JAKOB 4 - Kok Borok (Re-edited) Bible (BSI)

Swngcharni bororok tong tẃi ta tong di

¹ Norok uálai-suklai wngmani abo buroni phai? Abo norok tongthok-cháthok khe tongna muchungma bai se phai-o, a muchungmarok norokni sago dundrok lai máng tongo.

² Norok manna muchungo, hai phano norok man ya, aboni bagwi norok butharna nai-o. Norok belai khe khámai-o, hai phano norok man ya, aboni bagwi norok uálai-suklai wngo. Norok manna muchungmano man ya, tamni hwn ba norok Kaitorno san ya.

³ Norok san phano man ya, tamni hwn ba norok muchungma cha ya. Norok tongthok-cháthok khe tongna bagwi se sano.

⁴ O tongmung sitrarok, swngcharni bororok tong tẃi tongmani abo Kaitor bai kena ari wngma se klai-o hwnwi norok saui man ya da? Swngcharni bororok tong tẃi tongna nainai borok bo Kaitor bai kena ari wngma klai-o.

⁵ “Kaitor chini bisingo rwmani phola belai khe muchungjago,” elembakni o kók nang ya hwnwi ta hwn di.

⁶ Hai phano Kaitor khairogwi rwmani abo rak kugo. elembago hai hwnwi sama hai, “Kung chuknairokno Kaitor kebengo, koiwi tongnairokno khe khairogo.”

⁷ Hakhe norok Kaitorni thani bom di. Soitanno kebeng di, hakhe bo norokni aroni khárnai.

⁸ Kaitor bai tong di, hakhe bobo norok bai tongnai. O sumsok gwnangrok, norokni yak sú bai di! O phatrarok, norokni bwkha kuphur khlai di!

⁹ Khá kham lai di, kap lai-kok lai wng lai di; mwnwima thagwi kap di, tongthokma thagwi mok di!

¹⁰ Kaitorni thani koinene khe tong di, hakhe bo norokno kuchugo tisanai.

Takhukrokno majra ta ber di

¹¹ Takhukrok, norok khoroksa tei khoroksano hamya ta sa lai di. Takhukni hamya sanai borok bo Kerongno se hamya hwnma klai-o, phiya takhukno majra bernai borok bo Kerongno se majra berma klai-o. Nwng Kerongno majra ber khe nwng Kerongno rákhoknai wngma klai li ya, nwng Kerongno majra bernai se wngma klai si-o.

¹² Kaitor simi se kerong snamnai, bo simi se majra bernai. Bo simi se mwthangwi mano, bo simi se sokomorwibo mano. Buino majra bernai nwng sabo de?

Kók kotor ta sa di

¹³ “Tini phano khwna phano chwng taun khungsa swgo tháng anw, aro nokha bisa tong anw, bepar thwngwi rang kwbángma kha anw,” hwnwi sanairok norok ani kók khna di.

¹⁴ Norok khwna bahai khe tongno abo suda norok saui man ya. Norok wng kha siyari hai, abo srapsani bagwi nukjago, phiya srapsani bisingo’-no kwma-o.

¹⁵ Norok hai hwnwi sa thai, “Subrai muchung khe chwng kwthang tongnai, hakhe mungsa ya khe mungsa samung khlaiwi tongnai.”

¹⁶ Tabuk khe norok kung chugui kók kotor sa-o, abo tẃi khe kók kotor sama wng kha hamya.

¹⁷ Hakhe samung kaham khlaithai hwnwi saui manẃi khlai ya khe a borok sumsok khlaima klai-o.