HIBRU 1 - Kok Borok (Re-edited) Bible (BSI)

Kaitor bini Sajlani bising tẃi kók samani

¹ Agi Kaitor chini chuchusongno diyarirokni bising tẃi kwbángma’-no podrepot khe kók sa kha,

² phiya tabukni o mol páinanogo bo bini Sajlani bising tẃi se chwngno kók sa si-o. Kaitor a Sajlani yak tẃi’-no bebak swngcharno snamo, mol pái phuru bebak’-no bini yago rwna bagwi Kaitor bono’-no chong kha.

³ Bo Kaitorni chẃngsacha bai se kwchang wngo, bo katswi Kaitorno solo; bo bini phan kwplai kók bai bebak swngcharno narwgwi tono. Bororokni sumsok sú baiwi bo chuknoha-o Kwplaisa Kaitorni yagra bwkhak achugwi kha.

Suarirokni slái Sajla kotor kuk

⁴ Kaitor bono bumung rwmani abo suarirokni bumungni slái kotor wngma hai bo suarirokni slái kotor khlaijak kha.

⁵ Tamni hwn ba Kaitor bini suarirokni bere khoroksano phano hai hwnwi sa ya kho, “Nwng ani Sajla; ang tini nini Nwpha wng kha.” Suari khoroksano phano Kaitor hai hwnwibo sa ya, “Ang bini Bupha wngnai, hakhe bo ani Sajla wngnai.”

⁶ Kaitor bini achai granaisa Sajlano o swngcharo rohorna phuru bo hai hwnwibo sa kha, “Kaitorni bebak suarirok bono ma suri bainai.”

⁷ Suarirokni kókno Kaitor hai hwnwi se sa-o, “Kaitor bini suarirokno nokbar hai khlai-o, bo bini samung khlainairokno hórjlai hai khlai-o.”

⁸ Phiya Sajlani kókno khe Kaitor hai hwnwi sa-o, “O Kaitor, nini achukthayung mol brúm brúm tongnai; nwng sói khe’-no nini ha narwgo.

⁹ Nwng kahamno hamjago, hamyano naislerjago: aboni bagwino Kaitor, nini Kaitor nono chong kha, hakhe nini logisongrokni slái nono kotor khlaiwi tongthok rw kha.”

¹⁰ Bo hai hwnwibo sa-o, “O Subrai, yaphango nwng o swngcharno snam kha, nwng yak baithang nokharokno snam kha.

¹¹ Abórok bebak’-no kwma bainai nwng simi se tong rwknai; abórok rírok hai kwcham wng bainai.

¹² Nwng abórokno dulai hai thepnai, abórok rírok haino sláijaknai. Nwng le abo’-no abo tongnai, nwng le kwcham wng phlai glak.”

¹³ Kaitor bini suarirokni bere khoroksano phano hai hwnwi sa ya kho, “Achuk di oro ani yagra bwkhak, khlai ya sak ang nini kena arirokno yakung yaphangni yakung bokjaknai.”

¹⁴ Hakhe suarirok le tamo sla? Bórok wng kha Kaitorni samung khlainai pholarok máng se, mwthangjaknairokno chubana bagwi bórok bo bai rohorjago.