EPIS 1 - Kok Borok (Re-edited) Bible (BSI)

¹ Ang Pol omono swihoro, ang Kaitorni muchung tẃi Khristo Jisuni chonghor. Khristo Jisuno poito khlaiwi kaham khe tongnai Episni Kaitorni bororokno ang omono swihoro.

² Chini Apha Kaitor bai Subrai Jisu Khristo norokno khairok thung, norokno khá kwchang rw thung.

Kaitor chini kaham khlaimani

³ Phai di, chini Subrai Jisu Khristoni Bupha Kaitorno chwng hambai rw lai anw. Tamni hwn khe Khristo bai chwng thansa wngma bising tẃi bo chuknohani tong kwrwi bebak’-no rwui chini kaham khlai kha.

⁴ Kaitorni bwskango chwng kwthar khe majra kwrwi wngna tẃi khe o swngchar snamjak ya sini’-no Kaitor chwngno Khristo tẃi bini borok wngna hwnwi chong kha. Kaitor chwngno hamjakma bai

⁵ bo Jisu Khristoni bising tẃi chwngno bwsa khlaina hwnwi khá chongwi páijak omo bo kaham hwnwi khá chongmani.

⁶ Kaitor belai khe khairogwi bini khájani Sajlani bising tẃi chwngno ahaino rwmani aboni bagwi phai di, chwng bono lob lai anw.

^7-8 Tamni hwn khe Khristoni thẃini jarwi chwng phiyókjak kha, tamni hwn ba chini sumsok nakarjak kha, Kaitor bwswk se khairogwi tong! Abo baino bo chwngno aswk belai khe khairok kha. Bo sima nukma bai

⁹ Kaitor bo khlaina hwnwi khá chapmano khlai kha, hakhe bo bini khá bisingni kókno chwngno saui man rw kha, abo Khristoni bising tẃi khlaina hwnwi khá chongmani.

¹⁰ Kaitorni khá bisingni kók wng kha bo Khristono bokhorok snamwi bebak’-no thansa khlainai, chuknoha bai o swngcharni bebakno’-no thansa khlainai, jora phai súk khe bo abono khlainai.

¹¹ Bebak samung’-no Kaitor chapma tẃi tei Kaitor chongma tẃi’-no khlaijago; Kaitor bini khá chapma bai Khristo bai thansa wngma bising tẃi chwngno bini borok wngna hwnwi chong kha, abo yaphangni simi bo khá chongwi phaima tẃi’-no khlaijak kha.

¹² Chwng Khristono puila khatungnairok phai di, chwng Kaitorni chẃngsachano lob lai anw!

¹³ Norokbo haino wng gramani; norok a kók kubui khnaui, norokno mwthangnai a Kothoma Kahamno khnaui norok Khristono poito khlai kha, hakhe Kaitor bo rwna hwnwi kók rwmani a Phola Kwtharno norokno rwma bai norokno bini borok hwnwi sil bu kha.

¹⁴ Kaitor bini bororokno rwna hwnwi kók rwmani abono chwng mannai, phiya Kaitor bini bororokno phiyók rw suknai, Phola Kwthar se abono chwngno saui man rw suknai. Phai di, chwng bini chẃngsachano lob lai anw.

Pol suri sanmani

¹⁵ Aboni bagwino norok Subrai Jisuno poito khlaimani kókno tei Kaitorni bebak bororokno norok hamjakmani kókno khnaui

¹⁶ ang norokni bagwi Kaitorno hambai rwmani thak ya. Suri san phuru ang norokni kókbo sa-o;

¹⁷ ang chini Subrai Jisuni Kaitor, a chẃngsajak Phani thani Pholano norokno rw di hwnwi sano. Norok Kaitorno saui manna tẃi khe a Phola norokno si rwui Kaitorno phunuknai.

^18-20 Tamono khatungna bagwi Kaitor norokno ring kha, bo bini bororokno rwna hwnmani abo bwswk se kwbángma, phiya chwng poito khlainairokni bisingo bini phan bwswk se kwrak, abono norok saui manna tẃi khe norokni bwkhano glangsa phiyogwi rw thung hwnwi ang Kaitorni thani sano. Kaitor Khristono kwthwini mwthangwi tisaui chuknoha-o bini yagra bwkhak achuk rwmani a phan kwrak’-no chini bisingni o phan.

²¹ Chuknohani bebak bugrarok, bokhorokrok, phan gwnangrok tei hodarokni slái phano Khristo kuchugo achuknai; bo o mol bai phainai mol bai kwplai hwnjaknairokni slái kuchugo tongnai.

²² Kaitor bebakno Khristoni yakung yaphango tubu kha, hakhe bebakni bokhorok snamwi mothano rw kha.

²³ Motha wng kha Khristoni bwsak se, bini bai bo kupulung, bo sak baithang’-no aswk manwirokno swngchar gwnangwi supung kha.