HOSEA 12 - Kok Borok (Re-edited) Bible (BSI)

¹ Ephraim nokbarno se mwrwgo tei sapung salkabaini nokbarno riphrigo; bórok sal brúm brúm tatal tei ur patimung báng rw-o; bórok Asiriyasong bai kók kha lai-o tei Ijibo thok tlango.

² Subraiyung Judiano khoraina tongo tei Jakobno bini tongmungrokni bagwi sátoknai, bini samungrokni bagwi yagul sújaknai.

³ Oksingo tong phuru bo bini takhukni yakorai rom kha tei torwi bo Kaitor bai sólai kha.

⁴ Bo suari bai nang laiwi kwplai wng kha, bo bini thani kabwi chubachu san kha; bo Bethelo Kaitor bai malai kha tei aro Kaitor bo bai kók sa lai kha.

⁵ Subraiyung wng kha sengkrak suarirokni Kaitor, bini mung khe Subraiyung!

⁶ Phiya ba nwng khe hamjakmung tei bujsóino naising twtwi nini Kaitorni thani kiphil di.

Buj thumjakma kókrokno tei uáisa samani

⁷ Tatal khe bandiui sunai bepar thwngnaisa, bo kusupna hamjago.

⁸ Ephraim sa kha, nai di ang gwnang wng kha, sakni bagwi rang-rí aji kha, ani o ajimarokno khoroksa phano cha ya kubuljak tei sumsok hwnwi man glak.

⁹ Ha Ijibo tong phuruni simi Ang’-no nini Subraiyung nini Kaitor; ang nono chongjak Kainok tero ríni nogo ton rwma hai tei uáisa tong phinai.

¹⁰ Ang diyarirokni thani kók sa kha; ang’-no teibo imang-mukthangrok phunugo tei bórokni bising tẃi ang se rwngthomarok sakhlai-o.

¹¹ Giliado sumsok tong khe bórok mungsa chúk ya wngnai. Gilgalo bórok musukrok rathar kha hakhe bórokni háyábo berem saka-o holong burung hai wngnai.

¹² Jakob ha Aramo khárwi tháng kha, aro Israil hik manna bagwi mula kháti kha tei hikni bagwi merarok mwrwgwi kha.

¹³ Subraiyung khoroksa diyarini yak tẃi Israilno ha Ijipni phiyógwi tubu kha tei diyari bai bo mwrwkjak kha.

¹⁴ Ephraim belai joli rw kha; aboni bagwi bini Subraiyung bono sak nang ya wngwi sumsok khlaimani manthaino rwnai.