HOSEA 10 - Kok Borok (Re-edited) Bible (BSI)

¹ Israil khe hom-hom angur buphang hai abo bwthái kwbángma thái-o. Bini bwtháibo báng rwrwk, bo háyábo teibo snam rwrwk; bini habo kaham wng rwrwk tei bini thonglabo rak rwrwk wngo.

² Bórok tabuk hai hwnwi sanai: Chini habugra kwrwi, chwng Subraiyungno ki se kiri ya, hakhe habugra chwngno tamo khlaiwi mannai?

³ Abo bai’-no tabuk bórok sanai; chini habugra kwrwi, abo bai’-no chwng Subraiyungno kiri ya tei hai khe habugra chini bagwi tamo khlai manno?

⁴ Bórok ereng ereng kókrok sa-o; kwrwi kwrwini swmairok tango; abo bai auarni butharnai bithi jabra hai achomsa bumuk pernai.

⁵ Samaria-o tongnairok Bethabenni musuk bwsani thani kwlwibra-o. Bini bororok bini bagwi kap lai-o, bini a takjak mwtaino surinai ochairokbo swkangni bini kwmajak bóromni muisubuk chaui kapnai.

⁶ Bórok habugra kotorni thani yapharjakna bagwi hili hai khe Asiriya-o tlangjak anw. Ephraim lachi rwjaknai, Israilbo bini takjak mwtaini bagwi lachimasingcha wngnai.

⁷ Samariani habugra twi saka-o becheng kuphungsa tẃi wng anw.

⁸ Israilni sumsokni bagwi Abenni ha kuchukrokbo báikhrup báinai. Bórokni háyárogo busu gerepsaui bachanai. Bórok hachukrokno hatháirokno saka-o klai phai di hwnwi sa anw.

Subraiyung Israilrokno buj thumna kók sakhlaimani

⁹ O Israil, nwng Gibea-o tong phuruni simi sumsok khlai kha; aroni simi nwng cho yaui sumsok khlaiwi phai kha. Bórok Gibea-o mechenjak ya diba?

¹⁰ Ang phaiwi kebengwi bororokno sátok phainai; Bórok bórokni mungnwi samungni bagwi yagul su-ui sátokjak phuru khe dopharok bórokno kebengwi thumsa wng anw.

¹¹ Ephraim wng kha masa phrwngjak musuk damri hai nakna samungno hamjaknai; tei ang bini naithok kotokno narwgwi ton kha; Juda al ma chuainai; Jakob bini sakni bagwi moil ma sonai.

¹² Norok sak-sakni bagwi kwthar tongmungno bór di; hamjakmung bwtháino ra di; hakhe khil klaiwi tongma auarno muphun di; tamni hwn ba o jora le Subraiyungno naitukna jora se, hakhe bo phaiwi norokni saka-o mwthangmungno uatwi hai khe ua rwnai.

¹³ Nwng sumsok tongmungno chuai kha, samung cha yano ra kha tei bwthái tatalno khe chá kha. Tamni hwn khe nwng sakni korai malkhungrokno tei nini kwbángma sengkrakrokno bwkha bera kha,

¹⁴ aboni bagwi nini borokno kebengwi chobani khorang sokromwi bachanai, hakhe nini bebak nok kwrakrok chobani salo Betharbelno Salman choprogwi bórokni bumasongno bwsarok bai baksa phondrik-phandrak khlaiwi sokomor tẃi khe sokomornai.

¹⁵ O Israil bosongrok, norokni samung hamya bángma bagwi nwngbo ahaino khlaijaknai. Israilni habugra chádrobo’-no bo sokomorjaknai.