JAPHANIA 1 - Kok Borok (Re-edited) Bible (BSI)

¹ Amonni bwsla Josia ha Judani habugra cháui tongmani jora-o, Kusini bwsla Japhanianin thani Subraiyung kók sakhlai kha, Kusi khe Gedaliani bwsla, Gedalia khe Amariani bwsla, Amaria khe Hejekiani bwsla.

Subraiyungni bujni sal

² “Ang o ha sakani bebakno’-no kirimasingcha khe sokomor súgwi páinai” hwnwi Subraiyung sa-o.

³ “Ang bororokno tei yabrwirokno sokomornai; nokhani tokrokni tei twijlangni árokno sokomornai. Ang borok hamyarokno khiklainai. O ha sakani borok tongmarokno sokomor suknai” hwnwi Subraiyung sa-o.

⁴ “Ang Judani saka-o tei Jerusalemo tongnai bebak bororokni saka-o yak kosonnai; tei Bal mwtaino khulumnai tong rwkma bororokno ang oroni sokomornai phiya mang takjak mwtairokni ochairokno pái khibinai;

⁵ núkhúngo kasaui nokharokni tal, athukirirokno khulumnairokno ang sokomornai; phiya ano khulumui tei ano rwna hwnwi chak twtwi mwtai Milkomni mungwi swmai tangnairok,

⁶ Subraiyungno rwktharwi tongwi uphilwi thángnairok, bini muchung tẃi tong ya tei bini muchungmano sina nai yarok sokomorjaknai.”

⁷ Subraiyungni bwskango siring siring wng di! tamni hwn ba Subraiyungni sal sampha kha; Subraiyung ratharwi yapharna panda songcha kha, bo aboni bagwi aro kobokjaknairokno kwthar khlai kha.

⁸ Subraiyungni ratharmung salo, ang tangphangrokno tei habugrani bwsarokno tei phatar hani kanmung-chummung chumwi tongnairokno sátoknai.

⁹ Ang a salo, bársaui duglam básunairokno, bandima bai tei sátok-pitok khe bórokni bugrani nokno supungnairokno sátoknai.

¹⁰ Subraiyung hai hwnwi sa-o, “ ‘A salo,’ norok Jerusalemni á dugayungo kapma khorang khnanai. Norok kamiyungni tei khaksa-o rai-rai khe kapma khnanai tei hachuk saka-o sotonwi báikhrupmani khorang khnanai.

¹¹ Maktes-o tongnairok kap lai di, tamni hwn ba bebak pai-phal khlainarok komor bái kha; rukphaini rang belep sunairok pái rwui páijak bái kha.

¹² A jora-o ang Jerusalemno chati tẃiwi naituknai tei sak sak bwkha khom-khom wngjagwi ‘Subraiyung kaham hamya mungsa khlai ya’ hwnwi sanairokno sátoknai.

¹³ Bórokni rang-rírok segwi najaknai tei bórokni nokrokbo swbaijaknai. Bórok nok kaham-kaham tangwibo aro ma tong glak; angur buphang kái phano aroni bwtwi ma nung glak.”

¹⁴ Subraiyungni sal kotor sampha kha, belaino samphaui phai kha; Subraiyungni a salni khorang le belai khe mecher, phan gwnang sengkrakrok aro chirik lai-o.

¹⁵ A sal jolijakmani sal wngnai, abo dobni sal tei kirimasingcha khe sokomormani sal, mwnakma tei dukhuni sal wngnai, mwnakjak chumui kobolwi tongnai,

¹⁶ a sal wng kha kuchuk chokdeual bai kitingjak kamiyungrokno kebengwi bachaui totro tamwi choba nangnani sal.

¹⁷ Ang bororokni saka-o abo tẃi digi-sigi tubunai, hakhe bórok mokol nuk yarok hai khe him báinai; tamni hwn ba bórok Subraiyungno kebengwi sumsok khlai lai kha, bórokni thẃirok hadlwi hai khe khibiui rwjaknai tei bórokni mangrok ha-o muskhi hai khe klaiwi tongnai.

¹⁸ A salo bórok rangchak hwn di rukphairok hwn di Subraiyungni jolimani aroni mungsa phano phiyógwi man glak; bini bwkhani jolimani bai o hayung bebakno khamwi tháng báinai, tamni hwn ba o ha saka-o tongnairokno bo achomsa pái rwui páinai.