AMOS 9 - Kok Borok (Re-edited) Bible (BSI)

Subraini buj

¹ Ang Subraiyungno háyá gana-o khe bachaui tongma nuk kha tei hai hwnwi sama khna kha: “Yaphang jangrijagwi aro tongnai bororokni saka-o báiwi klai ya sak thonglani bochlongo bu di; thangwi tong rwknairokno khe ang seng bai butharnai; bórok khoroksa phano yók glak.

² Bórok thwima hakhor khurwi thángwibo, ani yak bai ang bórokno romwi tubunai; tei bórok nokha-o kasaui thángwibo ang bórokno aroni tikhlaiwi tubunai.

³ Tumung bórok hachuk Karmel bokhorogo huijak phano, ang bórokno aroni rutugwi karinai; bórok twijlang bisingo huijak phano ang twijlangni chibukno dagiui bórokno suk rwnai.

⁴ Bórokni kena arirok bai khaui tlangjak phano ang bórokno buthar di hwnwi sengno daginai; kaham khlaina bagwi ya tamo khe hamya khlaina bagwi se ang ani mokol bai bórokno nai khlaiwi tongnai.”

⁵ Subraiyung, kwplaisa Kaitor, bo hano tang khe abo geleui ma thángo, tei bini aro tongnairok ma kap bai-o, tei abo ha Ijipni Nil twima hai khe twi torsaui ahaino ahai kechep khlai-o;

⁶ bo nokharogo kuchukni khotolrokno snamo, tei ha saka-o aboni yaphang lu-o; bo twijlangni twino ringo tei ha saka-o lukhlai-o bini mung Subraiyung!

⁷ Subraiyung hai hwnwi sa-o, “Israilni bororok, norok ba ani thani Ithiopiasarok hai ya de?” Ang Israilno ha Ijipni tubu ya de? Tei Philistiasarokno Kepthorni tei Aramrokno ha Kirni tubu ya de?

⁸ Nai di, Subraiyung Kaitorni mokol sumsok gwnang ha-o nai khlai tongo, tei ang bórokno o hani sokomornai, tamo khe ang Jakobni bosongno khe sokomor súk glak, hwnwi Subraiyung sa-o.

⁹ “Nai di, ang dagiui jangini bai mai chwkai tẃi khe aswkni bosongrokni bisingni Israilni bosongno chwkainai hai phano biphiring kaisa suda ha-o klai glak.

¹⁰ Ani bororokni bisingni ‘Hamya chwngno yasuk glak tei chini samo phai glak’ hwnwi sanairok bebak’-no choba-o thwi bainai.

Thinango Israilrok kiphilwi rwjaknani

¹¹ “A salo ang Daudni klaijak nokno tisa phirnai tei swbo snam phirnai. Ang aboni kwbairokno snam phirnai tei klaijakrokno tisa phirnai, abo swkang phuruni hai wng phinai;

¹² abo hai khe Israilsarok Idomni karwi klangjakrokno tei ani mungwi ringnairok manẃi mannai,” hwnwi omono khlainaisa Subraiyung sa-o.

¹³ “Omo hai sal phaiwi tongo,” hwnwi Subraiyung sa-o, “Ranani swkang’-no kái phirna jora wngnai, tei angur phere báina swkang’-no bwchlwi kái phirna jora wngnai; hatháirokni angur bwtwi yor khlainai tei hachukrok tẃi khe abo kochok khlainai.

¹⁴ Ang ani borok Israilni bagwi kaham khlai phirnai, tei bórok bebak nok kwbairok snamwi aro tong bainai; bórok angur barirok káiwi aroni kothok bwtwino nung lainai, bórok tháiblwng snamwi aroni bwthái chánai.

¹⁵ Ang rwmani ha-o bórokno kái phirnai tei bórok kebo bai phuichajak glak,” hwnwi Subraiyung nini Kaitor sa-o.