HIBRU 6 - Kok Borok (Re-edited) Bible (BSI)

¹ Hakhe phai di, chwng Khristan kók yaphangno tonwi teibo kaham khe srwngna bagwi bwskango him lai anw. Samung chúk ya samungno yakarwi Kaitorno poito khlai di hwnmani a kók yaphangno haino hai sa laina nang ya;

² baptismarokni kók, yak beramani kók, kwthwirokno mwthangwi tisamani kók, phiya buj kotorni kókno haino hai sa laina nang ya.

³ Phai di, chwng bwskango him lai anw. Kaitor him rw khe chwng him lai anw.

⁴ Tamni hwn ba uslunairokno bahai khe haino hai sumsok yakar rwnai? Salsa bórok Kaitorni pohoro tongmani. Chuknohani rwjakmani abo bórok chánaiwi naijak, bui bai baksa Phola Kwtharno manjak,

⁵ Kaitorni kók kaham se hwnwi bórok chánaiwi saui manjak, phiya phainai molni phanbo saui manjak.

⁶ Hai phano bórok uslu kha. Bórokno haino hai sumsok yakar rwui man glak kha, tamni hwn khe bórok Kaitorni Sajlano tei uáisa kruso kanta bu kha, hakhe luku bwskango bono tikhlaiwi lachi rw kha.

⁷ Uatwi klai klaimano kusupnai a hano Kaitor kaham khlai-o, hakhe abo bwthái bumukrok achai rwui gistini samungo chúk rw-o.

⁸ Phiya ba samsundru bai jabra achai rw kha hwn khe le abo samungo chúk li ya; Kaitor bai swraijakmani abo birman se, hór bai sógwi sokomorjaknai.

⁹ Tamo khe khájani takhukrok, chwng ahai sa phano norokni bagwi chwng bwkha udru mudru wng ya. Norokno mwthangnai manwi kaham norok manmano chwng saui mano.

¹⁰ Kaitor hamya ya, hakhe norok khlaimani a samungno bo pok glak, norok bono hamjagwi Khristan takhukrokno chubamano, phiya tabuk suda chubaui tongmani bo pok glak.

¹¹ Norok khatung-khaja khe tongmani abo nang phaina tẃi khe mol pái ya sak norokni bere jotono ui-ui khe tong thung hwnwi chwng nai kugo.

¹² Norok seler wng thung abo chwng nai ya, tamo khe poito khlaiwi hama lokma bai Kaitor rwna hwnwi kók rwmano mannairokno srwng thung hwnwi se chwng nai-o.

Kaitor kwrak khe kók rwmani

¹³ Kaitor Abrahamni thani kók rw phuru a kók rwma hai’-no bo khlainai hwnwi swmai tang kha. Bini slái kotor khoroksa phano kwrwi wngma bai bo bini sakni mungwi se swmai tang si-o.

¹⁴ “Ang nono hammari rwnai, hakhe nini bosongno er rwnai,” hwnwi bo sa kha.

¹⁵ Abraham khe lok kha, hakhe Kaitor rwna hwnwi kók rwmano man kha.

¹⁶ Borok swmai tang phuru bini slái kotor khoroksa swkni mungwi swmai tango, swmai tang kha hwn khe bororok kók báng laiwi man ya.

¹⁷ Kaitor rwna hwnwi kók rwmano mannairokni thani bo khlaina hwnmani abo phér ya hwnwi Kaitor pháng pháng khe saui man rwna nai-o; abo bai’-no bo kók rw thani swmaibo tango.

¹⁸ Hakhe oro o kók tháinwi tongo, abo phérwi man ya, phiya a kókno tẃiwi Kaitor tatal saui man ya. Abo bai’-no chwng yókna bagwi bini aro khárnairok chwng manna hwnmani abono manna hwnwi kwrak khe khatungna bagwi chwng kaham khe khápang srangjak.

¹⁹ O khatungma chini bwkha-o jingjol hai se. Omo wng kha leke-leke ya, kwrak se, omo chuknohani noktharni rí swngjakni bising tẃi bisingni khotol kwthar bai kwrwngjak.

²⁰ Jisu chini wngwi chini slái swkang aro habwi kha. Melkisedekni ochai bosongo bo mol brúm brúmni ochai bokhorok wng phai kha.