le nono sak se nangjak ya.

³ Tamo khe o Subraiyung, nwng ano saui mano; nwng ano nugo tei amjogwi naiwi ani bwkha bahai nai-o. Bórokno mera ratharna bagwi sokhlai tubuma hai khe tubu di bórokno ratharjaknai salni banta khagwi ton di.

⁴ Tei bwswk o ha swlwgwi ma kap sinai, charani samrok ba tei bwswk mwranwi ma tong sinai? Borok hamyarok oro tongma bai yabrwi tei toksa-toktẃirok thángwi pái bai kha, tamni hwn ba bórok hai hwnwi sa lai-o, “Bo, chwng tamo khlaiwi tong abono naiwi nai ya.”

⁵ Tumungno nwng yakung bai khabrumnai bai baksa khachigwi leng khe, nwng bahai khe korai bai baksa khachigwi batainai? Tei tumung ha miligo se klai-kedeui tong khe, Jordanni bolong jaji-o bahai tamo wngnai?

⁶ Nini sandai-masakrok tei nini sakni núkhungni bororok suda se kebengwi bacha kha; nini uklogo bórok nono hamya sa lai kha; bórok nwng bai halok kaham narwgwi kók sa phano bono bwkha ta bera di.

Subraiyung bini bororokni bagwi khá dukhu nangjakmani

⁷ Ang ani nok-núkhung yakar kha, ani hukumu-mukumurokno khibi kha; ang ani hamjakma kháchúksano bini kebengnai arirokni yago yapharwi rw kha.

⁸ Ani man-bantarok ani bagwi bolongni singho hai se wng si-o; bo ano kebengwi chiriksa-o aboni bagwi ang bono naislero.

⁹ Ani man-bantarok ani thani mereng-marang choproknai tok hai ya diba? tei kubun choproknai tokrok bai bo gerebwi kitingjak ya diba? Tháng di bolongni yabrwirokno bono uár rwnani bagwi kuthum rw di.

¹⁰ Kwbángma mera mwrwknairok ani angur barino sokomor kha, bórok ani barino kádulwi khibi kha, ani aswkni naithok barino, chak chak haphar bukcha khlai kha.

¹¹ Bórok a hano mungsa phano kwrwi khlai kha; abo ani kháno nang rw kha. Bebak ha mungsa phano kwrwi wng kha, phiya abono kebo phano bwkha rwnai kwrwi kha.

¹² Joto hathái bukcharokni hasinglwngo dera rwnairok phai kha; tamni hwn ba Subraiyungni seng hani yaphang buchuk tanthar kha; khoroksa phano yók glak.

¹³ Bórok mai kaima se busu se ma ra si-o, bórok kolomtwi khiklai lai súk kha phiya ba mungsa man li ya. Bórok Subraiyungni jolimungni bagwi bórok bórokni lachimungno se ma ranai.

Israilni noksa-nok arini thani Subraiyung kók rwmani

¹⁴ Borok hamya ani arirok, ani borok Israilno rwmani ani a man bantano yak rwnairokno Subraiyung ahai hwnwi sa-o: Ang bórokno bórokni hani phuichaui khibina naiwi tong kha tei ang bórokni bisingni Judano phuichaui tubunai.

¹⁵ Hakhe ang bórokno phuichaui tubu-ui tei uáisa bórokno khairok phinai, hakhe bórok jotono’-no bórokni ha-o bórokni man-bantarokno rwnai.

¹⁶ Bórok salsa ani bororokno mwtai Balni mungwi swmai tangna phrwng phano tumung bórok ani bororokni tongmung tẃi tongna srwng khe tei “Kwthang Kaitor tongwi tongo” hwnwi ani mungwi swmai tang khe hakhe bórok ani bororokni bisingo hamari mannai.

¹⁷ Tamo khe tumung dopha kaisa swk ani kók khna ya khe, hakhe ang a dophano phuicha súgwi sokomorwi khibinai, hwnwi Subraiyung sa-o.