AMOS 8 - Kok Borok (Re-edited) Bible (BSI)

Ura bai kupulung bwtháirok nukma

¹ Omo Subraiyung Kaitor ano phunukmani: ura-o sachlang jorani bwthái kupulung.

² Bo hai hwnwi sa kha, “Amos nwng tamo nuk?” “Ura-o sachlang jorani bwthái,” hwnwi ang sa kha. Aphuru khe Subraiyung ano hai hwnwi sa kha, “Ani borok Israilsarok páina wng laha; ang tei bórokno sátok yaui yakarwi rw glak.

³ A salo noktharni rwchap laimarok kap laima se wng anw,” hwnwi Subraiyung Kaitor sa-o; “Mang kwthwirok kwbángma wngnai; aro-uro bórok siringcha khlaijaknai.”

Israil komorma

⁴ Khna di, o bigrarokno kádulnairok, tei hani bigrarokno sokomornairok,

⁵ norok hai hwnwi sa lai-o, “Mai-khul phalna bagwi buphuru tal thwison láinai kha? Chwng gom phalnani bagwi buphuru Sabat pái sinai? Chwng sujaknai urano khochor rwnai tei morok rwnai, bandina bagwi sói ya rwtajaknai bai khe rwtanai,

⁶ kwrwirokno rukphai bai tei chúk yarokno yaklap jorsa bai paiwi seleng snammani tei sibwi khibijak gom hamyano phalnai.”

⁷ Jakobni chẃngsacha Subraiyung swmai tangwi hai hwnwi sa-o: “Kubui’-no, ang bórokni mungsa swk samungrokno phano pok glak.

⁸ Hakhe aboni bagwi ha kwlwi glak da? Tei aro tong bainai bebakno ma kap glak da? Ha gwnangwi ha Ijipni Nil twima hai khe twi torsaui ahaino ahai kechepsaui tháng glak da?”

⁹ Subraiyung hai hwnwi sa-o, “A salo,” “Ang dibor jora’-ono sal hap rwnai, tei a sal kwthang kwthangono ha gwnangwi mwnak rwnai.

¹⁰ Ang norokni tongthok pandano bwkha nangwi kap laimung se khlainai, tei norokni rwchap laimano kap laima khlainai; ang norokni bokhorok thunta khlainai, tei rí kichik kan rwnai; hakhe norokni bwsa songdari thwijagwi kap laimani hai khlainai, tei abo páithak jora sal tongthok ya wngnai.

¹¹ Subraiyung Kaitor hai hwnwi sa-o, “Nai di abo hai sal phaiwi tongo,” “Ang aphuru ha-o chámung-nungmung biyal khlainai; abo mai ma chá ya eba twi ma nung ya wngma ya, tamo khe Subraiyungni kókrokno ok khuimani tei kangmani se.

¹² Bórok kaisa twijlangni tei kaisa twijlango, salkani simi salthángbai-o, Subraiyungni kókni bagwi yango uáisa ayango uáisa rutuk lainai, tamo khe bórok man glak.

¹³ “A salo naithok-naithok bwrwi sikla chwla sikla kangjagwi lengnai.

¹⁴ Samariani Asimani mungwi swmai tangnairok, ‘O Dan, nini mwtai kwthangni mungwi’ tei ‘Birsebani mwtai kwthangni mungwi,’ hwnwi sanairok bórok klainai tei bacha phir glak.”