HOSEA 7 - Kok Borok (Re-edited) Bible (BSI)

¹ Ang Israilno ham rwna nai phuru, Ephraimni hamya khlaima tei Samariani tongmung sitra nukjak kha; tamni hwn ba bórok cha ya samung khlai kha, khogwi bisingno swbai kha tei phataro sekpro kha.

² Phiya ba bórok ang bórokni samung hamya khlaimano pok ya hwnwi si ya. Bórokni samung hamyarok tabuk bórokno kitingwi gerepsa kha, bórok ani mokol bwskango se.

Bugrani noyungo hamya kókbiti chap laimani

³ Bórokni tongmung sitrarok bai se bórok habugrano tongthok rw-o tei bórokni kók tatalrokno se tangphangrokbo hamjago.

⁴ Bórok samung sitra tangnai máng se; bórok auang snamnai bo bini auan sapigwi tongsani thapa ekhrekna nang ya hokhi kaham thapa hai hokhi jolo-jolo.

⁵ A salo chini habugrarok tei tangphangrok angur bwtwi nungma bai lum bai kha; bo poito kwrwirok bai se gwdal si-o.

⁶ Bórok bórokni bwkha bisingo thapa jolo-jolo khe chẃng tẃi chẃng kha; horo bórokni thamchi kwchangsa-o, phung ai khe hór chẃngsa tẃi khe abo jlai-jlai wngo.

⁷ Bórok bebakno hokhi chẃngjak thapa hai tei bórok bórokni naikolphangrokno monogwi pái-o. Bórokni habugrarok pái bai kha; bórokni bere khoroksa phano ano ringnai kwrwi.

Judia bai Israilrok choba nang laimani

⁸ Ephraim bo sakno kubun bosongrok bai gwdal kha; Ephraim khe auan ser phuru babaisa simi serwi tei khaksa mwthaljak ya auang hai.

⁹ Phatarsa bini phanno monok kha, phiya bo abono saui man li ya, bini bokhorokni khwnai thupa-thupi phur kha, tamo khe bo abo saui man ya.

¹⁰ Israilrokni kung chukma bai bono kebengma sijago; hai phano bórok Subraiyung bórokni Kaitorni thani bwkha kiphil li ya tei aboni bagwi bono rubo rutuk li ya.

¹¹ Ephraim khe pharuk hai, butua tei si ya; hakhe bórok Ijibo ring kha yang khe Asiriya-o thángo.

¹² Bórok tháng phuru-o, ang bórokni sago chei bunai; ang bórokno nokhani tokrok hai khe ha-o ongkhor rwui tubunai; bórokni thenta samungrokni bagwi ang bórokno swpraknai.

¹³ Bórok ano yakarwi thángmani bagwi kirimasingcha wng kha! Ani kók khna ya wngma bagwi sokomormung tubunai! Ang bórokno phiyóknai, tamo khe ano kebengwi kók tatal sanai.

¹⁴ Bórok ani thani bwkha bai kap li ya, tamo khe thuyamrogo tongwi kap lai-o; bórok mairok tei angur bwtwirok sanwi bórok ano kebengwi bacha kha.

¹⁵ Ang se bórokno phrwngwi bórokno rak rw-o, tamo khe bórok ani bagwi se hamya chap lai kha.

¹⁶ Bórok bórokni kaham wngnai ya abo haini thani se kiphil si-o; bórok badukhung chúk ya hai se wng si-o; bórokni tẃiphangrok bórok kók nang-nung ya samani bagwi bórokni seng bai butharjak bainai.