DANIEL 9 - Kok Borok (Re-edited) Bible (BSI)

Daniel bini bororokni bagwi Surimani

¹ Ahasuarasni bwsla Mede-o tongnai Darias Babilono habugra chámani puilani

² habugra chámani puilani bisi-o ang, Daniel, Jerusalem nokha bisi snichi jora kwbai khe klaiwi tongnai hwnwi Jirimiani tẃi khe Subraiyung elembago samano buchiui man kha.

³ Hakhe ang Subrai Kaitorni thani bwkha nangwi chá ya-nung yaui, rí soroi kanwi tei thapla phulwi koiwi suri san kha.

⁴ Subraiyung ani Kaitorni thani ang suriui nakar sanwi hai hwnwi sa kha; “O Subrai, nwng kotor tei kirimasingcha Kaitor, nwng nini kók khnanai tei nono hamjaknairok bai kók narwgo tei hamjakma sói khe tongo.

⁵ Chwng sumsok khlai kha, dera kha tei samung hamya khlai kha, nono kebeng kha tei nini raida tei dagimungrokni konorwi tháng kha.

⁶ Chwng nini mung bai chini habugrarokno, tẃiphangrokno, chini chuchusongno tei joto hani bororokno nini diyarirok samani kókrokno khna li ya.”

⁷ O Subrai, nwng se sói, tamo khe chini le hamya bai kupulung, abo chwng joto Juda-o, Jerusalemo, gana-o tei hakchalo tongnai tei nwng oroi-poroi khe rohor baimani bororok nini thani hamya khlai bai kha.

⁸ O Subraiyung chini habugrarok, tẃiphangrok chuchusong lachimasingcha samung khlai baiwi nini thani sumsok khlai bai kha.

⁹ Tamni hwn ba chwng nono kebeng kha, Subraiyung chini Kaitor khairokma gwnang tei nakarmung kupulung,

¹⁰ bini diyarirokni bising tẃi khe kerong rwmani Subraiyung chini Kaitorni kókno chwng khna li ya.

¹¹ Joto Israilrok nini raidarokno swbai kha tei nini samano tẃiwi tongnani lon bai li ya. Chwng nini thani sumsok khlaimani bagwi nini seleng Musini thani sraimungrok tei swmai tangmanirok chini thani lukhlaiwi rwjak kha.

¹² Nwng samani haino chini saka tei tẃiphangrokni saka-o tei kubun harokni slái teibo kirimasingcha khe klai kha. O ha saka-o Jerusalemno sátokmani hai tei kaisabo khlaijak ya kho.

¹³ Musini kerongo swijak tongmani hai khe bebak dosa chini saka-o klai kha, hai phano se chwng sakni cha yarokno yakarwi, samung kubui tangwi Subraiyung chini Kaitorno bwkha ham rwna nai ya kho.

¹⁴ Aboni bagwi Subraiyung chwngno sátoknani bagwi tiyar wngjak tei chini saka-o abo hai’-no khlai kha, Subraiyung samung tangmani bebakno sói se chwng se bini kókno khna li ya.

¹⁵ Tabuk, o Subrai chini Kaitor, nwng phankrak phan bai nini bororokno ha Ijipni tẃitherwi tubu kha, tini jora nini mung tong kho, chwng sumsok khlai kha tei belai sitra khe samung cha ya tang kha.

¹⁶ O Subrai, nwng samung kaham khlaimani hai nini kamiyung Jerusalem kwthar hatháino tei ta joli si di, tamni hwn ba chwng tei chini chuchusong sumsok khlai bai kha, gana-o tong bainai bororok Jerusalem tei nini bororokno naislerjak bai-o.

¹⁷ Hakhe tabuk o chini Kaitor, nini seleng suri sanwi yapharmano nini mungni bagwi khna ja di, nini nokthar bukcha klaiwi tongmani bising tẃi nini mwkhang chẃng rw di.

¹⁸ O Kaitor, nini khunju kaichomwi khna ja di tei nini mokol phiyogwi nai di, kamiyung nini mung bai se ringjago, chwng borok kaham wngmani bagwi ya, tamo khe nini khairokma kupulungni bagwi se nini thani san ja-o.

¹⁹ O Subraiyung, khna ja di, o Subraiyung, nakar ja di. Chini koimano khna ja di tei o Subraiyung ler yaui samung khlai ja di, nini mungni bagwi, o ani Kaitor, nini kamiyung bai nini bororok nini máng se.

Gabriel kók diyarino sukhrubwi samani

²⁰ Ang suriui ani sumsok tei ani Israil bororokni sumsokrokno gosiui tong phuru tei Subraiyung ani Kaitorni hathái kwtharni bagwi koiwi suriui tong phuru;

²¹ ang suriui kók saui tong phuru, ang swkango imango nukmani a Gabrielno sanjani yapharma jora-o ani thani birkhlawi phai kha.

²² Bo phaiwi ano hai hwnwi sa kha, “O Daniel, ang tabuk nono simung tei elem rwnani bagwi se phai-o.”

²³ Nwng Kaitorni thani surina cheng khe abo Kaitorni thani sógwi kha tei ang nono abono sanani bagwi se phai-o, Kaitor nono belai khe hamjago, aboni bagwi ang samani kók bai imangni kókno kaham khe kaichomwi khna di.

²⁴ Norokni bororok tei hati bar snichi jora nini bororok tei nini kwthar kamiyungno samung cha yarokno pái rwnani, sumsokno sokomornani, hamyano súchanani, mol brúm tong phlainai sói bujno tubunani, phunukmung bai diyarino sil bunani tei kwthar kugo thok lu-ui chongthar chongnani.

²⁵ Aboni bagwi kaham khe saui man di tei si di: Jerusalemo tang phinani bagwi dagijakmani jorani simi Kaitorni chongjak habugra sók phai ya sak jora, hati barsni láiwi tei hati bar dokchinwi láiwi thángnai; abo pái khe Jerusalemni lamprarok tei huijak lamarok tei uáisa snamjaknai, tamo khe aphuru belai jora hamya wngnai.

²⁶ Hati bar dokchinwi láimani ulo Kaitorni a chongjak borok butharjaknai tei bini mungsa phano tong rwk glak tei bororokni bugra phaina hwnnai phaiwi kamiyung tei noktharno sokomornai. Abo twi kotor phaima bai páinai, páithago choba nang lainai tei komorwi páinai.

²⁷ Bo hati barsa jora borok kwbángma bai kwrak khe kók kha lainai, phiya ba aboni jora khaksa lái khe bo yapharmungrok tei barok mungrokno mwthaknai; selengmasingcha manwirok jotoni saka-o sók phainai, komornani jora sók phai ya sak abo hai tongnai.