HAGAI 1 - Kok Borok (Re-edited) Bible (BSI)

Subraiyung nokthar tangna dagima

¹ Darias Parsia-o habugra chámani nokha bisiknwini bisi-o, taldok talni yaphangni salo, Judiani habugra Sialtialni bwsla Serubabelno tei Jehosadakni bwsla Josua ochai bokhorokno diyari Hagaini khúk tẃi Subraiyung hai hwnwi sakhlai kha:

² “Phankraksa Subraiyung hai hwnwi sa-o: o bororok, tabukbo Subraiyungni nokthar tang phina jora sók phai ya kho hwnwi sa lai-o.”

³ Aphuru khe diyari Hagaini khúk tẃi Subraiyung o kók sa kha:

⁴ “O nok se báiwi klaijak, omo hai jora-o norok nok kaham-kahamo tongwi tongna jora diba?

⁵ Aboni bagwi kwplaisa Subraiyung hai hwnwi sa-o: norok bwswk tamo khe tong kha uansuk di.

⁶ Norok bwchlwi sarma le kwbángma yang ma rama le kisicha; norok chá le chá-o tamo khe ok kochom ya gwja; norok nung lai-o hai phano asi ma yók ya gwja; rí le kano, kwchangma yók ya; norok ajima le aji lai-o tamo khe norokni kholjang se kwpla gwja.

⁷ “Norok bwswk tamo khe tong kha abono uansuk di hwnwi Phankraksa Subraiyung sa-o.

⁸ Tabuk bolongo tháng lai di tei buphangrok tubu-ui nok tang lai di; hakhe abo bai ang bwkha phurjaknai tei chẃngsacha wngnai hwnwi Subraiyung sa-o.

⁹ Norok kwbángma ranani khatungo, tamo khe nai di, ra phuru khe kisa se wngwi pái-o; norok abono raui nogo tisa phuru khe ang abórokno subwi kobon rwui rohoro. Ang tamni abo hai khlai? hwnwi Subraiyung hwno. Tamni hwn ba ani nok khe báiwi klaijak yang norok khe bebakno sak sakni nokni bagwi se pái lai ya-hor lai ya wngwi tong lai-o.

¹⁰ Aboni bagwino nokharokni pantwi klainani tei ha-o mai-khul tháinani mwthagwi rw kha.

¹¹ Ang bari-okthairogo, hapung-hatháirogo, mai-khul, angur, thok tei ha-o wngnairok, borok, yabrwirok tei norok kolomtwi khiklaiwi samung tangmarogo uatwino ta ua di hwnwi dagi kha.”

Bororok Subraiyungni dagimano khnama

¹² Aphuru khe Sialtialni bwsla Serubabel, Jehosadakni bwsla ochai bokhorok Josua tei tong rwk báinai bororok bebakno Subraiyung bórokni Kaitor samano tei diyari Hagaino bórokni thani rohorwi bórokni Subraiyung Kaitor samani kókrokno khna kha; tei bororok Kaitorno kiriui bórom khlai kha.

¹³ Hakhe Subraiyungni tẃitun Hagai lukurokno Subraiyungni kókno hai hwnwi sa kha, “Ang nwng bai tongo,” hwnwi Subraiyung sa-o.

¹⁴ Hakheno Sialtialni bwsla Judiani habugra Serubabel, Jehosadakni bwsla ochai okra Josuani bwkhano Subraiyung thangcha rw kha; aphuru khe jotono bórokni Kaitor Phankrak Subraiyungni nokni bagwi samung khlaina cheng lai kha,

¹⁵ abo taldok talni salnwichibrwi phuru wngo.