JAPHANIA 2 - Kok Borok (Re-edited) Bible (BSI)

Bwkha kiphilna koima

¹ O lachima kwrwi dopharok, norok thansa wngwi kuthum lai si di,

² nokbar bai gundak kobon rwjak tẃi khe norwi rohorjak ya sini, Subraiyungni hór hai jolima norokni saka-o klai phai ya sini tei Subraiyungni jolima sal nini saka-o sók phai ya sini.

³ Hani o bebak borok koinenerok norok bini dagimarok tẃi samung khlai di; sutrang khe tei koinene khlaiwi tong di; abo hai khe nwng Subraiyungni a jolimani salo tongthai manna phano tongo.

Israilno kitingwi tongnai dopharokni komorma

⁴ Tamni hwn ba Gaja khibijak wngnai, Askelon bukcha wngnai; Asdodni bororok sal khorok thabo tongma jora-o riphrigwi rohorjaknai, Ekronni bororok phuichajaknai.

⁵ O twijlang rukungo tongnairok, o Keritsarok, norok bwswk se kirimasingcha khe hamya sitrano! Subraiyungni kók nono kebengjak, o Kanan, Philistiasarokni ha; aro tongnairok khoroksa kwrwi tẃi komor bai ya sak ang abono sokomornai.

⁶ O twijlang rukung, nwng khe sula kwkhrang chanai, aro mera mwrwknairokni tongthai tei merarokni batham wngnai.

⁷ Twijlang rukung khe Judani karwi klangjaknairokni man banta wngnai, bórok aro merarok mwrwknai, sanja-o khe bórok Askelonni nokrogo thu-ui tongnai. Tamni hwn ba Subraiyung bórokni Kaitor bórokno naikolnai tei bórokno swkangni hai khlaiwi hamcha rwnai.

⁸ “Ang Moab lachimasingcha khlaimano tei Ammonni bororok ani bororokno thesra khe mwnwimano tei bórokni hano segwi nana hwnwi kók kotor samano khna kha.

⁹ Ang Phankrak Subraiyung, Israilni kwthang Kaitor sa-o, Moab khe Sodom hai tei Ammon khe Gomora hai wngnai, ha riphuji bwlwng sómni hakhor wngwi tong phlainai. Yógwi tong rwknai ani bororok bórokno tanthar-súthar khlainai tei bórok a hano seknai.”

¹⁰ Bórok kung chukmani bagwi o manthaino mannai, tamni hwn ba bórok Phankrak Subraiyungni bororokno thesra kari lai kha tei bórokno kebengwi sakno kotor khlai lai kha.

¹¹ Subraiyung bórokno sikirinai; bo o hani mwtairokno mungsa chúk ya khlainai tei bororok bórok tongmani aro tongwi twijlang rukungo tongnairok tei twi kwcharni ha-o tongnairok khulum hórnai.

¹² O Ethiopiasarok norokbo ani seng bai tanjagwi ma thwinai.

¹³ Bo bini yak phologwi salsibaini hano kosonnai tei Asiriyano sokomornai; tei Ninobino bo haphar kwran khibijak hasinglwng hai khlainai.

¹⁴ Aro aswkni musuk tei mera bodolrok tei bolongni yabrwirok thu-ui tongnai duduma tei sikrukrok aroni thonglarogo báui tongnai; dudumarok tailamo báui pungnai tei tokharok duglamni saka-o khe báui pungnai; tamni hwn ba bórokni Sidar phangni snamjak manwirok tlangjagwi páinai.

¹⁵ Omo se a khom-khom khe tongmani a kamiyung, bo sak-sak hai hwnwi sa-o, “Ang simi se, ano karwi tei kwrwi kha” nai di omo bahai khe komorwi bolongni yabrwirokni tongthai wng kha! Aboni gana tẃi láinairok abono thesra kariui mwnwinai.