DANIEL 1 - Kok Borok (Re-edited) Bible (BSI)

Daniel tei Bikichingsongni Kothoma ( Dan 1.1—6.28 ) Nebukadnejarni nogo sikla bororok

¹ Judani habugra Jehoiakim, habugra chámani nokha bisikthamni bisi-o, Babilonni habugra Nebukadnejar Jerusalemno segwi na phai kha.

² Subrai, Judani habugra Jehoiakimno tei Kaitorni nokni baksa manwirokno yaphar kha, bo abórokno ha Sinaro mwtai tongmani nogo tubu-ui manwirokno mwtai nokni rangkhók nogo khe ton rw kha.

³ Hakhe habugra bini tẃiphang bokhorok Aspenajno Israilni baksa bugrani núkhungni tei kolok kotorrokni núkhungni bororokno tubunani bagwi dagi kha,

⁴ bórok khe; sikla naithokma, khait kwrwi, elem kwrwng, kaham khe phrwngjak, dakti khe srwngwi mannai tei habugrani noyungo monwi ma mannai, bórokno Babilonni kók porinani tei swinani phrwngnabo dagi kha.

⁵ Habugra bo sak mai chámani tei arak nungmano bórokno chá rwna nung rwna dagi kha. Bórokno nokha bisiktham jora phrwngmani ulo habugrani bwskango bórok ma bachanai.

⁶ O saiwi najaknairokni bere Daniel, Hanania, Misael tei Ajaria, bórok khe Judai bosongni borok.

⁷ Tẃiphang bórokno bumung kwtal pharwi rw kha: Danielno khe Beltesajar, Hananiano khe Sadrak, Misaelno khe Mesak tei Ajariano khe Abednego hwn kha.

⁸ Tamo khe, Daniel bini bwkha-o habugrani chámung cháui tei arak nungwi sak sakno dera rw glak hwnwi chong kha; aboni bagwi bo gurmarokni tẃiphangni thani sakno dera rw ya khe tonna bagwi sep san kha.

⁹ Hakhe Kaitor gurma tẃiphang okrani bwkha-o Danielno khairok rw kha.

¹⁰ Gurma tẃiphang bokhorok Danielno hai hwnwi sa kha, “Ang habugrano kiri-o, bo se nini chámung tei nungmung rw-o, bo nono tei kubun siklarok hai kaham khe nuk ya hwn khe, hakhe bo ano butharnai.”

¹¹ Aphuru khe Daniel, Hanania, Misael tei Ajariasongno mwrwkna bagwi gurmarokni bokhrok bai barja rwjakno Daniel hai hwnwi sa kha,

¹² “Chwngno nokha salchi jora amjogwi nai di, chwngno chána bagwi dalo-sampra muikwthwngrok tei nungna bagwi twi simi rw di.

¹³ Hakhe habugrani chámung kaham chánai siklarok bai chwngno su-ui naiwi bugrasa chajakma tẃi’-no chwngno khlai di.”

¹⁴ Hakhe bo bórokni kók khnaui salchi jora bórokno amjogwi nai kha.

¹⁵ Nokha salchini ulo habugrani chámung kaham chánairokni slái bórok se bwsak kaham tei lotwtẃi wng kuk si-o.

¹⁶ Hakhe bórokno naikolnairok habugrani chámung tei arakno sláiwi dalo-sampra simi bórokno chá rw kha.

¹⁷ Kaitor o sikla khorok brwirokno rwngmung elem tei buchinani phan rw kha; hakhe Danielno khe imang nukmani kókrokno suda saui mannani phan rw kha.

¹⁸ Chongjak jora pái khe habugra bórokno tubunani dagi kha. Gurma tẃiphang okra bórokno habugra Nebukadnejarni bwskango tubu kha.

¹⁹ Habugra bórok bai bebak kók-lam sa lai kha tei kubun bororok Daniel, Hanania, Misael tei Ajariasong hai khoroksano phano nuk li ya. Hakhe bórok habugrani bwskango bachaui man kha.

²⁰ Bórokno habugra bebakno tẃi sẃngmarokno bórok saui man kha, habugra aswkni kók mwtai sanairok danda-baji sanairokni slái bórokno uáichi kwrwng kuk khe nuk kha.

²¹ Daniel Parsiani habugra Sairas Babilonno segwi na phai ya sak aro tong kha.