EPIS 2 - Kok Borok (Re-edited) Bible (BSI)

Kwthwirok mwthangjakmani

¹ Kók khna ya wngma bai phiya sumsok khlaima bai norok agi Kaitorni mokolo kwthwi se.

² Aphuru norok o swngcharni lama hamya-o máng him laijak. Tabuk Kaitorni kók khna ya bororokno kók khna rwnai nokhani mwtairokni a bokhorokni kók se norok agi khna lai-o.

³ Sói’-no chwngbo bebak’-no a bororok haino, chwng hai’-no muchung tẃi tong lai kha, sak muchung tẃi’-no, khá muchung tẃi’-no chwng khlai lai kha. Swngcharni joto borok Kaitor bai jolijagwi yagul sujakma hai chwngbo jolijagwi yagul sujakna nangnai.

⁴ Tamo khe Kaitor belai maya gwnang, bo chwngno belai khe hamjago,

⁵ hakhe kók khna ya wngwi chwng bini mokolo kwthwi wngwi tong phuru bo chwngno Khristo bai baksa mwthang kha. Kaitor khairokma bai se norok mwthangjago.

⁶ Chwng Khristo Jisu bai thansa wngwi chuknoha-o bo bai baksa kuchugo achuk rwjakna hwnwi Kaitor chwngno Khristo Jisu bai baksa tisa kha.

⁷ Bo Khristo Jisu tẃi chwngno hamjagwi aswk belai khairokmano mol brúm brúm phunukna bagwi se bo omono khlai-o.

⁸ Tamni hwn khe Kaitor khairokma bai se norok poito khlaima bising tẃi mwthangjago. Omo norok samung khlaima bai ya, Kaitor rwma bai se.

⁹ Omo norok samung khlaima bai wng ya ba oro kók kotor sanani kusubu kwrwi.

¹⁰ Kaitor wng kha chwngno Snamnaisa, hakhe Khristo Jisu bai thansa wngwi samung kaham khlaiwi tongna bagwi bo chwngno snam kha, a samung kahamno chwngno khlai rwna bagwi bo tiyar khlaiwi páijak.

Khristoni bising tẃi kwthamani

¹¹ Norok buini borok wngwi achainairok, norok agi bubo tẃi tamo abono uansugui nai di. (Sakno sakur rajak hwnnai Judairok se norokno sakur rajak ya hwno, o sakur ra-o hwnmani abo borok bukur ramano se hwno.)

¹² Aphuru norok Khristo bai hakchaljak. Norok aphuru phatarsa wngwi tongmani, norok aphuru Kaitorni chongjak bororokni bisingo klai ya wngwi tongmani. Kaitor bini bororokno rwna hwnwi kók rwmano tẃiwi swmai tangma-o norokni manthai kwrwi. Norok o swngcharo khatung yaui tongmani, Kaitor kwrwi wngwi tongmani.

¹³ Tamo khe norok salsa hakchalo tongnairok Khristo Jisu bai thansa wngwi tabuk Khristo thwima bai gana tubujak kha.

¹⁴ Tamni hwn khe Judai bai buini bororokno dopha kaisa snamwi Khristo se chwngno kwtha rw si-o. Bórokno kak lai rwui kena ari snamwi tubumani a berano Khristo Jisu bini bwsak bai swbai kha.

¹⁵ Bo bai thansa wngma tẃi dopha kwnwino kaisa khlaina bagwi Judai Kerongo khlai di hwnmarokno bebak swkwmaui rw bai kha, omo tẃi khe bo kwtha rw kha.

¹⁶ Khristo kruso thwima bai kena ari wngmarokno sokomorwi rw kha; krusni bising tẃi bo a dopha kwnwino thansa khlaiwi bwsak kaisa khlai kha, hakhe bórokno Kaitorni thani tubu kha.

¹⁷ Abo baino Khristo phaiwi kwtha lainani Kothoma Kahamno jotoni thani pír phai kha, norok Kaitor bai hakchal khe tongnai buini bororokni thanibo pír phai kha, norok bini gana tongnai Judairokni thanibo pír phai kha.

¹⁸ Chwng bebakno Judai bai buini bororok Phola kaisa tẃi Aphani bwskango phaiwi man laimani, abo Khristoni bising tẃi se phaiwi mano.

¹⁹ Abo baino norok buini bororok norok tei phatarsabo wng li ya, sinijak yabo wng li ya; norok tabuk Kaitorni bororok bai sak baksa wng kha, phiya Kaitorni nokni borok wng kha.

²⁰ Norokbo chonghorrok bai diyarirok lumani a nokthai-o snamwi tisajak kha, Khristo Jisu sak baithang nok busuni holongthai.

²¹ Bo se nokno bebak kwcha rwui tonnai, phiya abono Subraini thani nok kwthar snamwi tonnai.

²² Bo bai thansa wngwi norokbo tei bebak bai baksa nok snamwi tisajago, aro Kaitor bini Pholani bising tẃi tongo.