HOSEA 6 - Kok Borok (Re-edited) Bible (BSI)

Bororok bwkha kiphilna bagwi sak thar ya wngmani

¹ Him di, chwng Subraiyungni thani kiphilnai; tamni hwn ba bo se kwsabo cha rw-o habo ham rwnai; bo se chwngno swbo swprago tei bo’-no cha rwui tisa-o.

² Salnwini ulo bo chwngno thangcha rw phinai; salthamni salo khe bo chwngno bini bwskango bachaui tongna bagwi mwthangwi tisanai.

³ Phai di chwng si lai anw, Subraiyungno teibo saui manna bagwi káphra lai anw; bo aiprom-poromni ulo pilala wngwi phai tẃi wngnai; bo chini thani uatwi klai tẃi khe phainai, masing molo pantwi hano misi tẃi khe phainai.

⁴ O, Ephraim ang nono tamo khlainai? O Juda nono khe tamo khlainai? Nini hamjakmung phungni pantwi hai abo dakti’-no ranwi thángo.

⁵ Aboni bagwi ang bórokno diyarirokni bising tẃi sra rw kha, ani khukni kóktháirok bai bórokno buthar kha tei ani buj thumma jiliksaui ongkhor kha.

⁶ Tamni hwn ba ang tong phlainai hamjakmungni bagwi se khatungo, ratharmungni bagwi ya, Kaitorno sinina se, sógwi yapharmungrok barokmano ya.

⁷ Tamo khe bórok Adam hai khe kerong swbai kha; bórok ano sak nang ya wng kha.

⁸ Kamiyung Giliad tongmung sitrarok tongo, abo thẃi bai yapri mari bujak.

⁹ Sekpronairok lama-o khoroksa swkni bagwi naisingwi tongma hai, ochairokbo abo hai khlaina bagwi thansa wng kha; bórok Sekemo thángma lama-o borok buthar kha tei abo tẃi khe samung sitra tang kha.

¹⁰ Ang Israil bosongo kirimasingcha tongmung sitra nuk kha; Ephraim khe uaijaui sak phalo, Israilbo tongmung sitra tong kha.

¹¹ O Juda nini bagwibo rana-thumnani jora chongjak. Ang aphuru bórokni talikha ham rw phi anw.