EJRA 6 - Kok Borok (Re-edited) Bible (BSI)

Sairas dagimano naitugwi manmani

¹ Hakhe habugra Darias Babilonni habugrarokni bijabo swijak tongmano naituk rw kha, abo láibumano rwknai bandarini yago tono

² tei Media amchoini Ekbatana noyungo a swijak bodolno man kha, aro hai hwnwi swijak tongo,

³ Sairas habugra chána chengmani bisi-o hai hwnwi dagi kha, Jerusalemni Kaitorni nokthar haino hai tang phijaknani wng thung, ratharmani tei sógwi yapharmani thani abo chukmani mitar 27 tei uarmani khe mitar 27 ma wngnai.

⁴ Aboni chokdeual khe kaitham holongdap bai tei uáisa khe buphang bai ma snamnai, bebak rang nangmani khe, habugrani rangkhók bisingni swbaijaknai.

⁵ Tei Kaitorni noktharni bisingni rangchak bai rukphaini manwirokno Nebukadnejar bai Jerusalemni Babilono tubujakmani abórokno kiphilwi rwjakna wng thung, Jerusalemni Kaitorni noktharo tlangwi agi tongma’-ono tonnani wng thung.

Darias samung tang phina dagimani

⁶ “Twima ayang nar amchoini hastepha Tatenai tei Setharbojenai phiya aroni tangphangrok, norok tabuk aroni hakchal wng si di;

⁷ Kaitorni nok tangma-o ta kebeng lai di. Agi tongma’-ono Judaini hastepha bai Judaini okrarok Kaitorni nokthar tangnani wng thung,

⁸ teibo ang o Judai okrarok Kaitorni nok tangma-o norok tamo khlaina nangno dagi-o, a bororokni bebak rang nangmani abo twima nar amchoi-o aswk rang, teksrok thumjakmani habugrano kariui daktino rwjaknani wng thung.

⁹ Tei Jerusalemni ochairok chuknohani Kaitorno sógwi yaphar phuru-o nangmani damri musukrok merarok, mera bwsarok, gomrok, sóm, chuak tei thokrok sal brúm brúm’-no koró ya tẃi khe bórokno rwnani wng thung,

¹⁰ hakhe bórok chuknohani Kaitor khá hamna tẃi yaphar mung yapharwi habugra bai bini bwsarokni hamarini bagwi suri sanna bagwi,

¹¹ ang teibo kwrak khe dagi-o, ani o kókno khna ya bororokno khe bini nokni buphangni phaklaino sokhlaiwi najaknai tei bono tisaui aro atur supjaknai, abo hai cha ya khlaimani bai bini nok khe khini hathái snamjaknai.

¹² Kaitor sak baithang Jerusalemni khulumjaknai hwnwi chongmano habugra bai tei bororok bai abono yak tisaui noktharno swbainani nainairokno, Darias hai hwnwi dagi-o, abo kaham khe naichomwi khlaijaknani wng thung.”

Nokthar yapharjakmani

¹³ Hakhe twima nar amchoini hastepha Tatenai, Setharbojenai tei bórokni tẃiphang palrok habugra bai dagijakma hai’-no kaham khe khlai lai kha.

¹⁴ Aphuru Diyari Hagai bai Iddoni bwsla Sakariasongni bwkha bacha rwmani kók bai Judaini tẃiphangrok nokthar tangmani samung belai kodo wng kha, bórok Israilni Kaitor bai tei Parsiani habugrarok Sairas tei Artasarses bai tholjakmani hai’-no nokthar tangma pái kha.

¹⁵ Darias habugra chámani nokha bisidokni Adar talni salthamni salo bórok nokthar tangma pái súk kha.

¹⁶ Hakhe Israilni bororok, Ochairok, Lebirok tei bebak buini ha-o tongmani kiphilnairok tongthokma bai Kaitorni noktharno yaphar laima panda khlai lai kha.

¹⁷ Bórok Kaitorni nokthar yapharma panda-o Musuk mak 100, Mera mak 200, Mera bwsa 400 yaphar lai kha tei bebak Israilni bagwi punjua mak chinwi sumsokni bagwi yapharmung ma yaphar kha, abo Israilrokni bagwi bosongno rwgwi ma yaphar kha.

¹⁸ Tei Musini bijabo swijak tongma hai’-no Jerusalemni Kaitorni noktharo samung tangnani bagwi ochairok bai Lebirokno samung banta khe rw lai kha.

Yókma terni panda

¹⁹ Buini hani kiphilwi phainai bororok puila talni sal chibrwini salo yókma terni panda khlai lai kha,

²⁰ bebak ochairok bai Lebirok sak sakno kwthar khlai lai kha, bórok bebak’-no kwthar wng kha, hakhe bórok bebak buini hani kiphilnai takhukrokni bagwi ochairokni bagwi tei bórokni bagwi yókma terni mera rathar lai kha.

²¹ Buini hani kiphilwi phainai Israilrok tei Subraiyung Israilni Kaitorno khulumna bagwi o ha-o borok hamyarok bai kagwi bórokni thani hap phainairok bebak pal khe yapharjakmarokno chá lai kha.

²² Bórok tongthok laiwi nokha salsni jora auan bángla panda chá lai kha, tamni hwn ba Subraiyung se Asiriyani habugrano bórokni bwkhak khlaiwi tongthokma rw kha tei bo Israilni Kaitorni nokthar tangmani samungobo chuba kha.