HIBRU 10 - Kok Borok (Re-edited) Bible (BSI)

¹ Judai Kerong wng kha a sói manwirokni dok wng súk ya. Omo wng kha manwi kahamrok phaina hwnmani aboni sampili si kho. Bisi brúm brúm abo hai khe pun tok ratharwi phai lai kha. Hakhe Kerong bahai khe aboni bising tẃi Kaitorni thani phainairokno kaham khlainai?

² Tumungno Kaitorno surinairok sumsokni súchajakma te bórok sumsok gwnang hwnwi khá ka glak kha mun, hakhe aswk pun tokrok ratharna nang glak kha mun.

³ Hakhe o pun tok ratharma ba bororokni sumsokno bisi brúm brúm muitu khlai rwui rwma se bla!

⁴ Tamni hwn ba musukni thẃi bai punni thẃi wng kha sumsok swkagwi se man ya.

⁵ Aboni bagwino Khristo o swngcharo phaina phuru Kaitorno hai hwnwi sa-o, “Ratharmanobo nwng nai ya, barokmanobo nwng nai ya, tamo khe nwng ani bagwi bwsak kaisa snam kha.

⁶ Nwng háyá-o pun tok sókmano hamjak ya, sumsok swkakna bagwi ratharmanobo nwng hamjak ya.

⁷ Aphuru ang hai hwnwi sa kha, ‘O Kaitor, ang oro se, katswi Kerong bijabo ani kókmung swijakma hai nini muchung tẃi samung khlaina bagwi ang oro se tongo.’ ”

⁸ Puila bo hai hwnwi sa kha, “Ratharmanobo nwng nai ya, barokmanobo nwng nai ya, háyá-o pun tok sókmanobo nai ya, sumsok swkakna bagwi ratharmanobo nai ya, nwng omorok bebak’-no habo hamjak ya.” Kerong rwksaui omo tẃi khe rathar phano bo o kókno sa kha.

⁹ Aphuru bo hai hwnwi sa kha, “O Kaitor, nini muchung tẃi samung khlaina bagwi ang oro se tongo.” Abo bai’-no agini ratharmungrok Kaitor khibiui rw bai kha, hakhe Khristo sakno rwmani abono tubu kha.

¹⁰ Kaitorni muchung tẃi Jisu Khristo samung khlaima bagwi bo uáisa bai’-no sakno rwma bai chini bebakni sumsok sújak kha.

¹¹ Joto Judai ochai’-no bachaui sal brúm brúm bini samung khlai-o, hakhe a ratharmung’-no ratharmung rathar lai-o. Aile a ratharmani abo sumsokno swkagwi se man ya.

¹² Yang Khristo le sumsokni bagwi uáisano rathar kha, abo mol brúm brúm chúknai, hakhe abo páiwi bo Kaitorni yagra bwkhak achugwi kha.

¹³ Kaitor bini kena arirokno bini yakung yaphangni yakung boksajaknai khlai ya sak bo aro naisingwi tongo.

¹⁴ Hakhe uáisa ratharma bai’-no bo sumsok sújakrokno kaham khlai phlai kha.

¹⁵ Phola kwtharbo haino chwngno sa kha. Puila bo hai hwnwi sa kha,

¹⁶ “Omo’-no phainai molo ang bórokni thani swmai tangna hwnmani a swmai hwnwi Subrai sa-o: Ang bórokno ani kerong si rw anw, phiya abono bórokni bwkha-o swi anw.”

¹⁷ Hakhe bo hai hwnwi sa-o, “Ang bórokni sumsokno tei samung hamyarokno tei muitu khu glak.”

¹⁸ Abo bai’-no omorok se nakarjak bai kha hwn khe sumsok swkakna bagwi tei barokna nang li ya.

Phai di, chwng Kaitor bai tong lai anw

¹⁹ Hakhe takhukrok, Jisuni thẃi bai khe chwng Khotol Kwthar Kugo khá khibiui habwi man súk kha.

²⁰ Aboni bagwino takhukrok, Jisu Khristoni thẃi bai khe chwng kwthar kuk háyá-o khá torwi habwi man kha.

²¹ Kaitorni nokni barja manjak ochai kotorno chwng man kha.

²² Hakhe phai di, bwkha khulasa khe poito kwrak khe Kaitor bai tong lai anw, bwkha sitra kuphur khlaijakno tẃiwi, phiya twi kaham bai súchajak bwsakno tẃiwi chwng Kaitor bai tong lai anw.

²³ Phai di, chwng khatungwi sa laimano kwrak khe romwi tong lai anw, tamni hwn khe Kaitor bini kók narwknai hwnwi chwng khá beraui tongwi mano.

²⁴ Buino hamjak rwna bagwi tei samung kaham khlaiwi rwna bagwi phai di, chwng kiching chwng jogo jogo wng lai anw.

²⁵ Baksa baksa thansa khe kuthum laima yakar kha, phai di, chwng abo hai ta wng di. Abo wng yaui phai di, chwng kiching chwngno bwkha rak rw lai anw, Subraini sal samphaui phai rwrwkmanobo nugwi tong baima ba teibo kaham khe rak rw lai anw.

²⁶ Chwng kubuino saui man baiwi tumungno sumsok khlaina hwnwi khlaiwi tong khe sumsok swkagwi mannai abo tẃi ratharmung kwrwi.

²⁷ Tamo khe ulo wngnani hwnmano simi se kirina tongo, buj thumjaknano tei Kaitorno kebengnairokno sokomornai kirimasingcha hórno simi se kirina tongo.

²⁸ Khoroknwi khoroktham sakkini kók bai Musini Kerong rákhok ya hwnwi khoroksa swk majra romjak kha hwn khe bo butharjak sinai, aro tei mayani kók kwrwi.

²⁹ Hakhe Kaitorni Sajlano sak nangjak ya wngnai a borokni tamo wngnai? Kaitorni swmaini thẃino laitesa khe nuknai a borokni tamo wngnai? Aile a thẃi se bini sumsok súcha-o. Khairokma gwnang Pholano lachi rwnai a borokni tamo wngnai? Uansuk si di, bo bwswk hamya khe yagul sujakna nangno!

³⁰ “Ang akol rwnai, ang yagul sunai,” hwnwi sanaino chwng sini-o; “Subrai bini bororokni buj thumnai,” hwnwi sanainobo chwng sini-o.

³¹ Kaitor kwthangni yago klainai abo kirimasingcha kók se!

³² Agi phuru norok bahai khe tongmani abono muitu khlaiwi nai di. Aphururogo Kaitorni pohor norokni thani pir phuru norok kwbángma tekto rwjagwi sátokjak phano abono soi kha.

³³ Norok uáisa uisu luku bwskango lachi rwjak kha, hamya khlaijak kha, uáisa uisu ba omo tẃi khe khlaijaknairok bai baksa manjakna nai kha.

³⁴ Alongo chopjaknairok bai baksa’-no norokbo tekto man kha, phiya norokni tong kwrwi bebak sekjak phurubo norok bwkha kaham khe soi kha, tamni hwn khe tong phlainai abo tẃi manwi kaham norok manẃi tong kha hwnwi saui man kha.

³⁵ Hakhe norok khá ta bái di, khá bái yaui tong khe sokat kaham mannai.

³⁶ Kaitorni muchungma tẃi khlaiwi manna tẃi khe, phiya bo rwna hwnwi kók rwmano manna tẃi khe norok hama lokna nangnai.

³⁷ Tamni hwn ba elembago hai hwnwi sama hai, “Katswi srapsa hwn khe’-no a phainai hwnmani borok bo phai anw, bo ler glak.

³⁸ Hai phano ani borok kahamrok poito khlaima bai thangnai; phiya ba tumungno khoroksa swk uslu khe ang bono hamjak glak.”

³⁹ Chwng uslu-ui kwmanai omo tẃi bororok ya. Abo wng yaui chwng wng kha poito khlaima bai mwthangjaknai