JAKOB 2 - Kok Borok (Re-edited) Bible (BSI)

Mwkhangno nukmasing bai borokno ta nuk di

¹ Ani takhukrok, norok chẃngsacha Subrai, chini Subrai Jisu Khristono poito khlaima bai bumukhangno nukmasing bai borokno nukna kók kwrwi.

² Rom di, gwnangsa rangchakni yasitem kanwi rí jilik jalak chumui norok kuthum thani phai-o, phiya kichik kachak kanjak kwrwisa borokbo phai-o.

³ Norok a rí jilik jalak chumjakno bóri kugui bono “O achukthai kahamo achuk ja di,” hwnwi sa khe, phiya a kwrwisano khe “Aro’-no bacha di,” eba khe “Ani yakung gana-o ha-o achuk di,” hwnwi hwn khe

⁴ norok kiching norok kotor kotoi khlaima klai-o, phiya norok bwkha hamya tẃiwi naisikma klai-o.

⁵ Ani khájani takhukrok, khna di. Kaitor o swngcharni kwrwirokno poito kwrak wngna bagwi, phiya bono hamjaknairokno rwna hwnwi kók rwmani a Ha-o tonna bagwi chong kha.

⁶ Norok khe kwrwirokno sak nang ya. Norokno sabo kusup? Norokno sabo kuto sopreui tlang? Gwnangrok se!

⁷ Norok mung kaham rwjakmano hamya sanai bórok’-no.

⁸ Elembago hai hwnwi sama hai, “Nwng sakno hamjak tẃi’-no buinobo hamjak di,” Kaitorni hani o kerongno rákhok khe norok kaham khlai-o.

⁹ Phiya ba mwkhangno nukmasing bai bororokno nuk khe norok sumsok khlaima klai-o, hakhe Kerong norokno kerong swbainai hwnwi romo.

¹⁰ Kerongni kók tháisa swbainai borok bo bebak kerongno’-no swbaima klai-o.

¹¹ Tamni hwn ba “Buitali-buitala ta wng di,” hwnwi sanai a Kaitor’-no “Borok ta buthar di,” hwnwibo sa-o. Nwng buitali-buitala wng ya phano borok buthar khe nwng kerong swbaima klai-o.

¹² Norok bororokno phiyóknai a kerong bai buj thumjak anw hwnwi omo tẃi khe kók sa di, omo tẃi khe tong di.

¹³ Buj thum phuru Kaitor maya kwrwi borokno maya chá glak; tamo khe maya chánai borok buj thumjak phano yóknai.

Poito bai samung

¹⁴ Ani takhukrok, khoroksa swk “Ang poito khlai-o,” hwnwi saui abo tẃi khe samung khlai ya hwn khe abo bai tamo wngnai? A poito bono mwthangwi da manno?

¹⁵ Rom di, takhuk bukhukrokni bere baksa rí kwrwi, chána kwrwi tongo.

¹⁶ Norok bórokni nangmano rw yaui “Kaham khe tong lai di! Kaham khe kan di, kaham khe chá di,” hwnwi hwn khe abo bai tamo wngnai?

¹⁷ Abo tẃi khe’-no samung khlai yaui poito khlaima simi hwn khe a poito kwthwi se.

¹⁸ Khoroksa swk hai hwnwi sa anw, “Khoroksa poito khlai-o, tei khoroksa samung khlai-o.” Ani kók khe hai, “Nwng samung khlai yaui poito khlaimano ano phunuk di. Ang khe samung khlaima bai ani poitono nono phunuknai.”

¹⁹ Kaitor kaisa susuk se hwnwi nwng poito da khlai? Kahamno. Mwtai hamyarokbo abono poito khlai-o, kirimabo chájago.

²⁰ Nwng mungsa si ya! Samung khlai yaui poito khlaimani abo mungsa buya hwnwi naina muchungo, hai da?

²¹ Chini chuchu Abraham Kaitor bai bahai khe kaham hwnwi romjak kha? Bo bini bwsa Isakno háyá-o bok kha, a samung bai se bo kaham hwnwi romjago.

²² Nwng si ya da, bo samung khlaima-o bini poitobo tongo samungbo tongo; bo samung khlaima bising tẃi’-no poito kwrak wngo.

²³ Hakhe “Abraham Kaitorno poito khlai-o, hakhe bo poito khlaima bai Kaitor bono kaham hwnwi rom kha,” elembakni o kók nang phai kha; aboni bagwi Abraham Kaitorni bikiching hwnjak kha.

²⁴ Hakhe norok saui man kha borok samung khlaima bai se Kaitor bai kaham hwnwi romjago, poito khlaina bai simi ya.

²⁵ Baliknaijwk Rahab ahai’-no wng kha. Bo bini samung bai Kaitor bai kaham hwnwi romjak kha; bo Judai siadirokno nogo kasa rwui kubun lama tẃi tikhlaiwi rohorma bai kaham hwnwi romjak kha.

²⁶ Hakhe tabuk, phola kwrwi mang kwthwi wngma tẃi samung kwrwi poitobo kwthwino.