ESTER 1 - Kok Borok (Re-edited) Bible (BSI)

Isiri Bosti habugra Ahasuarasni kók na ya wngmani

¹ Ahasuarasni molo, Ahasuaras ha Barotni simi ha Ithiopiani, angkor sa-ra tei nwichi-sni hani habugra cháui tongo.

² A jora-o habugra Ahasuarasni achukthayung wng kha Susa-o.

³ Bo habugra chámani nokha bisikthamni jora-o chámung panda kaisa kobok kha, bo aroni bini bebak habugrarokno tei Parsia tei Mediani sengkrak tangphangrokno, bokhorokrokno phiya borok kotorrokno tei bebak angkorni bokhorokrokno aro manjakna bagwi kobok kha,

⁴ Hakhe bo habugra wngwi jolma-jolsa wngmarokno, suar tei bóromrokno sal kwbángma phunuk kha, nokha sal sa-ra tei charchi sal jora bo abo hai khlai kha.

⁵ A sal lái pái khe habugra bini Auli Susa-o bebaknono mukumu rw kha, kotor kotoi bebaknono rw kha, a chámung panda salsni jora wng kha, abo bugrayungni nokhlani khumulwngo wngo.

⁶ A nokhla-o khulni kuphur tei kwkhrang khutwngni rí swngjaknai tongo abo khrangji-ji buduk tei rukphaini hatrai bai khe khajak, thongla jora kwrwngjak, rangchak tei rukphaini snamjak maicha nokhla-o berajak, abo kwchak, kuphur, kwkhrang tei kosom holongrok bai khe khopjak.

⁷ Nungmungrok rangchakni khuri bai khe banta khlaiwi rwjago, kaisa khuri bai tei kaisa khuri sol lai ya, kwbángma khe angur bwtwi rwjak kha.

⁸ Nungma khe sakni kerongno tẃiwi se, khoroksano phano juraboli khe khanjak ya, tamni hwn ba habugra bini bebak tẃiphangrokno janija muchung tẃi’-no chá rw di hwnwi dagi kha.

⁹ A jora-o Isiri Bostibo bwrwirokni bagwi bugra Ahasuarasni noyung bisingo chámungni panda kaisa rwui tongo.

¹⁰ Salsnini salo khe habugra nungwi bwkha tongthokjak kha, hakhe bo bini seleng khoroksni Mehuram, Bijtha, Harbona, Bigtha, Abagtha, Jethar tei Karkassongno khoroksni gurmano ringwi dagi kha, bórok wng kha bugra Ahasuarasni noyung bisingo samung khlainairok.

¹¹ Isiri Bostino Isirini motok thup rwui lukurokno phunukna tubu di hwnwi bórokno dagijak kha, tamni hwn ba bo wng kha belai bwrwi naithok tongmani.

¹² Tamo khe isiri Bosti gurmarok bai khe lamjagwi habugrani dagima hai phaina lon li ya. Aboni bagwi habugra bwkha bising bising belai khe jolijak kha.

¹³ Hakhe habugra kerong kwrwngrok tei elemirokno kókbiti nanani raida tongma ba bo bórokno omono tẃiwi sẃng kha.

¹⁴ A kókbiti rwnairokni bere; Karsena, Sethar, Admatha, Tarsis, Meres, Marsena tei Memukan tei Parsiani khorokchi bugrani bwsarok tei Mediani borok wng kha bugrani bwskango tongnairok tei bugrani achukthai kuchuk kugo achukjak.

¹⁵ “Raidano rwksaui Isiri Bostino tamo khlainai, tamni hwn ba bo bugra Ahasuaras bini gurmarokno rohorwi dagimani kókno khna li ya?”

¹⁶ Hakhe habugrani tẃiphangrokni bwskango Memukan hai hwnwi sa kha, “Isiri Bosti nini thani samung cha ya khlai kha abo simi ya, bo bebak tẃiphang tei habugra Ahasuarasni ha gwnangwi bororokni thanibo omo khlai kha.

¹⁷ Omo hai khlaima kókno bebak bwrwirokno saui man rwjaknai, omo bórokni bwsai-bwsano sak nang ya wng rw anw tei bórok sa anw bugra Ahasuarasni Isiri Bostino bini thani phaina bagwi dagi kha bo phai yaui tong kha.

¹⁸ Bugrani tẃiphangrokni Parsia tei Mediani, bwrwirok Isirini kókno khna khe, bórok tẃiphangrokno sa laina cheng anw tei sak nang ya wng lai anw tei belai khe jolijak lai anw.

¹⁹ Bugra omono chajak khe bini khukni o kók dagima nongkhor anw tei o raida Parsia tei Mediani bisingo swijak thung, Isiri Bosti tei bugra Ahasuarasni bwskango phaiwi man glak kha tei bini slái kaham kukno Isiri chá rwjak thung,

²⁰ A dagijakma nongkhor kheno ha gwnangwi kók auaijak kha, bebak ha gwnangwini bwrwirokno bórokni bwsaisongni kókno ma khna báinai, kotor-kotoi bebakno o kók ma khna báinai!”

²¹ O kók bugra tei bebak tẃiphangrok’-no chajak kha tei bugrabo Memukan sama haino khlai kha,

²² bo bebak bini ha gwnangwini angkor brúmno kóktun rohor kha, bini mung swiwi bebak borokni thani’-no tei bórokni sak-sakni kók bai khe omono pír thung hwnwi rohor kha.