EJRA 7 - Kok Borok (Re-edited) Bible (BSI)

Ejra Jerusalemo phaiwi sók phaimani

¹ Aboni ulo Artasarses Parsia-o habugra chámani molo Ejra wng kha Seraiani bwsla, bini bosongrok khe omo hai; Seraia Ajariani bwsla, Ajaria Hilkiani bwsla,

² Hilkia Salumni, Salum Sadokni, Sadok Ahitubni

³ Ahitub Amariani, Amaria Ajariani, Ajaria Meraiotni,

⁴ Meraiot Jerahiani, Jerahia Ujini, Uji Bukini,

⁵ Buki Abisuani, Abisua Phinehasni, Phinehas Eliasarni bwsla, Eliasar khe Ochai bokhorok Aronni bwsla.

⁶ O Ejra’-no Babilonni thángo. Bo wng kha swi kwrwng tei Israilni Kaitor Subraiyung rwmani Musini kerongno belai kaham khe si-o; Subraiyung bini Kaitorni yak tongmani bagwi bo naimani manwirokno habugra bono ma rw kha.

⁷ Artasarses habugra chámani nokha bisisnini bisi-o Ejra Israilni kisa swk borokno, ochairokno, Lebirokno, noktharo rwchapnairokno, duglam mwrwknairokno tei noktharni samung tangnairokno tẃiwi Babilonni Jerusalemo tháng kha.

⁸ Tei bo Jerusalemo phaimani wng kha habugra chámani nokha bisisnini talbani talo sók phai-o.

⁹ Bo Babilonni thángma puila talni puilani salni simi thángnani chengwi Kaitorni yak tongma bai nokha talbani puila salo Jerusalemo sók phai kha.

¹⁰ Ejra bini sakno Subraiyungni kerongno kaham khe porinani, abono khlainani tei bebak aroni kerongno kaham khe Israilni bororokno phrwngnani bagwi khá chong kha.

Artasarses Ejrano kóktun kangsa rwmani

¹¹ Omono Artasarses Israilrokno Subraiyung rwmani a kerong bai bini dagimarokno ochai, Ejra tei elem kwrwngrokno kóktun swihormani.

¹² Habugra Artasarses Chukhani Kaitorni kerongno tẃiwi elem kwrwng ochai Ejrano rohormani.

¹³ Ang dagi-o, ani ha gwnangwi tongnai bebak Israilni bororok ochai eba Lebirok, muchungnai bebakno Jerusalemo nwng bai baksa thángnani rwjaknai.

¹⁴ Ang tei ani khoroksni kókbiti rwnairokno Jerusalem bai Juda-o Kaitorni a kerong nini yago tongmani bahai khe tẃijak ya nainani bagwi rohoro,

¹⁵ Tei habugra bai bini kókbiti rwnairok bai muchungwi Jerusalemo tongnai Kaitorno yapharmani rangchak bai rukphai

¹⁶ tei Israilni bororok muchungwi rwnai Jerusalemni bororokni Kaitorni bagwi rwmarokno,

¹⁷ nwng a rangrokno kaham khe na bainai tei abo bai musukrok, mera bwsarok, mairok tei angur bwtwirok paiwi Jerusalemni noktharni háyá-o abono ma yapharnai;

¹⁸ nini Kaitor muchungmani hai tei nini takhukrok kaham hwnwi chong laimani tẃi’-no rangchak, rukphai tong rwkmano samungo phnang di.

¹⁹ Noktharni samungni bagwi rwjakmani manwirokno nwng Jerusalemni Kaitorno ma yaphar bainai,

²⁰ nwng noktharni bagwi nangmani kubun manwirokno habugrani rangkhókni’-no kariui man anw.

²¹ Ang habugra Artasarses twima nar amchoini rangkhók mwrwknai tẃiphangrokno dagi-o; Kaitorni kerong phrwngnai ochai Ejra san tẃi’-no norok rwui rw di,

²² 3400 kilo rukphai, 10,000 kilo gom, 2000 litar angur bwtwi, 2000 litar olibni thok,

²³ samung nangma jora tẃi, hakhe bo ang bai tei ani ulo habugra chánairok bai jolijak ya wng ya tẃi khe,

²⁴ nwng ochairok, Lebirok, rwchapnairok, mwrwknairok, samung tangnairok tei o nokthar bai kwrwngnairokno bórokni thani rang ma thum glak.

²⁵ Nwng Ejra, Kaitor nono elem rwma tẃi’-no tẃiphang bai buj thumnairokno, twima naro tongnai tei nini Kaitorni kerongno nainani bagwi tei buj thumnani bagwi ma chongnai. Tei nwng kerong siyarokno ma phrwngnai

²⁶ khoroksa swk nini Kaitorni kerongno tẃi ya khe tei habugrani raidano khna ya khe a borok butharjakma bai eba hani tikhlai rohorjakma bai eba, bini manwi sekjakma bai eba, alongo chopjakma bai khe buj kotor thumjaknai.

Ejra Kaitorno lobmani

²⁷ Subraiyung chini chuchusongni Kaitor lobjak thung. Jerusalemo tongma Subraiyungni nokno naithok rwnani bono khá ka rw-o.

²⁸ Sói’-no ang habugrarokni bwskango tei tẃiphangrokni bwskango tei phan gwnang tẃiphangrokni bwskango bini hamjakmano phunuk kha. Angbo ani Subraiyung Kaitorni yak ani saka-o tongma bai ang khá tor kha tei Israilni kolok kotorrokno ang bai baksa thángna bagwi thum kha.