EJRA 4 - Kok Borok (Re-edited) Bible (BSI)

Nokthar tang lai phir phuru kebengnai arirok

¹ Tabuk Juda bai Benjaminni arirok buini hani kiphil phainairok Israilni Subraiyung Kaitorni nok tang lai tongo hwnwi khna kha.

² Bórok Serubabel tei bosongni okrarokno thángwi hai hwnwi saui lai kha, “Chwngno bo norok bai baksa nokthar tang thani tang rw di, norok hai’-no chwngbo norokni Kaitorno khulumo, Asiriyani habugra Esarhadon chwngno o ha-o tubu phuruni simi’-no chwngbo bono ratharwi yaphar lai phai lai-o.”

³ Tamo khe Serubabel, Jesua tei Israilni bosongni bokhorokrok bórokno hai hwnwi sa kha, “Chini Kaitorni nokthar tang thani norok chwngno chubana nang glak, Parsiani habugra Sairas chwngno dagima hai’-no chwng kiching chwng Israilni Kaitor Subraiyungni nokno tang lainai.”

⁴ Hakhe o ha-o tongnai bororok, Judairokno khá swbaiwi sikiriui samung tangmano mwthak rwna nai lai kha,

⁵ tei bórokno kebengna bagwi kókbiti rwnairokno rang tuk lai kha, Parsiani habugra Sairasni simi Dariasni mol jora abo hai’-no khlai lai kha.

Jerusalem tangma-o kebengmani

⁶ Ahasuaras habugra chánani chengsa drobo Juda bai Jerusalemo tongnai arirok bórokno kebengwi, kóktun rohorwi bórokni mungsa majra kwrwi hwn lai kha.

⁷ Artasarses Parsia-o habugra chámani molo Bislam, Mithredat, Tabil tei bebak borokni palrok habugrano swihor lai kha, kóktun Arami swithái bai khe Arami kók bai swijak.

⁸ Rehum wng kha sengkrak bokhorok tei Simsai khe Jerusalemno tẃiwi Artasarsesni habugrani thani hai hwnwi kóktun swihor lai kha,

⁹ “Sengkrak Rehum tangphang Simsai bai bórokni palrok, buj thumnairok, bubagrarok, tẃiphangrok, Parsia-o tongnairok, Erek bororok Babilono tongnairok, Elam ha-o tongnairok, Elam ha-o tongnai Susani bororok,

¹⁰ tei kubun dopharok belai kotor tei phan gwnang Osnapar bini palno tubu-ui Samaria bai Uphratis twi nar phaising tong rw phai bai kha.”

¹¹ Omo kóktunni bwkang kangsa bono rohorma, “Habugra Artasarsesno, nini selengrok Uphratisni saltháng phaising tongnai bororok swihormani,

¹² habugra sina nangmani khe hai nini tei kubun amchoini chini aro phainai Judairok, Jerusalemo tong laiwi hamya tei kebengnai kamiyungno tang lai phi kha, bórok chokdeualbo tisa laiwi tong kha, dakti’-no pái lainai.”

¹³ Habugrani tei bo sina tongma khe, kamiyung tang bai khe, bórok tei nono mungsa teks rw ya wngnai tei bugrani rangkhókrok bukcha wng bainai.

¹⁴ “Chwng habugrani sóm cháui tongma ba, habugrano mwkhang sókna muchung ya, aboni bagwi chwng habugrano ma sa hor kha.”

¹⁵ Hakhe nini chuchusongni bijabo swiwi narwkjakrokno nai khe nuknai tei saui mannai o kamiyung swkangni molni simi’-no ari wngwi habugrarokno tei kwbángma amchoirokno urumuru phnangwi’-no phai kha, abo bai’-no o kamiyung sokomorjago,

¹⁶ aboni bagwi chwng saui man súk kha, o kamiyung tangjak phi khe tei chokdeual pái súk khe nwng tei twima nar amchoirokno methebwi narwgwi se man glak.

¹⁷ Habugra omo hai khe kóktun kiphilwi swi kha: Sengkrak Rehum tei tangphang Simsai, Samaria-o tongnai bebak bórokni palrokno tei twima naro tongnai bebakno chubaui, habugra ang dagiui bijaprokno naitugwi nai khe nukjak kha, kubui’-no o kamiyung khe swkang yaphang molni simi aroni habugrarokno kebengwi’-no belai khe ur phnangwi máng phai kha,

¹⁸ norok chwngno kóktun swihormani abo ani bwskango’-no poriui swbai sajak kha,

¹⁹ Ang dagi khe saui man kha tei naitugwi naiwi sijak kha, swkangni simi’-no a kamiyung habugrarokno kebengwi bacha-o, kók khe aroni bororok kók se khwna ya gwja.

²⁰ Jerusalemo belai gwnang habugrarok achugwi bebak Uphratis narni amchoirogo habugra cháui teksrok tei rangrok thum lang bai kha,

²¹ abo bai norok kaisa dagimung ma karinai, hakhe ang tei uáisa sakhlai phi ya sak bórok kamiyungo tangmani ma mwthaknai,

²² hus khe habugrani mungsabo wng ya tẃi khe dakti’-no abo khlai di.

²³ Habugra Artasarsesni kóktun Rehum, Simsai tei bórokni palrokni bwskango poriui khna rwjak khe, bórok dakti khe Jerusalemo tháng laiwi Judairok kamiyung tangmano kasu lai kha,

Nokthar tangna chengjakma

²⁴ Hakhe Jerusalemni Kaitorni nokthar tangjakma Parsiani habugra Darias habugra chámani nokha bisik nwi jora mwthagwi’-no tonjak kha.