EJRA 1 - Kok Borok (Re-edited) Bible (BSI)

Sairas Judairokno kiphilna bagwi dagimani

¹ Sairas, Parsia-o habugra chámani puilani bisi-o Subraiyung Jirimia diyarini khúk tẃi samani abo nang phai kha. Subraiyung habugra Sairasni bwkhano bacha rwui bebak bini ha gwnangwi swiwi sakhlai rw kha:

² Parsiani habugra Sairas hai hwnwi sa-o: “Subraiyung chuknohani Kaitor, hayungni bebak bugrani hano ano yaphar kha tei ani thani Judani Jerusalemo bini bagwi nokthar tangnani barja bók kha.

³ Norokni bisingo bini bebak bororok, Kaitor bini bororok bai pal tong thung, bórok bebak Judiani Jerusalemo thángwi Subraiyung Israilni Kaitorni bagwi nok tangwi phina wng thung, bo wng kha Jerusalemni Kaitor.”

⁴ Yógwi tong rwknairok tongmani hani bororok nang khe, bórok Jerusalemni Kaitorni nok tangnani bagwi muchungwi yapharmano karwi, rangchak, rukphaini, manwi-khwnwirok, mal-matarok rwui chuba thung.

⁵ Hakhe Juda bai Benjamin bosongni bokhorokrok, Ochairok, Lebirok, Kaitor khá bacha rwmani bebak bororok thángwi Subraiyungni nok tang phirna tiyar wng lai kha, abo wng kha Jerusalemo.

⁶ Aroni bebak bororok mal-mata yapharmano karwi teibo rangchak, rukphai, manwi-khwnwirok, yabrwirok tei kubun morokma manwirokno bórokno rw kha.

⁷ Sairas habugrabo Nebukadnejar Jerusalemni tlangmani bini mwtai nok bisingo ton rwmani Subraiyungni nokni a manwi-khwnwirokno kariui tubu kha.

⁸ Parsiani habugra Sairas abórokno kariui rangchak mwrwknai Mithredatni yakni tubu-ui Judiani habugra Sesbajarni yago lekhaui rw kha.

⁹ A manwirok wng kha omo hai, rangchakni piyangrok tháithamchi, rukphaini piyangrok tháisasai tei kong nwichichuku sengsarok.

¹⁰ Rangchakni dangai tháithamchi, rukphaini dangai brwichi-ra tei sasai kubun manwirok.

¹¹ Aro bebagwi ba-sai-brwira rangchak bai rukphaini manwirok tongo. Sesbajar abórokno Babilonni Jerusalemo khajagwi tlangjaknairokno kiphilwi tubu-ui phai phuru tubu-ui phai kha.