HIBRU 3 - Kok Borok (Re-edited) Bible (BSI)

Musini slái Jisu tor kugo

¹ Kaitor bai ringjaknai Khristan takhukrok, chwng poito khlaimani a tongtharni Ochai Bokhorok wngna bagwi Kaitor rohormani a Jisu Khristoni kókno uansugui nai bai di.

² Musi Kaitorni nogo kaham khe samung khlaima hai bobo abo hai’-no bono chongnai Kaitorni samung kaham khe khlaiwi tongo.

³ Nokni slái a nokno tangnai borok se kaham hwnjak kugo. Abo hai’-no Musini slái Jisu se belai kotor hwnwi romjak kugo.

⁴ Khoroksa swk tang ya khe nok tangjak ya, tamo khe Kaitor wng kha bebak manwino snamnaisa.

⁵ Musi wng kha Kaitorni nogo seleng wngwi kaham khe samung khlai kha, hakhe Kaitor ulo sana hwnmani kókrokno bo sa-o.

⁶ Khristo khe Sajla wngwi Kaitorni nokni nokphangni samung kaham khe khlai kha. Chwng khatungmani abono tẃiwi chwng khá torwi khá ragwi tong khe chwng bini nok.

Kaitorni bororok bathakmani

⁷ Hakhe tabuk, Phola Kwthar hai hwnwi sama hai, “Tumungno norok tini Kaitorni khorang khnaui tong khe

⁸ hakhe norok Kaitorni kena ari wngwi bacha phuru wngma hai, hasing panthoro Kaitorno potaliui phuru a salo wngma hai, norok kók khna ya ta wng si di.

⁹ Aro nokha bisi brwichi jora ang tamo khlai kha abo nugwi phai phano norokni chuchusong ano potaliui nai lai kha hwnwi Kaitor sa-o.

¹⁰ Aboni bagwi’-no a bororokno ang joliui hai hwnwi sa kha, ‘Sal brúm brúm bórok lama korójak, ang dagimano khnana nai ya.’

¹¹ Ang joliui hai hwnwi swmai tong kha, ‘Bórok aro habwi ani thani bathak phai glak!’ ”

¹² Takhukrok, norokni bere khoroksa phano bwkha sitra poito khlai ya wngwi Kaitor kwthangni aroni kiphil ya tẃi hus khe tong di.

¹³ Abo wng yaui elembago “Tini” hwnmani a kók chini bagwi tong sak norokni bere khoroksa phano sumsok bai phemlokjagwi kók khna ya wng ya tẃi khe norok sal brúm brúm chuba lai di.

¹⁴ Tamni hwn ba tumungno chwng puila-o kwrak khe poito khlaimani rom súgwi tong khe hakhe chwng bebak’-no Khristoni sak chalai.

¹⁵ Elembago hai hwnwi sa-o, “Tumungno norok tini Kaitorni khorang khnaui tong khe hakhe Kaitorni kena ari wngwi bacha phuru wngma hai ta wng si di.”

¹⁶ Kaitorni khorang khnaui bini kena ari wngwi bachanai bororok sabo? Musi bai Ijipni ongkhorwi tubujaknai a bororok’-no bacha-o.

¹⁷ Nokha bisi brwichi jora Kaitor sabono jolijak kha? Hasing panthoro klaiwi thwinai a sumsok khlainairokno’-no jolijago.

¹⁸ “Bórok aro habwi ani thani bathak phai glak,” hwnwi swmai tangwi samani abo saboni kókno samani? Bini kena ari wngwi bachanairokno’-no samani.

¹⁹ Hakhe chwng nugo poito khlai li yani bagwi bórok aro habwi man li ya.