AMOS 6 - Kok Borok (Re-edited) Bible (BSI)

Israil komorma

¹ “Siyono túng-túng khe tongnairok norok bwswk se hamya sitrano, Samariani hathái-o khom-khom hwnwi uansugwi tongnairok, Israilni mung gwnang dopha, norokni thani se Israilsarok phai-o.

² Norok Kolne-o thángwi nai di; aroni khe kotor Hamato tháng di; tei aroni khe Philistiasarokni Gato nongkhorwi tháng di. Abórok o hani slái da ham kuk? Eba bórokni amchoi ba chini amchoini slái de tor?

³ Norok birmanni salrokno hakchal khlaiwi tongo hwnwi uansugo, aile buj thumjak rwna sal se sampha rw-o.

⁴ “Mayung buani thuthai-o rokonairok, naithokma thuyamo bwsak pholoknairok, bathamni mera tei musuk bwsani bahan tubu-ui chánairok, norok bwswk se kirimasingcha wngno;

⁵ chongpreng tamwi rwchapmung rwchabo tei Daud hai khe dal-bidal tammung tamjaknai snamo;

⁶ dangai kupulung khe chuak nung lai-o, thok motom kaham kuk phul lai-o, tamo khe Josepni komormano nugwi bwkha se sajak ya. Phiya ba norok Israil komorma le bwkha-o se nangjak li ya.”

⁷ Aboni bagwino buini ha-o khaui tlangjaknairokni bere bórok swkang wngnai, aphuru khe norok chámung cháui bwsak phologwi selerma rohormani abórok páinai.

⁸ Subraiyung Kaitor baithangni mung bai khe swmai tangwi sa-o (Subraiyung, phankrak Kaitor sa-o): “Ang Jakobni kung chukmano tei bini nok kwrakrokno naislero; ang kamiyungno tei aro tongnai bebak manwirokno buini yago yapharwi rwnai.”

⁹ Nok khungsa-o borok khorokchi karjagwi klang khe bórok thwinai.

¹⁰ Hakhe a kwthwini sandairok a kwthwino sókna bagwi nokni tikhlaina phainai. Nok bisingo tei to da tong saui manna bagwi “Nono karwi le tei to da tong?” hwnwi bo sẃngnai, aphuru khe a nokni borok “I’nhi” hwnwi sanai. Hakhe a sandai “Siringcha wng di, chwng Subraiyungni mung phano khu thai kwrwi,” hwnwi sa anw.

¹¹ Nai di, Subraiyung dagi khe nok kotorrok tei nok bwsaterok bebakno báiwi phindrik phandrak ma wng bainai.

¹² Korairok holongthai saka-o da khabrum ba? Khoroksa phano musuk bai twijlango al de chuai ba? Tamo khe nwng bujsóino khe bis hai khlai kha tei kahamno khe kwkha khlai kha.

¹³ Norok Lodebarno tẃiwi tongthoknairok sa lai-o, “Chini phan bai chwngba chini banta Karnaimno segwi na lai ya diba?”

¹⁴ “Nai di, o Israil bosongrok, ang norokno kebengnai dopha kaisa tubunai,” hwnwi Subraiyung kwplaisa Kaitor sa-o; “Bórok Lebohamat duglamni simi Arabani twisa jora norokno kusupnai.”