JAKOB 5 - Kok Borok (Re-edited) Bible (BSI)

Gwnangrokno hus wng di hwnmani

¹ Tabuk, norok gwnangrok ani kók khna di. Norokni bagwi kirimasingcha hamya phai rwrwkma bai norok chirigwi kap lai di.

² Norokni rang-mairok sok bai kha, norokni rírok kuruma khunti bai kha.

³ Norokni rangchak rukphairok sor khi bai kha, a sor bikhi norokni majrano sijak rwnai, phiya hór hai khe abo norokni bahan cháui páinai. Norok o mol páinanogo rang-mai kwbángma khe khatiui ton kha.

⁴ Norok norokni kheto samung tang phainairokno bórokni samungni rang rw li ya. Bórok kutuk laimano khna di. Norokni mai ranairok chirikhókmani abo Kwplaisa Subrai Kaitorni khunju klai kha.

⁵ Norok o swngcharo tongthok-cháthok khe máng tong kha. Butharjaknani salni bagwi norok sak sakno kuphung khlai kha.

⁶ Norok borok kahamrokno majra berwi buthar kha, bórok norokno tháisa phano pung li ya.

Khábo lok di, suribo san di

⁷ Takhukrok, Subrai phai ya sak khá logwi tong di. Naisik di, gisti khlainai borok bini nangmani mai buphuru bini kheto wngno hwnwi bwswk khá logwi naisingwi tong. Bo swkangni uatwi bai ulni uatwino khá logwi naisingwi tongo.

⁸ Norokbo khá logwi ma tongnai. Subrai phainani sal kasu rwrwkma bai norok khá rak súgwi tong di.

⁹ Takhukrok, norok khoroksa tei khoroksano hunu-hanai ta sa lai di, hakhe Kaitor norokni buj thum glak. Nai di, Buj thumnaisa duglamo sók phai kha, bisingo hapna naiwi tong kha.

¹⁰ Takhukrok, Subraini mungwi kók sanai diyarirokno naisik di, sátokjak phuru norok bórok hai khe khá logwi soiwi tong di.

¹¹ Bórok soimani bai chwng bórokno hamchajak hwno. Job khá lokmano norok khna kha; Subrai ulo bono bahai khe nai kha abonobo norok saui mano. Tamni hwn ba Subrai wng kha maya gwnang, khairokma gwnang.

¹² Ani takhukrok, kók kotor khe hai, norok kók rw phuru swmai ta tang di; Kaitorni mung khu-ui eba borokni mungwi eba tei mungsano romwi phano swmai ta tang di. Norok “I’n” hwnmani “I’n-no” wng thung, norok “I’nhi” hwnmani “I’nhi’-no” wng thung; omo tẃi khe norok Kaitor bai buj thumjak glak.

¹³ Norokni bere khoroksa swk tekto da manẃi tong? Bo suri san thung. Khoroksa swk khá da tongthok? Bo lobwi rwchap thung.

¹⁴ Khoroksa swk hamya da tong? Bo mothani okrarokno ring thung, hakhe bórok Subraini mungwi bini bwsago thok phulwi bini bagwi suri san anw.

¹⁵ Bórok poito khlaiwi suri sanma bai a hamya ham anw; Subrai bono ham rw anw, bo sumsok khlaimarok nakarjak anw.

¹⁶ Hakhe norok kiching norok norokni sumsokno gosi lai di, khoroksa tei khoroksani bagwi suri san lai di, omo tẃi khe’-no norok ham rwjak anw. Borok kaham suri sanmani abo belai khe nango.

¹⁷ Eliabo chwng hai bahan-bwthẃi gwnang borokno. Bo uatwi ta ua thung hwnwi khá nangwi suri sanma bai nokha bisiktham kwchar a ha-o uatwi ua li ya.

¹⁸ Bo haino hai suri san phi khe nokha uatwi ua kha, ha-o mai-khulrokbo wng phi khua.

¹⁹ Ani takhukrok, norokni bere khoroksa swk lama kubuino koró khe, phiya tei khoroksa takhuk bono kiphil rw phi khe

²⁰ o kókno si di: Lama korójak sumsok khlainaino kiphil rwnai borok bo a sumsok khlainaini pholano thwinani yakni phiyók anw, phiya bini bagwibo sumsok kwbángma nakarjak anw.