EPIS 6 - Kok Borok (Re-edited) Bible (BSI)

Chwrai bai buma buphani kók

¹ O chwrairok, ma-phani kók khna di, abo Subrai nai-o.

² “Nini ma-phani kók khna di,” omo’-no puila kara gwnang dagima. A kara khe omo hai:

³ “abo baino bebago’-no nini kaham wng anw, phiya nwng ha-o dwgwi tongwi man anw.”

⁴ O bupha hwnjaknairok, chwrairok jolijakna tẃi khe ta khorai di. Aboni slái Subrai naima haino bórokno kók khna rwui phrwngma bai snamwi tisa di.

Seleng bai nokphangni kók

⁵ O selengrok, norok kirima gwnang khe o swngcharni nokphangni kók khna di, Khristoni seleng khatima hai khe khá sutrang khe kók khna di.

⁶ Kaham hwnjakna bagwi nokphang naiwi tong phuru simi omo hai ta wng di, tamo khe Khristoni seleng wngma tẃibo Kaitor naima tẃi khá rwui samung tang di.

⁷ Borokni bagwi simi ya, Subraini bagwi se samung tango hwnwi uansugui seleng khati di.

⁸ Muitu narwk di, seleng phano wng thung, eba seleng ya phano wng thung, joto borok bini samung kahamni bagwi Subrai bai sokat rwjaknai.

⁹ O nokphangrok, norokni selengrokno norokbo ahaino khlai di; bórokno ta sikiri si di. Muitu narwk di, norok bai norokni selengrok norok nokphang thansani borok, bo chuknoha-o tongo, bo jotono baksa khe nugo.

Kaitorni da-seng

¹⁰ Kók páithak hwn khe omo hai, Subrai bai thansa wngwi bini phankrak phan bai rak di.

¹¹ Soitan phemlok khe norok kwrak khe bachaui manna tẃi khe Kaitor rwmani bebak da-seng tẃi di.

¹² Chwng borok bai choba nang lai ya, tamo khe nokha sakani mwtai hamyarok bai, phiya o mwnakjak mol hamyani bugrarok, bokhorokrok tei swngcharni phan gwnangrok bai se choba nang lai-o.

¹³ Abo baino Kaitorni da-seng khocha di. Hakhe a kena ari sók phai phuru norok kasu sógwi man anw, phiya choba nang lai baiwi norok kwrak khe bachaui tongwi man anw.

¹⁴ Abo baino tiyar khe bacha di, bwchango kubuino kha di; kahamno khaklap katijaknai hai khe chumui na di;

¹⁵ khá kwchang rwnai Kothoma Kahamno sana bagwi tiyar wngmano yakungo yaklap hai khe ká di.

¹⁶ Poitono phui hai khe tẃiwi máng tong di, omo baino Soitan aswk hór gwnang makal kokmarokno norok kati rwui man anw.

¹⁷ Mwthangnaino khorok katijaknai hai khe thubui na di, phiya Phola rwmani Kaitorni kókno seng hai khe na di.

¹⁸ Kaitorno chuba di hwnwi suri sanwi omorokno khlai di. Phola norokno khlai rw tẃi’-no bebago’-no suri san di. Abo hai wngna tẃi khe norok sichaui tong di, ta yakar di; Kaitorni bebak bororokni bagwi suri san máng tong di.

¹⁹ Ang kók sana phuru Kaitor ano kók kaham rwna tẃi khe ani bagwi’-no norok suri san di. Ang khá torwi Kothoma Kahamni bisingni kók swbaiwi saui manna tẃi khe suri san di.

²⁰ Ang tabuk alongo tong phano o Kothoma Kahamni bagwi ang’-no rohorjaknai. Ang omono sana nangma haino khá torwi saui manna tẃi khe ani bagwi suri san di.

Kók páithak

²¹ Ang tamo khe tongwi tong kha abo norok saui manna tẃi khe chini khájani takhuk Kaitorni samungo seleng kaham Tukhik ani kókno bebak’-no norokno sa anw.

²² Aboni bagwino bono ang norokni thani rohoro, chwng bebak’-no tamo khe tongwi tong kha abono norokno saui khá rak rwna bagwi ang bono rohoro.

²³ Apha Kaitor bai Subrai Jisu Khristo bebak takhukrokno poito khlai rwui khá kwchang rw thung, hamjak rw thung.

²⁴ Chini Subrai Jisu Khristono hamjak phlaiwi tongnai bebak bororokno Kaitor khairok thung.