HAGAI 2 - Kok Borok (Re-edited) Bible (BSI)

Nokthar kwtalni chẃngsacha

¹ Darias habugra chámani nokha bisiknwi bisini taldok talni salnwichisa salo Subraiyung diyari Hagaini khúk tẃi hai hwnwi sa kha:

² “Sialtialni bwsla Judani naikolphang Serubabelno tei Jehosadakni bwsla ochai okra Josuano tei tong rwknai bororokno ahai hwnwi sa di,

³ ‘O nok swkango bwswk khe chẃngsacha tongmani abono norokni bisingo nuknai da tong? Abono nwng tabuk bahai khe nuk? Omono mungsa phano wng ya hai wngjak ya da?

⁴ Hai phano o Serubabel nwng bwkha kwrak wng di, hwnwi Subraiyung sa-o; o Jehosadakni bwsla ochai okra Josua bwkha kwrak wng di; o hani bebak bororok norok bwkha rak bai di, hwnwi Subraiyung sa-o; samung tang di, tamni hwn ba ang nwng bai tongo, hwnwi Phankrak Subraiyung sa-o,

⁵ norok ha Ijipni nongkhorwi phai phuru ang norok bai máng tongnai hwnwi swmai tang kha. Ani Phola norok bai tongo; ta kiri di.

⁶ Tamni hwn ba Phankraksa Subraiyung sa-o: Tei kisa tongwi ang tei uáisa nokharokno, hayungno, twijlangno tei hakungno jangri phinai;

⁷ Ang bebak dopharokno kwlwi rwnai tei bórokni bebak rang-rírokno oro tubujaknai tei nokthar rang-rí bai kupulung wngnai.

⁸ O hani bebak rukphai tei rangchakrok ani se.

⁹ O nokthar kwtal swkangni noktharni slái naithok kuknai tei ang oro ani bororokno hamcha rwnai tei tong kwchang rwnai; hwnwi kwplaisa Subraiyung sa-o.’ ”

Diyari ochairokno kók sẃngmani

¹⁰ Darias habugra chámani bisiknwini bisini tei talchuku talni sal nwichibrwini salo kwplaisa Subraiyung diyari Hagaino sa kha:

¹¹ “Phankrak Subraiyung hai hwnwi sa-o: Raidarokno rwgwi ochairokno sẃng di:

¹² ‘Tumungno khoroksa swk bini chumma rí-o khe muihan kwtharno chu-ui tẃi khe tei á búchú auango nang khe eba mui sóngjago angur bwtwi-o eba mungsa swk chámungrok bai nang lai khe abo kwthar da wngwi tháng?’ ” A kók sẃngjak khe ochairok, “I’nhi” hwnwi sa kha.

¹³ Hakhe Hagai hai hwnwi sẃng kha, “Tumung khoroksa swk borok mang kwthwi tangwi kwthar ya wngwi bo mungsa swkno tang khe abo kwthar ya de wng sla?” Hakhe ochairok, “Au, kwthar ya wngo” hwnwi sa kha.

¹⁴ Aphuru khe Hagai hai hwnwi sa kha, “Subraiyung sa-o, abo tẃi kheno o bororok tei dopharok ani mokolo kwthar ya wng kha, aboni bagwi bórok khlaimarok tei yapharmarok abobo kwthar ya máng.”

Subraiyung hamari rwna swmai tangmani

¹⁵ Subraiyung hai hwnwi sa-o, “Tabuk norok kaham khe uansugwi nai si di. Subraiyungni noktharo holong tháisani saka-o tei tháisa holong kwrwi phuru bubo tẃi tongmani?

¹⁶ Khoroksa swk Kilo 200 mai man anw hwnwi khá kaui tháng khe aro Kilo 100 se mano. Norok angur pherethani litar 100 angur bwtwi man anw hwnwi khá kaui tháng khe aro litar 40 se mano;

¹⁷ Ang mai-khul mwran rwui tei bwlái rampra rwui tei kothor khiklaiwi dera rw kha; hai pha’-no nwng ani thani kiphil li ya hwnwi Subraiyung sa-o.

¹⁸ O salni simi, talchuku talni sal nwichibrwi salno naiwi nai di. Subraiyungni noktharni yaphang lumani salni simi naiwi nai di:

¹⁹ Mayam nogo maichwlwi tong rwk li ya de? Tabukbo de khwichang, dalim tei angur thái ya wng kho? O salni simi ang nono hamari rwnai.”

Subraiyung Serubabelno kók rwma

²⁰ A talni sal nwichibrwini salo Subraiyung tei uáisa Hagaino sa kha:

²¹ Judani naikolphang Serubabelno ahai hwnwi sa di, “Ang hayung bai nokharokno jangrina naiwi tongo,

²² Ang dal-bidal dopharokni habugrarokni achukthayungno philsaui khiklainai tei bórokni suarno sokomornai. Ang korai malkhungrokno tei abono kanairokno khiklainai; korai kasanairok bini tei khoroksa kiching palni seng bai butharjaknai.

²³ O Sialtialni bwsla Serubabel ani seleng, ang Subraiyung nono a salo ani sil bujaknai yasitem hai khlainai, tamni hwn ba ang nono saiwi na kha, hwnwi phankrak Kaitor sa-o.”