ESTER 2 - Kok Borok (Re-edited) Bible (BSI)

Ester isiri chámani kók

¹ Abórokni ulo, bugra Ahasuaras jolima ham khe bo Bostino muitu manjak kha tei bo tamo khlai kha a kóknobo muitu wng kha.

² Hakhe bubagrani naikini khlainairok bono hai hwnwi sa kha, “Phai di bubagrani bagwi bwrwi sikla naithok naitugwi tubu anw.

³ Bugra bebak angkor thwgwi’-no bini tẃiphangrokno bwrwi naithok naitugwi auli Susani andoro tubuna bagwi dagi thung, bugrani bwrwirokno mwrwknai Hegaini thani naikini-o tubu-ui phai thung, bo bórokno thok motomrok rw si thung.

⁴ Bugrano bwkha phurwi mannai bwrwino Bostini yakchu-o Isiri wng si thung.” O kók bugrano bwkha srang rw kha. Tei bo abo hai kheno khlai kha.

⁵ Auli Susa-o Judai khoroksa tongo bini mung wng kha Mordekai, bo wng kha Jairni bwsla, bo Benjamin bosongni tei Kis bai Simeini bosong.

⁶ Jerusalemni romwi tlangjaknairokni bere khoroksa, Judani habugra Jekonia bai baksa tlangjaknai, Babilonni bugra Nebukadnejar bai tlangjaknairok.

⁷ Bo Hadasano tor rw kha lok rw kha, abono wng kha Ester, bo khe bukhrani bwsajwk; bini buma bupha kwrwi; a siklajwkma naithok tei kaham, bini buma tei bupha thwi khe bo bono bwsa khlai kha.

⁸ Bugrani dagimarok tei bini kók khamarok sakhlaijak kha tei auli Susa-o Hegaini thani bwrwi siklarokno tubujak kha, Esterbo haino bugrani a andoro tubu-ui bwrwirokni mwrwknaini thani tubujak kha,

⁹ A bwrwi sikla Hegaini bwkhani tẃi’-no wng kha tei bo bono chajak kha; tei bo dakti’-no bono thok-khumrok rw kha tei kanmung-chummung kaham rw kha, bugrani nokni khoroksni bwrwino bono naikini khlaina bagwi rw kha tei tongna bagwi bono kaham kuk nokno rw kha.

¹⁰ Ester sakno sabo tei jaiti-masaba sabo, abono bubagrani thani sa li ya, tamni hwn ba Mordekai abo ta sa di hwnwi sajak.

¹¹ Sal brúmno Mordekai andorni nokhla-o himgurung himgurung phai-o. Ester bahai tong tei bini tamo bahai wng sina bagwi phai-o.

¹² Bubagra Ahasuarasni thani khoroksa khoroksa bwrwi thángnani swkang bwrwirokno thok khum phulwi tonwi naithok rwjago, naithok rwnani bagwi bono taldok thok motom tei mur belengtwi phulwi phiya tei taldok mosolarok phul rwjakna nango.

¹³ Abo hai khe bubagrani aro tháng phuru khe bono bo andorni tlangna muchungma manwino rwui rohorjago.

¹⁴ Sarigo khe bo thángo tei phungo khe tei kaisa andoro kiphilwi phai-o, abo wng kha Sajgaj hwnwi bubagrani hik kotoirokno naikini khlainai, bo haino hai ringjak phi ya khe bubagrani thani tháng phi ya, bubagra bono bwkha phurjak khe tei mung khu-ui ring khe se thángwi mannai.

¹⁵ Tabuk Abihailni bwsajwk Esterni jora sók phai kha, Abihail wng kha Mordekaini bukhra, bo’-no Esterno bwsa snamo, bugrani thani thángna jora sók phai khe, bugrani gurma Hegai bwrwirokno mwrwknai samano karwi bo tei mungsa phano san li ya. Aphuru khe Esterno nuknairok bebakno mokol tháijak bái kha.

¹⁶ Ester bugra Ahasuarasni nok bisingo tlangjakmani abo wng kha bo bugra chámani nokha bisisnini bisi-o talchini tal, Tabet tal klai-o.

¹⁷ Bugra Esterno tei kubun bwrwirokni slái hamjak kuk kha, hakhe bo bini khorogo motok thup rwui rw kha. Bostini yakchu-o bono Isiri chá rw kha,

¹⁸ hakhe bugra chámungni panda kaisa khlai kha, aro bini bebak tẃiphangrokno tei samung tangnairokno kobok kha, abo Esterni mungwi chámung panda se. Bo angkorrokni rangrokno yakarwi rw kha tei yak kuar khe hilirok rw bai kha.

Mordekai habugrano mwthangmani

¹⁹ Tei uáisa bwrwi siklarokno thum phuru, Mordekai bugrani dugayungo achugwi tongmani.

²⁰ Ester, Mordekai dagima tẃi’-no bini sandai-masakni kók, eba bini bosongni kókrokno sa li ya; Ester Mordekainobo swkango bono ring phuru kók khnama tẃi’-no tabukno khnaui tongo.

²¹ A jora-o Mordekai bugrani duglamo achugwi tong phuru Bigthan tei Teres mungwi khoroknwi habugrani gurma, bugrani noyungni duglam mwrwknairok jolijak lai kha tei habugra Ahasuarasno butharna hwnwi kók chap lai kha.

²² A kók Mordekai saui man kha tei bo a kókno Isiri Esterno sa kha tei Isiri Ester Mordekai o kókno sa-o hwnwi Ester habugrano sa kha.

²³ A kókno tẃi naichomwi nai kha, hakhe abo kubuino hwnwi saui manjak kha a borok khoroknwino kotok soro rwui butharjak kha. A kókrok habugrani bwskango’-no bosongni láibuma bijabo tisajak kha.