EJRA 10 - Kok Borok (Re-edited) Bible (BSI)

Buini dopha bai gwdalwi káijakmarokno mwthakna bagwi kók chap laimani

¹ Kaitorni nok bwskango Ejra pwtapsa klaiwi kap twtwi nakar sanwi suri sanwi tong phuru Israilni kwbángma bororok chwlarok, bwrwirok, chwrairok phaiwi bebak’-no bono chorsa khe kiting lai phai kha. Tamni hwn khe lukurok muisubuk chaui kap lai kha.

² Elam bosongni Jehielni bwsla Sekania Ejrano hai hwnwi sa kha, “Chwng o hani bwrwirok bai káijagwi tei chini Kaitorni thani poito swbai kha, abo hai wngwibo Israilni bagwi tabukbo khatungmung tong kho.”

³ Aboni bagwi phai di, chwng a bwrwirokno tei bórokni chwrairokno yakarwi rohor sinai hwnwi chini Kaitorni thani swmai ma tang lai sinai, Kaitorni kókbitino rwgwi chini bugra bai Kaitor dagimarokno kirinarok samani tẃi’-no khlai sinai, kerongo tongmani tẃi’-no khlaijak thung.

⁴ Bacha di, abo nini samung se, chwng nwng bai baksa tongo, phan thon di tei abono tang si di.

⁵ Hakhe Ejra bachaui ochai bokhorok Lebirok tei bebak Israilrokno, Sekania sama tẃi’-no khlainai hwnwi swmai tang rw bai kha.

⁶ Hakhe Ejra Kaitorni nokni thángwi Eliasibni bwsla Jehohanan tongmani nogo tháng kha, aro bo buini ha-o khaui tlangjaknairokno poito kwrwi wngmani bagwi khá khamjagwi hopung chá li ya nung li ya khe tongwi kha.

⁷ Bebak buini hani kiphilnairok Jerusalemo ma kuthum bainai hwnwi Juda bai Jerusalemo sakhlaijak kha.

⁸ Khoroksa swk salthamni bisingo sók phai ya wng khe tẃiphangrok tei okrarok bai chapjakmani hai bini bebak tong kwrwi najak bainai tei buini hani kiphilnairokni bodolni swkagwi rohorjaknai.

⁹ Hakhe Judani tei Benjaminni bebak chwlarok salthamni bisingo Jerusalemo kuthum lai kha. Abo nokha talchuku talni nwichi salo klai-o tei Kaitorni nok bwskango haphar busup brwi-o achuk lai bai kha, hakhe aswk bororok kuthum laimani bagwi tei uatwi kwbángma phaimani bai kirijak baiwi kwlwi bai kha.

¹⁰ Hakhe Ejra ochai bachaui bororokno hai hwnwi sa kha, “Buini hani bwrwi bai káijagwi norok cha ya khlaimani bai, Israilo teibo dosa báng rw phai kha.

¹¹ Tabuk norokni chuchusongni Subraiyung Kaitorni thani norokni sumsokno lon bai di. Tei bini muchungmani tẃi khlai di, norok sakno o hani bororok bai kagwi tong di. Tei buini hani hiksong bai kagwi tong di.”

¹² Hakhe tabuk kuthumnairok hai hwnwi chirigwi sa lai kha, “Haino wng si thung, nwng samani hai’-no chwng khlainai.”

¹³ Tamo khe bororok kwbángma tei uatwibo hai’-no kwbángma phai tongmani jora, chwng abo hai khe tei kwdwk phataro bachaui tong lai man glak, abo salsa salnwi bai khlai mannai samungbo wng ya. Tamni hwn ba chwng kwbángma’-no abo hai sumsok bai gwdaljak.

¹⁴ O samungni bagwi Kaitorni jolima hamnani bagwi chini tẃiphangrok bebakni wngwi barja naui samung khlai thung, hakhe buini hani bwrwirokno hik nanai khoroksa khoroksa khe chongjakmani jora’-ono kamiyungni okrarok bai tei buj thumnairok bai khe phai thung.

¹⁵ Asahelni bwsla Jonathan bai Tikbani bwsla Jajeia abono chajak ya wng kha. Tei Mesulam bai Lebi Sabethai khe chajak kha.

¹⁶ Hakhe buini hani kiphilnairokno abo hai khlai kha, ochai Ejra bebak bosongni bororokno chong kha tei bórokni mungno swiwi narwk kha. Nokha tal chini puilani salo bórok abono kaham khe nainani cheng lai kha,

¹⁷ puila talni puilani salo bórok bebak buini hani hik nanairokni bagwi samung pái súk kha.

Buini hani bwrwirokno nanai bororok

¹⁸ Omo buini hani bwrwino hik nanairokno swiwi tisajaknai ochairokni bosong, Josadakni bwslasong Jesuani bosong tei bini takhuksong Maseia, Eliaser, Jarib tei Gedalia.

¹⁹ Bórokni hiksongno yakarwi rohornani swmai tang lai kha tei bórokni sumsokni bagwi mera bwsa yaphar kha.

²⁰ Imerni bosong; Hanani bai Jebadia.

²¹ Harimni bosong: Maseia Elia, Semaia, Jehiel tei Ujia.

²² Pasurni bosong: Elioenai Maseia Ismael, Nethanel, Jojabad tei Elasa.

²³ Lebisong: Jojabad Simei, Kelaia (Kelita bo hwnjago) Pethahia, Juda tei Eliaser

²⁴ Rwchapnairok: Eliasib, Duglam mwrwknairok; Salum Telem tei Uri.

²⁵ Israilrok: Paros bosongni: Ramia Ijia, Malkija, Mijamin, Eliasar, Hasabia tei Benaia.

²⁶ Elam bosongni: Matania, Sakaria, Jehiel, Abdi, Jeremot tei Elia.

²⁷ Jatu bosongni: Elioenai, Eliasib, Matania, Jeremot, Jabad tei Ajija.

²⁸ Bebai bosongni: Jehohanan, Hanania, Jabbai tei Athlai.

²⁹ Banini bosongni: Mesulam, Maluk, Adaia, Jasub, Seal tei Jeremot tei Elia.

³⁰ Pahatmoab bosongni: Adna, Chelal, Benaia, Maseia, Matania, Bejalel, Binui tei Manase.

³¹ Harim bosongni: Eliaser, Isija, Malkija, Semaia, Simeon,

³² Benjamin, Maluk tei Semaria.

³³ Hasum bosongni: Matenai, Matata, Jabad, Eliphelet, Jeremai, Manase tei Simei.

³⁴ Bani bosongni: Madai, Amram, Uel,

³⁵ Benaia, Bedeia, Cheluhi,

³⁶ Bania, Meremot, Eliasib,

³⁷ Matania, Matenai, Jasu

³⁸ Binui bosongni: Simei,

³⁹ Selemia, Nathan, Adaia,

⁴⁰ Maknadebai, Sasai, Sarai,

⁴¹ Ajarel, Selemia, Semaria

⁴² Salum, Amaria tei Josep

⁴³ Nebo bosongni: Jeiel, Matithia, Jabad, Jebina, Jadai, Joel tei Benaia

⁴⁴ abórok bebak buini hani bwrwirok bai káijak bai kha tei bebak bórokni bwsarok bai khe yakarwi rohor bai kha.