DANIEL 5 - Kok Borok (Re-edited) Bible (BSI)

Belsajarni chámung panda kotor

¹ Salsa habugra Belsajar bini khorok sasai borok kolok kotorrokni bagwi chámung panda kotor khlai kha tei bórokni bwskango bo arak nung kha.

² Hakhe habugra, bini borok kolok kotorrok bai, bihiksong bai tei bihik kotoirok bai arak nungnani bagwi, bini bupha Nebukadnejar Jerusalem noktharni tubumani rangchak tei rukphaini khurirok tei dangairokno tubunani bagwi dagi kha.

³ Hakhe bórok Kaitorni nokthar Jerusalemni tubujakmani rangchak tei rukphaini khurirokno tubu khe habugra bihiksong bai tei bini hik kotoirok bai khe abo bai arak nung lai kha.

⁴ Bórok arak nung lai twtwi rangchak, rukphai, pitol, sor, buphang tei holongni mwtairokno lob lai kha.

⁵ Achomsa khe khoroksa borokni yasi nukjagwi noyungni deual lepejak, chati thopnani tei babaisa bwkhak swi kha, abo swiwi tong phuru khe habugra a yakno nuk kha.

⁶ Hakhe habugrani mwkhang sláijagwi tháng kha, tei bo belai khe kirima chaui bini yáskú bai yáskú se nang laiwi tong si-o.

⁷ Habugra chirigwi danda-baji phunuknairok tei athukiri lekhanairokno tubu di hwnwi dagi kha. Habugra bórokno hai hwnwi saui khna rw kha, “Khoroksa swk o swijakno poriui abo tamo ano saui khna rwui man khe, bo bugrani kanmung rí ma kan rwjaknai chum rwjaknai tei bini kotogo rangchakni bwtang kan rwjaknai tei o ha-o khoroknwini ulni bugra ma chánai.”

⁸ Hakhe joto habugrani elem kwrwngrok phai bai kha, tamo khe khoroksa phano abono poriui man lai li ya tei abono sukhrubwibo saui khna rwui man li ya.

⁹ Hakhe habugra Belsajar teibo kirima chá kha, bini mwkhang sláijagwi ma mok kha, kolok kotor bororok tamo khlaima chano pál man li ya gwja.

¹⁰ Isirijwk habugrani kókrokno tei tẃiphangrokni kókrokno khnaui chámung pandani bisingo hap phaiwi hai hwnwi sa phai kha, “Habugra, mol brúm kwthang tong thung! Nwng aswk uanaui ta kiri si di.

¹¹ Nini ha-o borok khoroksa tongo bini bisingo kwthar mwtairokni pholabo tongo. Nwphani jora-o mwtairokni thani elem tongmani hai khe o borokni thani elem tei simung nukjago, hakhe nini nwpha bono thinangni kók sanairok, danda-baji phunuknairok tei athukiri lekhanairokni slái bokhorok snam kha.

¹² Tamni hwn ba bini bisingo buini slái kwbáng kuk manmani, elem, simung, imangni kókrokno sukhrubwi sanani, kók kuthukrokno sananibo mano, bo wng kha Daniel, bono habugra Beltesajarbo hwno. Tabuk Danielno oro ring rw hor di, bo nono abo sukhrubwi saui khna rw anw.”

Daniel swijak kókno sukhrubwi samani

¹³ Hakhe Daniel habugrani bwskango tubujak kha, habugra Danielno hai hwnwi sa kha, “Ani apha Judaini khaui tubumani, Daniel nwng de a borok?

¹⁴ Ang khna kha nini bisingo mwtai kwtharrokni phola tongo tei nini thani elem tei simungrok tongo.

¹⁵ Ani bwskango elem kwrwngrok, kók mwtai kwrwngrokno swijakno porinani tei abono sukhrubwi sanani bagwi tubujak kha, phiya ba bórok saui man li ya.

¹⁶ Tamo khe nwng bisingni kókrokno sukhrubwi saui mano hwnwi ang khna kha. Tabuk nwng o swijakno poriui man khe tei o kókno sukhrubwi saui man khe nwng bugrani rí kaham kan rwjaknai tei rangchakni ganthi kotogo kan rwui rwjaknai tei ani ha-o khoroknwini ulni bugra ma chánai.”

¹⁷ Hakhe Daniel habugrani bwskango hai hwnwi sa kha, “Nini hilino nini bagwi ton di tei nini sokatrokno kubunno rw di. Phiya ba ang swijakno poriui abono sukhrubwi habugrano sa anw.”

¹⁸ O habugra, kuchukni Kaitor nini nwpha habugra Nebukadnejarno bugra chá rwui kotor tei chẃngsacha khlai kha.

¹⁹ Bo aswk khe kotor wng kha joto dophani, bosongni tei kókni bororok bono kiriui kwlwi bai kha. Khoroksa swkno butharna muchung khe butharo, mwthangna muchung khe mwthango, khoroksa swkno kuchugo tisanai hwn khe tisa-o tei swklwkna muchung khe swklwgo.

²⁰ Phiya ba bini kung belai chuk khe tei bwkha kwrak wng khe bini bugrani achukthayungni norjak kha tei bini chẃngsacha tlangwi thángjak kha.

²¹ Bugrarokni saka-o kuchuk Kaitorni yak tongo tei bo muchungmani borokno abono yapharo hwnwi bo saui man ya sak, bo bororokni bisingni rwkhlaiwi rohorjak kha tei bini bwkha yabrwirokni hai snamjak kha tei bini tongthai bolongni korai chirka bai baksa se wng si-o tei musuk chwla hai khe jabra ma chá kha, bini bwsago nokhani pantwirok klaiwi ma tong kha.

²² Tamo khe nwng bini sajla Belsajar, abórokno bebak saui manjak phano nini sakno koinene wng li ya.

²³ Phiya ba nwng chuknohani Kaitorno kebengwi nini sakno kuchugo tisa kha. Tei bini noktharni tubujakmani khurirokno naharwi nwng nini tẃiphangrok, hikrok tei hik kotoirok bai pal khe abórok bai arak nung lai kha tei nwng rangchak, rukphai, pitol, sor, buphang tei holongrokni mwtairokno lob kha, abórok nubo nuk ya, khwbo khna ya, phiya ba bono rangma rwui tongnai Kaitorno tei nini lama nainaino bórom se khlaina rwng li ya.

²⁴ “Hakhe bini bwskango yak rohorwi omo hai khe swijak kha.

²⁵ Omo hai khe se swijago: MENE, MENE, TEKEL tei PHARSIN.

²⁶ Omo hai se aboni bisingni kók, MENE - Kaitor nini hani salno lekhaui nai kha tei abono pái rw kha.

²⁷ TEKEL - nwng rwtajaknai bai rwtajak kha tei heleng wng kha.

²⁸ PERES - nini hano swkagwi Medes tei Parsiarokni yago yapharjak kha.”

²⁹ Hakhe Belsajar bini selengrokno Danielno bugrani rí kaham, chum kaham bai chum rwnani tei bini kotogo rangchakni ganthi, kan rwnani dagi kha. Tei bono ha-o khoroknwini ulni bugrani suar rwjak kha hwnwi sakhlaiwi rw kha.

³⁰ A horono Belsajar Babilonni habugra butharjak kha.

³¹ Darias- Medeni bugra bini hano yachak kha. Bini umor aphuru nokha bisi dokchinwi.