EPIS 4 - Kok Borok (Re-edited) Bible (BSI)

Bwsak kaisa

¹ Subraini samung khlaiwi tongma bai ang alongo chopjagwi tongnai norokno o kók sa ja-o, Kaitor norokno ring kha ba norok a ringjakma tẃi’-no tong di.

² Sal brúm brúm koinene khe tong di, kwchang kwchang khe tong di, khá logwi tong di; khoroksa tei khoroksano hamjagwi hama lok lai di.

³ Phola norokno khá baksa khlaimani abono norok kwthaui thansa wngma bising tẃi narwkna nai di.

⁴ Norok Kaitor bai ringjagwi khatungmani abo kaisa se, abo haino bwsakbo kaisano tongo, Pholabo kaisano tongo,

⁵ Subraibo kaisa, poitobo kaisa, baptismabo kaisa se.

⁶ Bebak borokni bagwi Apha Kaitorbo kaisa se, bo bebak borokni Subrai, bebakni bising tẃi samung khlai-o, phiya bebago’-no tongo.

⁷ Khristo rwma swk’-no chwng jotono suar rwjak kha.

⁸ Elembago hai hwnwi sama hai, “Bo kuchugo kasaui tháng phuru khajakrokno kwbángma bini logi tlang kha; bo bororokno rwmung rw kha.”

⁹ Tabuk, “bo kasaui tháng kha” hwnmani abo tamo hwnmani? Abo wng kha puila’-no bo ongkhorwi phai gra kha hwnmani, abo wng kha ha tola-o ongkhorwi phaimani kók se.

¹⁰ Hakhe ongkhor khlaiwi phainai a borok se kuchugo kasanai a borok; bebak swngchar gwnangwi bo tongmano supungna bagwi bo chuknohani slái teibo kuchugo tháng kha.

¹¹ Bo se “bororokno rwmung rwnai”; baksano bo chonghor chong kha, baksano diyari chong kha, baksano pírnai chong kha, baksano ba mwrwknai bai phrwngnai chong kha.

¹² Kaitorni samung khlaina hwnwi Kaitorni bebak bororokno tiyar khlaina bagwi, phiya Khristoni bwsakno rak rwna bagwi se bo omono khlai-o.

¹³ Abo baino chwng bebak’-no poito khlai thanibo, Kaitorni Sajlano saui man thanibo thansa wngnai; chwng chakra wngnai, Khristo torma lokma tẃi chwngbo torwi logwi chakra wngnai.

¹⁴ Aphuru chwng tei chwrai tong glak, hakhe phatra bororok phrwngma bai twi aphal bai kochok rwjakma hai, nokbar sib brúm brúm yang yang kobon rwjakma hai chwng abo hai kochok rwjak glak, kobon rwjak glak. Abo tẃi bororok buino bandiui lama koró rw-o.

¹⁵ Abo wng yaui chwng buino hamjagwi kók kubui sama bai chini bokhorok Khristo hai bebago’-no ma torthai.

¹⁶ Bini jarwi bwsakni juda juda bebak bedekrok chwrapsa khe nang laiwi tongo, hakhe jora bai jora kwphaui tongma bai se bebak bwsak songchajagwi tongo. Hakhe juda juda bedek janijani samung khlai khe bedek bwsak torwi hamjak laima bising tẃi rak rwrwgo.

Tongmung kwtal

¹⁷ Hakhe Subraini mungwi ang norokno hai hwnwi ragdama khlai-o: Norok poito kwrwirok hai khe ta tong si di, bórokni uansukmarok samung chúk ya,

¹⁸ phiya bórokni bwkha mwnakjak. Kaitor bai mwthangjaknairok bai baksa bórok khopjak ya, tamni hwn khe bórok sibo si ya, kókbo khna ya gwja.

¹⁹ Bórok mungsano phano lachina rwng li ya gwja; bórok sak tongthok tongwi yak láiwi tongmung sitra tongo.

²⁰ Abo norok Khristoni kók swrwngmani abo ya!

²¹ Norok bini kókno khnama le khna kha, hakhe norok bini sagri wngwi Jisuni thani tongmani a kubuino phrwngjak kha.

²² Agi norok tongmani a tongmung kwchamno khibi di a tongmung kwcham sak tongthok tẃi tongwi komorwi thángna naiwi tong kha.

²³ Norokni bwkha uansukmarokno kwtal khlai sukna nangnai.

²⁴ Norok borok kwtal wngna nangnai, a borok kwtal Kaitorno kosol khe snamjak, abo kwthar khe kaham khe tongmung kubui tongmano phunugo.

²⁵ Hakhe tatal ta sa si di. Jotono bini takhukno kók kubui ma sa thai, tamni hwn khe chwng bebakno thansa wngwi Khristoni bwsakni yakung yak wngo.

²⁶ Jolima dalsa bai norok sumsok ta khlai di. Joli khe sal hap ya sini’-no ham di.

²⁷ Soitanno lama ta rw di.

²⁸ Khoknai borok ta khok si thung, bo kaham khe tongna bagwi, phiya kwrwirokno chubaui manna bagwi samung tang thung.

²⁹ Búkhúk hamya ta tikhlai di, tamo khe norokni kók khnanairokni kaham wngna tẃi khe khá rak rwnai phiya samung nangnai abo tẃi kók simi sa di.

³⁰ Kaitorni Phola Kwtharno khá ta nang rw di, tamni hwn ba Kaitor norokno phiyók anw abo tẃi sal phai anw, Phola wng kha aboni sil buma se.

³¹ Bwkha hamya ta wng si di, thamchi ta ka si di, ta joli si di, ta sokorom si di, ta kul si di, bebago’-no ta naisler si di.

³² Abo wng yaui norok kiching norok khairogwi hamjak lai di, phiya Kaitor norokno nakarma hai norok kiching norokbo nakar lai di.