DANIEL 12 - Kok Borok (Re-edited) Bible (BSI)

Jora páithak

¹ “A jora-o suari nini borokno mwrwknai. Suari bokhorok Mikail bachanai. A jora-o urumuru wngnai dopha khamani ulo ha saka-o abo hai uáisa phano wng ya kho, phiya ba a jora-o bijabo bumung swijak tong khe a bororok phiyókjak bainai.

² Aphuru kwbángma borok kwthwirok thangwi bachanai, baksa mol brúm thangwi tongna bagwi, baksa khe mol brúm lachimungni bagwi tei selengjaknani bagwi bachanai.

³ Elem gwnangrok khe nokha chẃngmani hai khe chẃngsanai, lama kaham phrwngnairok khe mol brúm athukirirok hai khe chẃngsanai.”

⁴ Bo ano hai hwnwi sa kha, “Tamo khe nwng khe Daniel, jora pái ya sak o kókno mari bu-ui kholop di, borok kwbángmarokno ayang uyang himgurung lai anw tei aphuru elem báng rw rwk wngnai.”

⁵ Hakhe ang Daniel nuk kha, khoroknwino twima rukungo, khoroksa khe yang twi rukungo tei khoroksa khe twi rukungni ayang rukungo bachajak.

⁶ Tei khoroksa twini kisa saka-o bachajakno hai hwnwi sẃng kha, “Omo hai kwmamsingcha samungrok páina bwswk lerno?”

⁷ Ulo lilonni rí kanjak chumjak twi saka-o bachaui tongnai a suari bini yagra yak tei yaksi yakno chuknoha bwkhak tisaui mol brúm tong phlainai Kaitorni mung bai swmai tangmani khna kha, a jora uáisa, uáinwi tei khaksa wngnai tei borok kwtharrokni phan bái phuru khe abórok bebak nang phainai.

⁸ Ang o kókno khna kha, hai phano romwi man li ya. Hakhe ang hai hwnwi sa kha, “O ani bugra, abórok páithago tamo wngnai?”

⁹ Bo hai hwnwi sa kha, “O Daniel nini lama-o nwng tháng di jora pái ya sak o kókrok kholopjak tei sil bujak khe tongnai.

¹⁰ Borok kwbángma’-no sak-sakno kwthar, kuphur khlaina saktharnai, phiya borok cha yarok khe hamya khlai máng tongnai, borok cha yarok khoroksa phano romwi man glak, tamo khe elem gwnangrok simi se romwi mannai.

¹¹ Sal brúm sógwi yapharmungrok mwthakjakmani salni simi tei aro selengmasingcha manwirok tonjak phuruni simi nokha sal 1290 wngo.

¹² Tamo khe sói khe nokha sal 1335 jora naisingwi tongwi mannai borok bo hamchajak.

¹³ Phiya ba Daniel nwng páithak jora sói khe tong di; tamo khe lenglaui tong di, jora páithago nini bagwi chongjak ha-o bachanai.”